全麥杏仁香蕉蛋糕 Whole Wheat Almond Banana Cake

        原本逢禮拜四朝早我都會執屋、做清潔，因為夜晚喺中心教到好夜，差唔多 10:00pm 先收工，返到屋企都成 11:00pm o架啦，所以逢禮拜四都係叫老豆煮飯，煮番熱啲隔夜餸留飯俾我，咁我朝早就唔駛買餸煮飯，有時間做清潔囉！不過前晚老豆個農場 friend 煮咗一大盒生炒糯米飯俾我哋兩個做晚餐，所以前日一樣唔駛煮飯，見突然間有空閒時間，咪提早一日做清潔囉，咁變咗噚日朝早就有時間整蛋糕喇！

        屋企啲香蕉擺到好熟，勁多梅花點，呢個時候最好就係要嚟整香蕉蛋糕啦！不過今次我就溝咗 1/4 全麥麵粉同少量杏仁粉，睇吓味道得唔得先！

材料：
低筋麵粉      150 克
全麥麵粉      50 克
杏仁粉          20 克
泡打粉          1 茶匙
梳打粉          1/4 茶匙
鹽                  1/4 茶匙
牛油              125 克
黃糖              125 克
雞蛋              2 隻
香蕉              2 隻 

以上材料份量可做一個 21cm X 11cm X 6cm 嘅蛋糕。

- 牛油室溫放軟；杏仁粉要預先焗香，放入焗爐，用 180°C 焗 6 - 8 分鐘。

- 所有粉類 ( 杏仁粉除外 ) 同鹽先過篩 3 次，之後放入攪拌兜內拌勻。

- 用膠刮將牛油壓成忌廉狀，加入黃糖，用電動打蛋器打至發白。

 

- 分次加入粉類混合物及焗香杏仁粉，用電動打蛋器低速拌勻成粗粒狀。

- 香蕉去皮，用叉壓爛成香蕉茸後，加入粉粒內以低速拌勻。

 

- 最後加入雞蛋，繼續以低速拌勻成麵糊。

- 將麵糊倒入焗盤，放入已預熱至 170°C 嘅焗爐內，先焗大約 15 - 20 分鐘至麵糊表
  面焗硬。

 

- 然後將焗盤拎番出嚟，喺麵糊表面用刀割一條約 1 吋深嘅坑紋。

- 之後放番入爐內，繼續焗多 25 - 30 分鐘至熟透。

今次個色焗到好金黃、好靚呀！但係中間條坑紋就唔係
好出，下次再焗耐啲先拎出嚟割紋應該會好啲，但
起碼今次都唔會好似之前咁 S 形紋先啦！

 

        香蕉蛋糕真係食極都唔會厭，真係好好好好食，所以我久唔久就會整 o架啦！不過，唔知係杏仁粉個份量比較少呀，定係啲香蕉實在太熟、太香嘅關係，杏仁味好淡，如果杏仁味再香濃啲就仲正呀！好，再參考吓其他食譜，睇吓杏仁粉個份量應該要幾多先得。

 

呢個膠盒係老豆個 friend 用嚟裝糯米飯俾我哋嘅，我放咗 3 件蛋糕
落去，等老豆還番個盒俾佢時當做回禮，哈哈！

Notes：
- 如果唔係用防黏焗盤，記得要預先鋪上牛油紙，方便脫模。

- 香蕉千祈唔好預先壓成香蕉茸，因為會氧化變黑。

- 無全麥粉的話，就直接用 200 克低筋麵粉代替。

- 香蕉越熟就越香甜，所以糖嘅份量需因應香蕉甜度而有所增減。

- 要做出好食鬆軟嘅香蕉蛋糕，秘訣同整 muffin 一樣，當所有材料一拌勻就要立即停
  止攪拌，否則麵糊就會起筋，蛋糕就唔會鬆軟，變到死死實。