草莓果醬曲奇 Strawberry Jam Cookies

        星期三果日整咗士多啤梨果醬曲奇，整呢個曲奇都可謂集各家之大成，綜合咗 3 個食譜而整出嚟嘅。坦白講，所謂 "集各家之大成"，其實之前係無諗過咁做 o架，之所以會咁做，完全係因為自己嘅老人癡呆發作所致！

        其實一早已經決定咗跟 Vanlily 個果醬曲奇食譜整 o架喇，佢嘅做法係要先將牛油放軟再加糖粉打發，到萬事俱備，量好哂料，準備好哂所有嘢，先至發覺自已完全無咗件事要拎嚿牛油出嚟室溫放軟！！依家咁凍嘅天氣，幾時等到佢軟身呀，試過放入微波爐內輕輕加熱都唔係好得，太高溫又驚溶鬼咗，所以唔理咁多，照樣用電動打蛋器打發，點知原來係唔得嘅，打打吓啲糖霜同牛油混合到變咗整 scone 果種麵包糠碎粒狀，於是就唯有將錯就錯，改為跟 Rachel 本《為您做甜品》裡面個紅莓夾心曲奇嚟整，因為佢個做法正正就係要將粉類同牛油整成麵包糠碎粒。

        一般嘅果醬曲奇都係喺已經焗好嘅曲奇餅上搽上果醬，然後將兩塊餅黐埋一齊，Vanlily 同 Rachel 佢哋兩個嘅做法都係咁樣。但由於我啲曲奇有部份係要嚟送俾人，但又唔可以即刻送出，不但怕啲果醬會變壞，又驚啲果醬因為軟身嘅關係，入袋後喺運送途中會 "必" 哂出嚟，咁就真係嘥心機喇，所以我又再跟第三個食譜嘅做法，將啲果醬搽喺曲奇麵糰上一齊入爐焗，咁就可以令到啲果醬稍為乾身、更加凝固，唔駛怕佢會 "必" 出嚟；同埋可以再次蒸發果醬裡面啲水份，咁就可以保存更加耐，一舉兩得，good idea！ 就係咁，反而做出咗小弟嘅自家做法，而且都幾好食呀，呵呵！ 

        個質感唔似平時我食過果啲曲奇咁樣鬆脆，而係有啲似食 scone 咁鬆化，唔知道係咪本身個 texture 就係咁，定係果日天氣實在太濕，擺喺度攤凍時吸咗少少濕氣呢？

材料：
中筋麵粉             100克
杏仁粉                  20克
糖霜                      40克
泡打粉                  1/2茶匙
牛油                      50克
雞蛋                      1隻
士多啤梨果醬      適量

以上材料份量可做約 10 塊直徑 5 cm 嘅曲奇。

- 先將所有粉類過篩 3 次；雞蛋拂打成蛋液；牛油切成細粒。

- 將所有材料 ( 蛋液除外 ) 放入攪拌兜內，用手指將牛油同粉類捽成麵包糠碎粒狀
   ( 可參考 scone 做法嘅相片 )。

- 之後將蛋液逐少加入，用膠刮拌勻成曲奇麵糰。

- 放入雪櫃度雪 3 個鐘或以上。

 

- 麵糰喺雪櫃度拎出嚟後，放喺兩張牛油紙中間，用擀麵棍碾薄。

- 之後用曲奇模 "吸" 出餅形，其中一半需用細模喺中間部份再 "吸" 出一小塊，
  做成通心形狀，然後放上已墊有入爐防黏紙嘅烤盤上。

 

- 喺完整非通心嘅麵糰上搽上適量果醬。

- 將麵糰放入已預熱至 170 °C 嘅焗爐內焗 8 - 10 分鐘即成。

 

- 曲奇出爐後放上放涼架上攤凍。

 

- 之後就可以將通心曲奇放喺搽咗果醬嘅曲奇上面，咁就 OK 啦！

 

今次話哂都係自己一手一腳整曲奇，無 Winnie 幫手，所以指定動作
梗係唔少得嘅，我都想同媽咪一齊分享嘛！

Notes：
- 蛋液份量需視實際情況而有所增減，所以千祈唔好一次過加哂所有蛋液。

- 拌好嘅麵糰最好先分成幾份，未用嘅麵糰繼續留番喺雪櫃度，因為當麵糰擺喺室
  溫時係好易回軟，咁就好難 "吸" 模同移到烤盤上。

- 睇番放喺放涼架上面嘅曲奇，上面果兩排曲奇發得好勁，成隻豬仔咁，反而最下
  面果兩塊就靚好多，因為係用啲剩餘麵糰造成，所以比較薄，相對無發得咁脹，
  但就焗得比較深色，所以麵糰最好碾薄啲。