2010年1月22日星期五

全麥杏仁香蕉蛋糕 Whole Wheat Almond Banana Cake

        原本逢禮拜四朝早我都會執屋、做清潔,因為夜晚喺中心教到好夜,差唔多 10:00pm 先收工,返到屋企都成 11:00pm o架啦,所以逢禮拜四都係叫老豆煮飯,煮番熱啲隔夜餸留飯俾我,咁我朝早就唔駛買餸煮飯,有時間做清潔囉!不過前晚老豆個農場 friend 煮咗一大盒生炒糯米飯俾我哋兩個做晚餐,所以前日一樣唔駛煮飯,見突然間有空閒時間,咪提早一日做清潔囉,咁變噚日朝早就有時間整蛋糕喇!


        屋企啲香蕉擺到好熟,勁多梅花點,呢個時候最好就係要嚟整香蕉蛋糕啦!不過今次我就溝1/4 全麥麵粉同少量杏仁粉,睇吓味道得唔得先!





材料:
低筋麵粉      150 克
全麥麵粉      50 克
杏仁粉          20 克

泡打粉          1 茶匙
梳打粉          1/4 茶匙
鹽                  1/4 茶匙
牛油              125 克
黃糖              125 克
雞蛋              2 隻
香蕉              2 隻 


以上材料份量可做一個 21cm X 11cm X 6cm 蛋糕。


- 牛油室溫放軟;杏仁粉要預先焗香,放入焗爐,用 180°C 焗 6 - 8 分鐘。


- 所有粉類 ( 杏仁粉除外 ) 同鹽先過篩 3 次,之後放入攪拌兜內拌勻。


- 用膠刮將牛油壓成忌廉狀,加入黃糖,用電動打蛋器打至發白。


 



- 分次加入粉類混合物及焗香杏仁粉,用電動打蛋器低速拌勻成粗粒狀。


- 香蕉去皮,用叉壓爛成香蕉茸後,加入粉粒內以低速拌勻。


 



- 最後加入雞蛋,繼續以低速拌勻成麵糊。


- 將麵糊倒入焗盤,放入已預熱至 170°C 焗爐內,先焗大約 15 - 20 分鐘至麵糊表
  面焗硬。


 



- 然後將焗盤拎番出嚟,喺麵糊表面用刀割一條約 1 吋深嘅坑紋。


- 之後放番入爐內,繼續焗多 25 - 30 分鐘至熟透。






今次個色焗到好金黃、好靚呀!但係中間條坑紋就唔係
好出,下次再焗耐啲先拎出嚟割紋應該會好,但
起碼今次都唔會好似之前咁 S 形紋先啦!


 


        香蕉蛋糕真係食極都唔會厭,真係好好好好食,所以我久唔久就會整 o架啦!不過,唔知係杏仁粉個份量比較少呀,定係啲香蕉實在太熟、太香嘅關係,杏仁味好淡,如果杏仁味再香濃啲就仲正呀!好,再參考吓其他食譜,睇吓杏仁粉個份量應該要幾多先得。


 



呢個膠盒係老豆個 friend 用嚟裝糯米飯俾我嘅,我3 件蛋糕
落去,等老豆還番個盒俾佢時當做回禮,哈哈!



Notes:
- 如果唔係用防黏焗盤,記得要預先鋪上牛油紙,方便脫模。


- 香蕉千祈唔好預先壓成香蕉茸,因為會氧化變黑。


- 無全麥粉的話,就直接用 200 克低筋麵粉代替。


- 香蕉越熟就越香甜,所以糖嘅份量需因應香蕉甜度而有所增減。


- 要做出好食鬆軟嘅香蕉蛋糕,秘訣同整 muffin 一樣,當所有材料一拌勻就要立即停
  止攪拌,否則麵糊就會起筋,蛋糕就唔會鬆軟,變到死死實。


2 則留言:

  1. 好正, 好金黃.
    [版主回覆01/25/2010 23:16:00]        多謝讚賞!

    回覆刪除
  2. 緊張大師-小女人2012年9月8日 下午1:08

    朋友,我今日整呢個蛋糕,但我無香蕉就唔用啦.整俾你睇下呀.
    [緊張大師-小女人回覆09/23/2012 08:18:11]我咪成日比家人笑,呢樣我識整那樣我又識整,你都不用出去買啦.我覺得識整仲點解要買喎,麵包蛋糕好耐無去買來吃,除非買一些我不懂或我不會整的,咁又唔同
    [版主回覆09/21/2012 23:33:29]如果嗰樣嘢我識整之後,我就唔會再喺街買外返嚟食,麵包就係表表者!
    [緊張大師-小女人回覆09/20/2012 15:43:32]我係好鐘意吃的人特別係自家蛋糕,唔食出面買的....死未!
    [版主回覆09/19/2012 22:55:44]一個人食咗半個!? 真係咁好食?
    [緊張大師-小女人回覆09/19/2012 20:04:06]因為成個送了給媽媽拿走,但我第二日又整了,我一個人吃了半個,起碼肥了好多啦...
    [版主回覆09/17/2012 23:02:55]點解妳無份食呀,呢個香蕉蛋糕個個讚呢!
    [緊張大師-小女人回覆09/12/2012 15:24:13]媽媽的朋友個個讚好吃...多謝你呀,呢個食譜好掂,雖我無份吃但媽媽話好食

    回覆刪除