2010年1月8日星期五

草莓果醬曲奇 Strawberry Jam Cookies

        星期三果日整咗士多啤梨果醬曲奇,整呢個曲奇都可謂集各家之大成,綜合 3 個食譜而整出嘅。坦白講,所謂 "集各家之大成",其實之前係無諗過咁做 o架,之所以會咁做,完全係因為自己嘅老人癡呆發作所致!


        其實一早已經決定咗跟 Vanlily 個果醬曲奇食譜整 o架喇,佢嘅做法係要先將牛油放軟再加糖粉打發,到萬事俱備,量好哂料,準備好哂所有嘢,先至發覺自已完全無件事要拎嚿牛油出嚟室溫放軟!!依家咁凍嘅天氣,幾時等到佢軟身呀,試過放入微波爐內輕輕加熱都唔係好得,太高溫又驚溶鬼咗,所以唔理咁多,照樣用電動打蛋器打發,點知原來係唔得嘅,打打啲糖霜同牛油混合到變咗整 scone 果種麵包糠碎粒狀,於是就唯有將錯就錯,改為跟 Rachel 本《為您做甜品》裡面個紅莓夾心曲奇嚟整,因為佢個做法正正就係要將粉類同牛油整成麵包糠碎粒。


        一般嘅果醬曲奇都係喺已經焗好嘅曲奇餅上搽上果醬,然後將兩塊餅黐埋一齊,Vanlily 同 Rachel 佢哋兩個做法都係咁樣。但由於我啲曲奇有部份係要嚟送俾人,但又唔可以即刻送出,不但怕啲果醬會變壞,又驚啲果醬因為軟身嘅關係,入袋後喺運送途中會 "必" 哂出嚟,咁就真係嘥心機喇,所以我又再跟第三個食譜嘅做法,將啲果醬搽喺曲奇麵糰上一齊入爐焗,咁就可以令到啲果醬稍為乾身、更加凝固,唔駛怕佢會 "必" 出嚟;同埋可以再次蒸發果醬裡面啲水份,咁就可以保存更加耐,一舉兩得,good idea 就係咁,反而做出咗小弟嘅自家做法,而且都幾好食呀,呵呵! 


        個質感唔似平時我食過果啲曲奇咁樣鬆脆,而係有啲似食 scone 咁鬆化,唔知道係咪本身個 texture 就係咁,定係果日天氣實在太濕,擺喺度攤凍時吸咗少少濕氣呢?




材料:
中筋麵粉             100克
杏仁粉                  20克
糖霜                      40克
泡打粉                  1/2茶匙
牛油                      50克
雞蛋                      1隻
士多啤梨果醬      適量


以上材料份量可做10直徑 5 cm 嘅曲奇。



- 先將所有粉類過篩 3 次;雞蛋拂打成蛋液;牛油切成細粒。


- 將所有材料 ( 蛋液除外 ) 放入攪拌兜內,用手指將牛油同粉類捽成麵包糠碎粒狀
   ( 可參考 scone 做法相片 )。


- 之後將蛋液逐少加入,用膠刮拌勻成曲奇麵糰。


- 放入雪櫃度雪 3 個鐘或以上。


 



- 麵糰雪櫃度拎出嚟後,放喺兩張牛油紙中間,用擀麵棍碾薄。


- 之後用曲奇模 "吸" 出餅形,其中一半需用細模喺中間部份再 "吸" 出一小塊,
  做成通心形狀,然後放上已墊有入爐防黏紙嘅烤盤上


 


- 喺完整非通心嘅麵糰上搽上適量果醬。


- 將麵糰放入已預熱至 170 °C 嘅焗爐內焗 8 - 10 分鐘即成。


 



- 曲奇出爐後放上放涼架上攤凍。


 



- 之後就可以將通心曲奇放喺搽咗果醬嘅曲奇上面,咁就 OK 啦!


 



今次話哂都係自己一手一腳整曲奇,無 Winnie 幫手,所以指定動作
梗係唔少得嘅,我都想同媽咪一齊分享嘛!




Notes:
- 蛋液份量需視實際情況而有所增減,所以千祈唔好一次過加哂所有蛋液。


- 拌好麵糰最好先分成幾份,未用麵糰繼續留番喺雪櫃度,因為當麵糰擺喺室
  溫時係好易回軟,咁就好難 "吸" 模同移到烤盤上。


- 睇番放喺放涼架上面嘅曲奇,上面果兩排曲奇發得好勁,成隻豬仔咁,反而最下
  面果兩塊就靚好多,因為係用啲剩餘麵糰造成,所以比較薄,相對無發得咁脹,
  但就焗得比較深色,所以麵糰最好碾薄啲。


6 則留言:

  1. 好靚喎
    [版主回覆01/11/2010 13:27:00]        多謝呀!

    回覆刪除
  2. 好靚呀!!我整過好多次都唔成功
    [版主回覆01/11/2010 13:28:00]        唔成功?照計無乜特別技巧喎!妳係點唔成功法呀?

    回覆刪除
  3. 個餅唔好味呀!!!!!好餅乾唔曲奇呀!!!
    [版主回覆01/11/2010 13:58:00]         妳意思係唔夠鬆脆定係唔夠香呀?

    回覆刪除
  4. 唔脆又唔香,加上好乾好孩口 我見你呢個應該係咪甜甜地?都應該幾鬆脆??
    [版主回覆01/11/2010 14:39:00]        好似我篇 blog 咁講,係鬆化而唔係鬆脆,我都唔知係個食譜係咁定係整果日天氣真係太濕,攤凍時吸 咗濕氣!         我 諗 可能係牛油問題,所以唔香又唔脆!

    回覆刪除
  5. 無鹽牛油唔岩洗咩???????
    [版主回覆01/11/2010 15:58:00]        唔係話無鹽牛油唔 啱用,而係牌子問題!         如果妳唔介意買貴價貨的話,我建議妳試 吓用「總統」 (President)或者「銀寶」 (Lurpak)。因為我自已係唔係好食牛肉同乳製品,所以覺得呢兩隻牛油整 嘅糕餅好羶,但我 啲 friend 就覺得好香、好好味。所以我後來試 吓買 喺超市買 啲 cheap 啲 嘅牛油 嚟用,果然乜味都無,反而合我口味!         另外,睇過書講,牛油佔 嘅 份量越多,焗出 嚟 嘅成品越鬆脆,所以點解藍罐曲奇會咁鬆脆,但我自己就頂唔順佢 啲牛油味。

    回覆刪除
  6. 「總統」我都係用緊呢種嫁 只不過好小用黎整曲奇~用黎整餅多 因為咁貴既牛油失手衰咗會好心痛嫁~哈哈~所以我都會拎黎做D有信心既餅~多謝你分享呀!好詳細呀^^咁如果落多D牛油?份量咪要改囉?我都中意食好鬆脆既曲奇
    [版主回覆01/11/2010 19:37:00]        係呀,不過自己改份量又驚影響製成品,所以要揀個好 嘅 recipe 呀!

    回覆刪除