2008年10月30日星期四

Croissant



        原來港灣豪庭裡西間惠康都有 La Rose Noire 喎,睇吓有咩食先!依,croissant (牛角酥) 做緊特價喎,試吓先!


       個樣睇落去都已經同一般嘅牛角酥唔同,好實淨、好重咁樣,食落口都唔會好似普通牛角酥 "一浸紙" 咁feel,咬落去同樣好實在,好有層次感,而且唔會有好濃嘅牛油味,其他人可能會嫌佢唔夠香,我就梗係寧願佢無乜牛油味啦!


        Hm…… 唔錯,唔錯。


2008年10月27日星期一

魚湯米線


        因為煮好魚湯浸絲瓜,所以順便煮埋米線。


材料:
魚湯
米線
蔥花
麻油


        米線預先煲熟,熄火焗腍,跟住過冷河,再放入滾緊嘅魚湯裡面煮一陣,等佢入味,上碗後灑上蔥花、麻油,一碗熱辣辣嘅魚湯米線就煮好啦!啲魚湯好鮮甜,米線又好爽好滑,正!


魚湯浸絲瓜

        醒目嘅你,一睇就知我係睇完「蘇 Good」之後,跟阿蘇煮呢個餸啦。



材料:
絲瓜
紅衫魚
薑片



        紅衫魚洗淨後,油鑊度放薑片,將魚煎香。


 



        之後就加水煲成魚湯,當煲成奶白色後,就可以加入絲瓜,再加鹽調味。我都好似阿蘇咁樣,無開火煮啲絲瓜,就咁熄火冚鑊蓋焗熟佢,果然爽脆好食。


        我特登落多少少水去煲魚湯,因為可以嚟煮魚湯米線嘛,都係學阿蘇,照板煮碗http://hk.myblog.yahoo.com/kestrelkwan/article?new=1&mid=340


 


 


2008年10月25日星期六

恐龍蛋


        之前喺有線新知台《60分鐘真人蘇》其中一集睇到阿蘇介紹北角同銅鑼灣嘅生果店賣恐龍蛋同綠寶石,阿蘇一味贊不絕口咁話好好食 ( 有時都懷疑佢係咪做媒!) 不過賣好貴一個 (exactly 幾錢就真係唔記得喇 ,好似話係幾十蚊一個),所以心諗都係得個睇字,一來我實唔捨得買嚟試,二來要長途跋涉咁過到去港島果邊先有得賣,唉,慳啲啦!


       點知最近周街都有得賣,連蝴蝶村街市都有,而且又唔貴,$11有 5 個,不過我諗未必係美國原裝入口,係內地貨色先至可以賣咁平。


        張 lable 上面英文 gramma 好似有錯,應該係 "Product of USA" 而唔係 "Produce of USA",所以我懷疑係大陸貨,佢哋想整張 lable 扮美國入口,但又串錯字,唔通啲美國佬都串錯?或者係我英文水平差啦,真係有呢種寫法都唔定呀!


        唔緊要啦,就買嚟試吓有幾好食。初初仲以為係一啲新品種嘅水果,原來都係布冧 / 李之類嘅物體,不過就完全唔同食法,好清甜,好爽脆,唔似布冧咁酸酸哋、腍腍哋,好食好多,我諗我以後都唔會再買布冧 食,改食恐龍蛋喇!


2008年10月24日星期五

Mochacinno & Vienna

        之前去過麥當奴度買新地食,估唔到買一杯 "幾蚊雞" 嘅雪糕都會送番 4 張 McCafe coupon,而每張 coupon 仲可以買到 2 杯咖啡,即合共 8杯,嘩,一個人點飲咁多杯咖啡呀,而且又就快到期,於是我拎起 1 張後,剩低果啲就俾咗我老豆同 Lily。每張 coupon可以用半價 / 平 $8去買咖啡,既然我都未試過 McCafe 咖啡,趁有 coupon 就去咗試試。


        呢杯係 Mocchacinno,個 waiter 一送到埋嚟,我就即刻 "依" 咗一聲,因為無諗過原來個 appearence 係同買廣告一樣,面頭用可可粉做成個 "M" 字嘜頭,以為淨係買廣告先至做成咁靚。


        當你見到碟上面有包咖啡糖喺度,就梗係下意識咁立即落糖,趁佢熱緊果陣會易啲將糖攪溶,點知原來呢個動作係大錯特錯,因為杯咖啡俾我攪到好甜,唔知係因為上面啲 cream / evaporated milk 已經有甜味,定係杯咖啡一早已經加咗糖呢?所以我其實呢杯咖啡係已經落咗雙重糖!咖啡就當然香濃啦,不過就無乜可可味,如果再濃啲就更加好。飲完之後,隻杯裡面仲黏滿哂啲咖啡油。


        一個禮拜後,用埋張 coupon 去試吓其他款式,今次我就 order 咗杯 Vienna,不過,個waitress 就好得意,同我有以下嘅對話:


我:「唔該,我要杯 Vienna 呀。」


佢同我講:「 Vienna下面係齋啡嚟 o架。」


我話:「唔緊要,佢上面有 cream 呀嘛!」


跟住佢話:「係呀,不過下面係齋啡嚟 o架噃!」


我答:「無問題 ……………………」


        我心諗,妳做乜要咁強調下面係齋啡嚟,所有咖啡都係用齋啡沖出嚟 o架啦,好似想用齋啡嚟 " 凶 " 我咁,等我驚咗唔敢再 order 杯 Vienna咩,直奇怪!


        由於元朗間 MacDonald 係有幾層嘅,下面果層都無哂位,我唯有上到去最頂層,於是我就同個 waitress 講,麻煩佢搵人送上樓上。坐低無幾耐,杯 Vienna 送到嚟啦,個 outlook 都唔錯,幾靚呀,我就即刻同佢影咗張大特寫: 



        今次見到佢無俾咖啡糖我,我就知道上面啲 cream 一定會好甜,所以我唯有破壞佢個咁靚嘅賣相,攪勻杯咖啡先至飲。不過原來啲 cream 都唔容易攪,攪咗好耐都仲係浮面,心急嘅我就唔理咁多,一啖飲落去試吓味先,果然不出我所料,啲 cream 真係好甜,同埋好凍,飲極都未飲到熱咖啡,於是就唯有狂攪,直至黑白兩色完全混合為止,當然,個賣相就………… 攪勻後杯咖啡就好飲好多,不過就俾啲 cream 整到凍哂,我一向都比較鍾情熱飲多過凍飲,所以就唔係咁鍾意。


        飲飲吓,我就估到點解個 waitress 會咁強調杯 Vienna下面係齋啡啦,可能因為佢哋大部份嘅咖啡都好似上次我飲果杯 Mochaccino 咁,一早已經落好哂糖同奶,而呢杯 Vienna 除咗面頭啲 cream 外,下面啲咖啡就真係乜都無落,名符其實係齋啡,我諗佢都係盡責咁提醒我。


菠蘿雙色朱古力卷 & 意式洋蔥磨菇薄餅

        有去開山崎買麵包嘅朋友都應該知道,佢哋每個月都會有唔同款式嘅麵包做優惠,$13 兩個果隻呢,今次喺商場間山崎就睇中咗呢兩款啦。


        呢個係菠蘿雙色朱古力卷,我諗係新出啩,我咁耐都未見過,你哋話似唔似一隻肥嘟嘟嘅朱古力象拔蚌呀!面頭就當然係菠蘿皮啦。如果啲麵包係喺屋企食的話,我例牌都會放入烤爐度,烘到熱辣辣先至食,所以個菠蘿皮就非常香脆。


 



        咬開個包,原來裡面啲朱古力係會流出嚟 o架!可能係因為我將佢烘熱先至有咁嘅效果,即買即食嘅話,啲朱古力可能係唔會流出嚟。


 




        至於呢個就係意式洋蔥磨菇薄餅,之前我都食過 o架啦,媽咪喺度果陣都有試過,都覺得幾好食。你話呢個包又似唔似一條大甘荀呢。


 



        咬開個包之後,裡面啲餡係洋蔥、磨菇、香草同茄醬,好香濃嘅蕃茄味,好有西餐 feel,不過啲餡就好似少


        食完兩隻咁大嘅 "象拔蚌" 同 "紅蘿蔔",飲埋杯茶就已經夠哂飽 lu。


2008年10月22日星期三

黃金花生湯圓



        見到個袋面寫住 " 流沙餡 ",加埋幅相又好吸引,就決定買嚟試吓,睇吓係咪真係好似新星酒家啲流沙包咁 " 流 " 先。


 



        我磨好啲薑茸,加埋片糖煲薑汁湯水。


 



        呢碗湯圓顏色好靚,南瓜皮嘅顏色好金黃,啲試吓味先,睇啲餡會唔會流出


 



        "車",呃人嘅,一啲都無流到出嚟。失望!不過味道都 OK 嘅。


2008年10月20日星期一

橄欖油做特價

        今日係惠康買完豬肉就無嘢買啦,所以就兜咗個圈,睇吓有無嘢減價又啱用先!


        點知真係俾我吼到 "荀盤" 喎,隻保得橄欖油減到好平,1L 孖裝都只係賣 $99.9,叫做平均每支都唔駛 $50囉。



        於是就即刻睇吓其他牌子做比較,發覺真係幾平,隻 First Choice都唔平得幾多,不過佢就唔係意大利做,係西班牙做嘅 (其實邊度嘅出品會靚啲我都唔係咁清楚,不過直覺上覺得意大利好似 high 啲,哈哈!) 我再睇番保得嘅成份,原來有 20% 係 Extra Virgin 嘅橄欖油,80% 係普通橄欖油 (咁即係比起純普通橄欖油又 high 啲啦 ),所以就決定買嚟試吓 O 唔OK囉,加上屋企不嬲都係用緊保得嘅橄欖葵花籽油 / 橄欖芥花籽油,所以都應該有保證嘅。


        之前都未試過用純正橄欖油 (都係用之前所講嘅橄欖葵花籽油 / 橄欖芥花籽油之類調和油,因為平啲嘛),遲吓用嚟煮意粉同整麵包,睇吓係咪真係特別香啲先!


 


2008年10月19日星期日

$10 隻咖啡杯

        噚日喺元朗間老人中心教完唱歌之後,見仲有大把時間,於是就去咗附近間吉之島 $10店行吓。


        因為近排開始寫 blog,會經常 upload啲煮嘢食嘅相上,咁就當然唔少得要用到唔同嘅餐具啦,所以呢排都有留意吓有無啲平平哋又靚靚嘅餐具。今日就見到隻咖啡杯都幾別緻,花紋唔會太俗,清清哋都幾好,顏色又係我鍾意嘅沙杏色系列 o添,而且杯連碟都只係 $10咋 (我見店內有好多杯碟都係分開每隻 $10 咁賣),都好抵啦,仲入得微波爐 o添,所以就決定買咗佢。



        點呀,以咁嘅價錢都 OK啦,其實佢個系列仲有隻深啡色 (exactly就係呢隻色啦),不過就唔同款,係隻 mug,我都好鍾意呀,不過無理由買兩樣差唔多嘢 o架!我諗住淺色嘅杯可以容易啲襯起飲品嘅顏色,同埋連埋隻碟一套,隻 mug就無啦,所以咪最終揀咗呢隻囉!


 


2008年10月18日星期六

涼瓜炒魚鬆


材料:
涼瓜
鯪魚肉
紅椒
薑茸
蒜茸


調味料:


雞粉
麻油


        又係因為教完琴都已經夜啦,所以專登買啲易洗易煮嘅苦涼瓜同鯪魚肉做今晚餸。


        媽咪教落,鯪魚肉買番嚟之後,係要自己略略再調味,否則就唔夠味 o架啦,所以我每次都落少少鹽、糖、胡椒粉、生抽、粟粉去調味;苦瓜洗淨、去瓤,之後切薄片,咁就會易熟啲同爽口啲。攪掂哂準備功夫後,先將鯪魚肉略為煎一煎,煎到兩面都有少少金黃色就 OK,之後盛起、切件備用;紅椒、薑茸同蒜茸落油鑊爆香,之後加埋啲涼瓜落去一齊炒,贊少少水,冚鑊蓋焗一焗,見有少少腍身就可以加埋已經煎香鯪魚肉,加入調味料,兜幾兜,攪掂!


2008年10月15日星期三

鐵觀音雙色蕃薯飯


材料:
鐵觀音茶葉
黃心蕃薯
紫心蕃薯


        好簡單咋,同平時用飯煲煮飯一模一樣,只係將已經泡好鐵觀音茶代替煮米水,再喺米面鋪上切粒蕃薯 (唔駛預先烚熟啲蕃薯 o架,就咁放喺米面都會煲熟 o架啦),跟住一按煮飯制就可以等食啦!


        啲飯食落有茶香,而且仲有蕃薯嘅清甜味,真係唔駛要餸都可以就咁空白食哂碗飯。



P.S. 因為第一幅相用咗閃光燈影,所以比較白同光,睇唔到啲飯嘅真正顏色,所以 post 多咗無用閃光燈嘅相俾你哋睇吓帶有茶色嘅飯。


五指毛桃茶樹菇花豆湯



材料:
豬腱
紅蘿蔔
花豆
茶樹菇
五指毛桃
陳皮
蜜棗



        呢包就係五指毛桃喇!


 



        其實佢係一啲類似木頭、樹幹嘅物體,最特別嘅就係煲完出嘅湯會有一種椰子香味,唔講俾你聽的話,仲以為係椰子煲雞 o添!


 



        五指毛桃嘅食療功效。


        豬腱洗淨、汆水,再過冷河,將血水沖走,咁煲出嘅湯就會清好多;紅蘿蔔刨皮後洗淨,用滾刀切件;花豆洗淨後用水浸過夜;茶樹菇同五指毛桃用水略浸,之後洗淨備用;陳皮用熱水浸軟、去瓤、洗淨;蜜棗略洗備用。水煲滾後,將所有材料全部放入,中火煲十零分鐘度,就放番入真空煲,飲之前再煲多十零分鐘,落鹽調味,飲得!


2008年10月14日星期二

鮮菇豆腐冬瓜茸


材料:
草菇
豆腐
冬瓜
蟹柳
蔥花


調味料:
胡椒粉
雞粉


粟粉
麻油


        因為預早知道喺馬鞍山教完琴返嚟會好晏,但係又要煮飯,所以特別揀咗個易煮快熟餸。


        草菇先洗淨、開邊,然後汆水去啲 "o翕" 味;買豆腐時最好就買腍豆腐,因為會比硬豆腐易煮爛;冬瓜批皮、去瓤後刨成冬瓜茸 (呢個步驟都唔少嘢,刨到我手都軟埋,都幾攰呀);蟹柳就切細粒。先將冬瓜茸落鑊煮到收乾一半水份 (我係將啲冬瓜茸直接刨落個鑊度,所以成鑊都係冬瓜汁,好似湯咁),加入胡椒粉,兜勻,然後就可以好快手啦,因為其他材料都係熟嘅啦。加入豆腐煮番熱後,就倒埋草菇同蟹柳落去,加埋其他調味料煮一煮就用粟粉埋一個薄薄嘅玻璃芡,最後灑上蔥花同麻油,咁就可以上碟,影番張靚相啦 (雖然我啲攝影技術 "麻麻")。


        呢個餸我都幾滿意呀,因為除咗味道唔差之外,其實我係無呢個食譜喺手,純粹係自己憑空想像嚟,試吓咁嘅材料配搭係唔係 OK,睇吓可唔可以煮到我心目中嘅味道出嚟 o架咋!


Sundried Tomato Panini

        買完疏乎厘盅之後,就上咗去惠康兜個圈,買定啲麵包聽日晏晝做 lunch。行到去賣麵包攤位,見到有個專櫃係專賣歐陸式麵包,我當然即刻行過去睇一睇啦,果度都有啲好傳統嘅歐陸式麵包,如:法包、田園包、裸麥包……突然俾我發現到一個好少見到嘅麵包,成個都係橙紅色,好特別,係好奇心嘅驅使下,就梗係即刻拎上手睇吓係乜傢伙同用咩材料做啦。



        原來呢個就係 Lily成日掛係口唇邊嘅Panini,佢之所以全個都橙紅色,係因為用咗天然晒乾嘅蕃茄做主要材料 (你睇到果啲深色嘅物體就係 sundried tomato 啦),加埋啲香草落去,真係香到暈呀!不過食落就覺得有啲唔係好夠味 (連不嘢口味都好淡我都話唔夠味就真係淡啲啦),落番多少少鹽可能會好味啲。


        我睇番個包裝袋,原來佢係寫住 "Parini" 而唔係 "Panini",心諗:究竟係佢打錯字呀,定係 Lily講錯咗俾我聽呢?於是我就上網查一查。點知當我喺 Yahoo度一 打入 "Panini, bread",就已經搵到出產呢個麵包間公司 La Rose Noire (意思係 「黑玫瑰」The Black Rose),唔通淨係得佢哋有出呢種麵包!?無理由一 search就即刻 search埋呢間公司咯,咁就順便睇吓佢哋個網頁啦,發覺原來佢哋係專喺牛奶公司集團屬下嘅超市有專櫃,可能都係牛奶公司集團旗下嘅一間公司呢。


 


P.S. 呢度有兩條 link係啲網友介紹 La Rose Noire 產品:


1. http://hk.myblog.yahoo.com/vanlily-breadessert/article?mid=19530


2. http://www.pbasehk.com/Macy/Macy572


 


疏乎厘杯

        今日要去馬鞍山新港城教琴,但係早好多到,而學生又未返到屋企,所以就商場度行一陣,點只俾我執到平喎!


        行行吓見到一間與眾不同舖頭叫做「Concept」,簡直可以用新潮缸瓦舖嚟形容,佢裡面賣嘢全部都係杯杯碟碟等餐具,我隔住玻璃望入去,見到好多白碗碟,心諗,唔知有無疏乎厘杯呢,即管入去睇吓啦,點知真係有噃,仲好平 o添,咁啱星期日問過明仔,吉之島 $10店疏乎厘杯抵唔抵買,佢話應該抵,喺 bakery shop 度買應該唔只 $10,本來疊埋心水喺吉之島 $10店度買 o架啦,點知呢度仲平,每個 $7 咋,所以我即刻買咗 4 隻,總共都係 $28,咁嘅價錢喺第二度可能只係買到兩個咋,如果唔係之後要教琴的話,我仲會買埋其他碗碟,因為佢啲碗碟都好鬼死靚,尤其是啲日式碗碟,都係十零蚊隻咋,係我屋企附近個商場間家品店買嘅都係差唔多依個價錢,但就只係一啲唔靚嘅普通貨色,有啲仲好鬼貴 o添呀!等我下次再去教琴時再入啲貨先。



2008年10月13日星期一

2008年10月12日星期日

Mai Thai Cuisine @ 諾士佛階

       日放工後原本係約咗明仔同佢個 friend 阿月去銅鑼灣間Bakery Shop度睇啲整西點嘅材料,但係佢 check 過間嘢 6:00pm 就閂門,見咁鬼早收,我哋會好趕,所以佢就 SMS 我,叫我改去尖沙咀。陪佢哋行咗一陣街,跟住就去咗美麗華商場入面嘅諾士佛階間 Mai Thai Cuisine 度食嘢。




        由於我好少出街食,所以我多數都係 "就" 人哋口味同選擇,返正我都係一個唔識食嘅人,幾乎食得落肚嘅就好食 o架啦,所以點菜呢啲咁傷腦筋嘅工作多數都唔駛我做,加上明仔之前已經喺度食過一次,呢個重任就梗係交俾佢嚟負責啦!佢總共點咗四個餸、一個飯、一個包。



        碟炒青口香噴噴,好惹味,我好鍾意佢有一種好特別嘅香味,唔知係咪新鮮金不換嘅味道呢?明仔就一味話好辣,但係我就唔覺辣,如果再辣啲仲好味呀,可能我比較食得辣啦。


 



        呢碟串燒雞沙爹就無乜特別,而且個醬汁又細碗,我都唔係幾好意思猛咁 "拔",不過阿月個提議都幾好,佢叫我哋不如落啲青口汁仲好啦,果然成條串燒沙爹即刻唔同哂風味。


 



        炸烤雞就更加無乜驚喜,同中菜裡面嘅炸子雞無乜分別,只係無咗南乳味同多咗個甜酸醬,同埋我食果舊疑似雞脾嘅物體就唔係好熟,仲有少少粉紅色,就係因為咁,所以食落口就好滑囉!


       



        至於呢碟蝦膏炒飯就唔係好夠味,學明仔話齋,應該係叫佢上次食香葉肉碎炒飯會好食啲,不過反而呢碟飯俾到我少少驚喜喎。


        因為食咗咁多濃味嘢,所以我就夾青瓜絲嚟食,諗住清一清個口,點知一食落去,覺得非常之好食,酸酸哋,好醒胃,但係就覺得好奇怪,點解一啲青瓜味都無呢,後來發覺應該係泰國青芒果,我同佢哋講咗之後,佢哋就即刻試吓,兩條友仔仲話正 o添,明仔就仲衰,佢話以為只係用嚟伴碟青瓜,所以唔吼佢,早知我就唔出聲,一個人食哂佢啦,哈哈!講笑啫,我都唔係啲獨食嘅人。


 



        碟鐵板黑汁蝦膏炒通菜都幾香,幾惹味,不過就鹹啲,但係我哋食完都唔知邊啲係黑汁!?究竟有無落到都唔知道。


 



        呢個蒜茸包係明仔極力推介,佢話啲蒜茸唔係一般嘅蒜茸醬,而係一粒一粒,即係好似避風塘菜式果隻。個法包都焗得幾脆、幾香口,不過我就覺得肥膩啲啦。


 



        食到最後,當然係要食番個 dessert 先至叫做完整嘅一餐啦,阿月就叫咗個泰式經典甜品椰汁芒果黑糯米,啲糯米好煙韌,啲椰醬就唔係好夠甜,不過勝在佢係熱食嚟,唔係凍食,所以都加番少少分俾佢!


        食完飯,我哋就喺附近行咗一陣,行行吓我就覺得個肚有少少痛痛哋,返到屋企就即刻痾,唔知係咪街外嘢始終較肥膩,加埋飲啲凍水攪到肚瀉,定係食咗果舊唔係好熟嘅雞呢?


2008年10月11日星期六

蒜茸炒油麥菜


材料:
油麥菜
蒜茸
薑茸
雞粉


        其實一碟炒菜都無乜特別,相信好多人都炒得靚過我。之但係對於我嚟講就比較特別,因為我係唔係咁鍾意食炒菜,我比較鍾意食灼菜,因為覺得無咁肥膩同無咁鹹,會清甜啲,但係今日因為已經有一碟比較清嘅蒸肉片,所以想食番一碟較有鑊氣嘅炒菜。另外,呢碟炒菜亦都係我嘅實驗品,點解咁講,係因為我想試吓落少少雞粉落去炒菜,睇吓係咪真係好似廣告裡面咁講會好味啲同翠綠啲。


        味道方面就梗係好味啲啦,都毋用置疑 o架啦,不過就覺得鹹啲,我已經唔係用普通雞粉,而係清然雞粉嚟 o架啦,唔怪得之廣告都話用嚟代替鹽煮餸。至於顏色方面,唔知係咪心理作用,硬係形住真係比起平時炒嘅菜翠綠好多,你哋覺得呢?


榨菜蒸肉片


材料:
瘦肉
榨菜


醃料:
生抽


粟粉
麻油


        呢味餸係我細個果陣時間唔中都會食嘅,又易整、又惹味,我好鍾意食 o架!只需將瘦肉用醃料醃好,加埋啲榨菜一齊蒸熟就 OK,真係話都無咁易!都係懶人菜之一。不過榨菜記得洗淨後要預先切片同浸水大約15分鐘,等佢裡面啲鹹味走咁啲出嚟,如果唔係就會太鹹 o架啦!


2008年10月10日星期五

士多啤梨合桃包

        今晚因為夜返,無時間煮飯,所以返到入嚟屯門之後就早兩個站落車,專登走去海翠坊間 A1 麵包店碰吓運氣,睇吓今晚會唔會俾我買到收舖前嘅特價合桃黑麥包 (收舖做特價時平成 $3 o架 ),我好鍾意食 o架,自從媽咪買過一次俾我食之後,我就立即愛上咗佢,媽咪梗係知道我鍾意食歐陸麵包,所以開咗間 A1 後就買俾我試啦,真係知我者莫若母!


        講番正題先,以我一個咁無運嘅人,點會俾我碰正做特價呀,就算有特價都即刻俾人掃哂啦! (我問過啲 sales 係咪依家已經無再出合桃黑麥包啦,點解嚫都無得賣嘅,佢哋話呢隻包係全店最好買 o架,好多時一出就已經賣哂,叫我可以打定電話俾佢哋預留。嘿,鬼唔知阿媽係女人咩,你估我係 "管家仔" 咩,我係 "窮家仔" 咋,想食好嘢就梗係吼住特價先買 o架啦,唔通叫你哋留咗之後,到買果陣時同佢講依家已經咁夜,你計我特價咩! )  況且今晚仲咁早返到入嚟 (差唔多 8:30pm咋,都未係有太多包開始做特價啦,平時都 9點幾 10點,差唔多閂門先返到 ),係就係有幾舊喺度,不過仲係做緊正價呢!見都無乜其他麵包吸引,本來諗住走啦,點知俾我喺門口個麵包櫃度見到一個好歐陸式麵包,嘩,好吸引呀,成個樣都係我鍾意果隻好粗、好 "嚡颯颯"、好鄉村 feel 嚟,簡直係眼前一亮:



        睇真啲,原來做緊特價 (原本$14,依家$11咋!),仲係 "只限今天" o添,當然二話不說就走去拎起個麵包盤同麵包夾,揀番個比較 "靚仔" 嘅先!於是就好開心咁拎住佢返屋企。呢幅相就係特登影個內餡俾大家睇吓:


        啡啡哋色果啲就係士多啤梨嚟 o架啦,我諗應該係乾果,食落口唔似係新鮮果隻,而一粒粒淡黃色果啲就係我至愛嘅合挑啦。唔 ~~~~~ 外皮煙韌,裡面鬆軟,而且仲好有麥香,真係正! It's really my cup of tea!


        最衰依家已經咁夜啦,如果唔係我一定沖番杯咖啡慢慢嘆。


2008年10月8日星期三

蕃茄薯茸湯配蒜茸包


材料:
蕃茄
薯仔


奧勒崗 (Oregano)
即磨五色胡椒
長法包 (Baguette)
香草蒜茸醬


        都係一個幾易煮嘅湯。薯仔刨皮後切粒,平放於碟上,拎去隔水蒸至腍身,然後趁熱用叉壓爛成薯茸備用 (唔駛太爛,保留粗粒,有啲 o趙頭會好食)。蕃茄洗淨後略為切開幾份,放落攪拌機度打成茄汁同茄茸,然後連薯茸一齊放落煲,加水煲滾後,將所有調味同香草分別加入,就完成咗呢個蕃茄薯茸湯啦。可能因為我落多咗水,所以稀咗少少,於是我就加咗少少藕粉,即時唔同哂,好有湯羹 feel。藕粉係用蓮藕磨粉製成,就好似馬蹄粉一樣,煮好之後會好 "杰身",所以好多時都會用佢嚟打芡或者整甜品。之前係 Li Kien 去完大陸之後買俾我嘅手信之一,一包係已經加入咗糖,可以即沖即食,但呢包就無糖,而且要開火煮,所以擺喺度好耐都未用哂,今次就大派用場啦!呢個西湯加入中式藕粉,咁算唔算係 fusion 湯呢?


        個 Baguette 就梗係唔係我自家出品啦,買返啫,然後自己搽蒜茸醬上去烘 o架咋!我都希望快啲可以用匯豐啲積分換到我嘅心頭好:蒸、烤、焗多功能微波爐,到時我就可以自己焗麵包、蛋糕、曲奇、甜品……,希望下年嘅 catalogue 仲有得換啦!