玻璃樽消毒方法

        整果醬或醃菜時，用嚟裝住啲果醬或醃菜嘅玻璃樽好多時都需要消毒，以免滋生細菌而發霉。

        一直以嚟，我都以為唔係個個玻璃樽都可以放喺滾水度烚，好驚會爆玻璃，但原來只要俾玻璃逐步加熱而唔係一下子接觸高溫，個玻璃樽係唔會爆嘅，所以處理步驟同烚雞蛋時凍水落蛋一樣。

-先將玻璃樽同樽蓋洗乾淨，之後放入已裝有凍水嘅煲內一齊加熱 ( 膠蓋除外 )。

- 當水煲滾後，再烚多10 分鐘 。

 

- 之後用食物鉗小心夾起玻璃樽同樽蓋，放入焗爐度用 100°C 烘乾。

- 跟住將樽同蓋都翻轉，繼續用爐內餘熱烘乾。

- 烘乾後繼續留番喺個爐裡面，直到果醬煮好或醃菜材料準備好先拎出嚟用。