疏乎厘杯

        今日要去馬鞍山新港城教琴，但係早咗好多到，而學生又未返到屋企，所以就喺商場度行咗一陣，點只俾我執到平喎！

        行行吓見到一間與眾不同嘅舖頭叫做「Concept」，簡直可以用新潮缸瓦舖嚟形容，佢裡面賣嘅嘢全部都係杯杯碟碟等餐具，我隔住玻璃望入去，見到好多白碗碟，心諗，唔知有無疏乎厘杯呢，即管入去睇吓啦，點知真係有噃，仲好平 o添，咁啱星期日問過明仔，吉之島 $10店啲疏乎厘杯抵唔抵買，佢話應該抵，喺 bakery shop 度買應該唔只 $10，本來疊埋心水喺吉之島 $10店度買 o架啦，點知呢度仲平，每個 $7 咋，所以我即刻買咗 4 隻，總共都係 $28，咁嘅價錢喺第二度可能只係買到兩個咋，如果唔係之後要教琴的話，我仲會買埋其他碗碟，因為佢啲碗碟都好鬼死靚，尤其是啲日式碗碟，都係十零蚊隻咋，係我屋企附近個商場間家品店買嘅都係差唔多依個價錢，但就只係一啲唔靚嘅普通貨色，有啲仲好鬼貴 o添呀！等我下次再去教琴時再入啲貨先。