2008年10月14日星期二

疏乎厘杯

        今日要去馬鞍山新港城教琴,但係早好多到,而學生又未返到屋企,所以就商場度行一陣,點只俾我執到平喎!


        行行吓見到一間與眾不同舖頭叫做「Concept」,簡直可以用新潮缸瓦舖嚟形容,佢裡面賣嘢全部都係杯杯碟碟等餐具,我隔住玻璃望入去,見到好多白碗碟,心諗,唔知有無疏乎厘杯呢,即管入去睇吓啦,點知真係有噃,仲好平 o添,咁啱星期日問過明仔,吉之島 $10店疏乎厘杯抵唔抵買,佢話應該抵,喺 bakery shop 度買應該唔只 $10,本來疊埋心水喺吉之島 $10店度買 o架啦,點知呢度仲平,每個 $7 咋,所以我即刻買咗 4 隻,總共都係 $28,咁嘅價錢喺第二度可能只係買到兩個咋,如果唔係之後要教琴的話,我仲會買埋其他碗碟,因為佢啲碗碟都好鬼死靚,尤其是啲日式碗碟,都係十零蚊隻咋,係我屋企附近個商場間家品店買嘅都係差唔多依個價錢,但就只係一啲唔靚嘅普通貨色,有啲仲好鬼貴 o添呀!等我下次再去教琴時再入啲貨先。



2 則留言:

  1. Hi!Kestrel請問間「Concept」係邊到呀?謝謝~~~
    [版主回覆10/18/2011 01:20:22]間舖 "摺" 咗喇!

    回覆刪除
  2. 緊張大師-小女人2012年3月9日 上午8:22

    我早些識你就好啦,我家中這些全新既杯多得不停係咁送朋友,我已送出好多,但現在好似仲有大約二十隻左右.咁朋友可以省小小錢,我等下俾一些照片你,因為我有好多焗盤全都係靚料,但太多用唔到咁多.你有興趣送你,因為我好多焗餅的朋友全部都送晒給她們.
    [緊張大師-小女人回覆04/02/2012 11:14:49]我們共同努力啦,你真係好孝順,替你爸爸開心有個咁乖既仔..佛在心中只要我們言行正當,無受五戒,不是佛教徒都無所謂的,對嗎?
    [版主回覆04/02/2012 03:12:51]我同妳一樣都只係皈依三寶,並無受五戒,我怕守唔到「盜」同「妄」!
    我一個禮拜頂多只係食或煮肉兩次o架咋,多數係為咗我老竇而煮肉,主要都係食瓜菜多。
    [緊張大師-小女人回覆04/01/2012 20:21:30]我收到了,第一不用謝只希望你合用,第二,我謝你,因為我間屋太細但焗的器皿太多啦.那有朋友要的話是幫了我.我都係佛教徒但我只是歸依三寶沒有受五戒,但我三份二都是吃素,葷只淺嚐一點點,因為老公不准我全素,身體問題關係
    [版主回覆04/01/2012 01:46:30]我將電郵地址post去妳個blog度啦!再次多謝妳呀!
    因為我係佛教徒,所以我唔可以殺生,只可以食 "瞓覺魚" 咋!
    [緊張大師-小女人回覆03/30/2012 22:34:31]其實唔好客氣,咁重要合用,若不合用送你都無用,對嗎?你有電郵嗎?我將手上有的焗盤或其他用品給照片你看,若你合用就用啦,反正全部新未用過.我留了給自己多一套更換就可以.你懂持家都會覺物價貴.我一個星期都會拿一次鮮魚給家人吃,總要吃點鮮魚鮮肉的,你年青人更要營養呀,也要買給你爸爸吃,知嗎.
    [版主回覆03/30/2012 15:28:21]咁我要多謝妳先呀,妳咁好人!
    妳講得無錯,物價真係越來越貴,買條 "瞓覺" 魚閒閒哋都要成二、三十蚊,仲要個size都只係手掌咁大度,夠一個人食咋!所以我好耐都未食過所謂嘅 "新鮮" 喇!
    [緊張大師-小女人回覆03/12/2012 09:01:42]因為我以前在紅磡上班,四周圍都有貼出平野買架,嘩又靚又平,包架車都抵呀,那時又有點錢咪可以買買買.,但間屋越住越細....無地方,唯有送俾整蛋糕既朋友我可以俾照片你睇,你合用就要啦,我都是放在這等有緣人...哈哈.因為全部我自己都會多留一套,以防萬一,因為出去買會貴,現在要精打細算過日子,物價越來越貴呀.生活難.
    [版主回覆03/10/2012 20:29:21]點解妳買咁多又唔要呀!送哂俾人咪好可惜!
    我啱啱先打爛咗一隻,激到我死,因為我每年入凍後就手腳非常冰冷,好多時洗嘢嗰陣都凍到無知覺,所以冬天成日打爛碗碟!!

    回覆刪除