今日要去馬鞍山度教琴，所以中途要喺城門隧道轉車站落車轉搭另一條線，當我一落車時，即刻有一種好不安嘅感覺，加上噚日天色又唔好，成朝都黑沉沉咁，所以果種唔開心嘅感覺仲強烈 (我本身係一個不嬲都好受天色影響嘅人嚟嘅)。
我好少喺呢個站轉車，因為多數要去嘅地方都係一程車就到，唔駛轉車。記得對上一次喺呢個站轉車已經係一年前有多嘅事，果次係阿馳陪我一齊去大圍富山殮房，所以今日當我一落車時就即刻諗番起哂當日嘅情景，其實我根本係無刻意去諗 o架，但係就唔知點解一幕又一幕咁喺我個腦度不斷湧現，完全控制唔到，諗吓諗吓，就連之前啲差人上到嚟屋企落口供嘅情形都完全一清二楚咁 "標" 哂出嚟，真係好心痛，好心痛，點解啲回憶咁易返番哂嚟 o架，其實我都己經差唔多唔記得咁滯 o架啦！點解硬係要俾我諗番起！？唔通真係好似媽咪之前所講，起碼都有好幾年唔開心？
媽咪話過俾我聽，當年婆婆走嘅時候，佢都傷心咗好一段日子，即使後來大個咗、結埋婚都間唔中會諗番起。Gordon都話過俾我聽，啲專家做過研究，知道人係要最少四年時間先至可以將一啲唔開心嘅情緒平伏過嚟，睇嚟都未必一定，話唔定依世都放唔低都未定。
喺六道輪迴中俾你做番人都唔係一件好事，只係比起其餘五道較好。做人始終有思想感情，有七情六慾，識得痛苦傷心，唔怪得之佛教係主張了脫生死，免墮六道輪迴之苦。
要走嘅人，當然會唔開心、唔捨得身邊人，但係留番喺度嘅人就比起要走嘅人更痛苦，所以睇到《家好月圓》大結局果一集，Jo鮑為荷媽許願時，身邊人都覺得 Jo鮑喺度亂 o翕嘢，但係我當時嘅反應係：嘩，乜Jo鮑對荷媽咁好 o架，荷媽真係好幸福！
「我身體比你好，你死得比我早！」
呢句說話係自媽咪離開咗之後，依年幾以來我不斷同自己講嘅嘢，雖然媽咪離開咗我，但係佢始終比我幸福，唔駛長時間傷心，如果掉番轉係我走先過佢，我知佢一定比我依家更加傷心，更加心痛，因為喺佢臨走前的一段時間，見到我為咗佢瘦咗咁多，佢都開口同我講：「見到你為咗我攪到咁瘦，阿媽好心痛呀！」叫我以後要好好照顧自己，可想而知，若果係白頭人送黑頭人嘅情況會係點…………
沒有留言:
發佈留言