紅莓香橙裸麥鬆餅 Cranberry Orange Rye Muffin

        早前去烘焙店買嘢時，見到有一隻叫做香橙黑麥鬆餅嘅預拌粉，心諗，黑麥 ( 或稱裸麥) 多數都係用嚟整麵包，好少要嚟做 muffin 喎！於是就好奇咁拎嚟睇吓，但係個英文寫法係 「dark wheat」，而唔係「rye」，其實都唔知 Dark Wheat 即係乜。但一向對預拌粉無乜好感嘅我，反而有興趣試吓自己用真正嘅裸麥粉嚟整 muffin，加上我係一個 "橙癡"，所以真係好想試吓整呀！

        咁我噚晚就係網上參考咗好多 orange muffin 嘅食譜，發現原來好多時都會搭配鮮紅莓或雪藏紅莓嚟整，但因為呢兩種紅莓我都無買到，所以就只好就地取材，用紅莓乾嚟做咗呢個實驗啦！

材料：
低筋麵粉      200 克
裸麥粉          50 克
泡打粉          1 茶匙
梳打粉          1/4 茶匙
鹽                  1/8 茶匙
雞蛋              1 隻
糖                  60 克
鮮搾橙汁      140 毫升
橙皮茸          2 - 3 茶匙
君度橙酒      1 湯匙
橄欖油          60 毫升
紅莓乾          適量
杏仁片          適量

- 將所有粉類及鹽過篩 3 次，之後混合均勻。

- 雞蛋、糖、橙汁、橙皮茸、橙酒同油放攪拌兜內，用電動打蛋器以低速拌勻。

- 將所有粉類及紅莓乾加入混合物內，繼續用電動打蛋器以低速攪拌，當所有材料
  都混合好之後就停止攪拌。

- 將麵糊倒入紙模內，再喺麵糊上灑上少少預先焗香嘅杏仁片。

- 放入已預熱至 180 °C 嘅焗爐內，焗約 20 分鐘便可出爐。

以上材料份量可做 8 個中 size muffin 。

        都幾成功喎，好香濃橙味，焗緊果時仲香濃呢！鬆餅都做得好鬆軟，唔會死死實咁。不過唔知係因為橙味太濃呀，定係裸麥粉用得唔夠，唔係好覺有裸麥味道，或者下次試吓將裸麥粉嘅份量加多少少，睇吓會唔會好啲。但今次就食到裸麥粉嘅濕潤感覺。

Notes：
- 杏仁片必須預先焗香，可用 180 °C 焗約 6 - 8 分鐘。

- 攪拌麵糊時，當所有材料一混合好就要立即停止攪拌，以免過度攪拌致起筋，令
  鬆餅唔夠鬆軟。

- 如果無裸麥粉的話，可直接用 250 克低筋麵粉。

- 可用任何植物油代替橄欖油。