粟米栗子無花果煲佛手瓜

        如果識得運用材料的話，齋湯都可以煲得好好飲，一啲都唔會淡而無味。今晚我就煲咗粟米栗子無花果煲佛手瓜，有咗粟米同栗子呢兩樣材料，就連蜜棗都唔駛落，都一樣咁清甜，如果加埋紅蘿蔔的話，咁就真係甜到漏 lu！

材料：
栗子
粟米
佛手瓜
無花果
南北杏

- 栗子去殼、去衣；粟米剝去綠色外皮及粟米鬚，洗淨備用。

- 佛手瓜先刨皮、洗淨，之後開邊去核，切件待用。

- 南北杏略沖洗；無花果用清水浸軟後洗淨、開邊。

- 將所有材料凍水落煲，之後開火將水煲滾。

- 跟住就依真空煲用法將湯煲好，落鹽調味，完成。

Notes：
- 粟米外皮同粟米鬚其實都有食療效用，可以洗乾淨之後一齊放入煲湯。

- 想湯煲出嚟更加甜，就要記得凍水落料，因為大部份食材嘅甜味都係溶喺凍水度
  ，尤其係煲齋湯，呢個方法好好 o架！