Little Mermaid Bakery

        今日要去半山羅便臣道教琴，到咗中環之後，突然間覺得肚餓，於是就去咗 IFC 裡面間 City Super 度睇吓有咩啱食，次次行親 City Super 都俾佢裡面果間 Little Mermaid 麵包店傳出嚟嘅麵包香味吸引住，但係以往因為唔係肚餓住嚟行，加上佢賣嘅麵包都唔平，仲幾貴 o添 o架，所以一真都不為所動。點知呢次卒之 "中招" 啦，因為肚餓緊，所以啲麵包香味特別濃，特別吸引，於是就把心一橫，人一世物一世，就試一次咁多啦，最後就忍痛地買咗個合桃包，因為係新鮮出爐，加上價錢算係全店中平的一種 (但其實都唔平，比一般菠蘿包嘅 size 仲要細啲啲，都要成 $11個呀)。

        果然 "檸些bu筒"，個包嘅 texture 比一般麵包店嘅包更細密、更軟熟，而且啲合桃仲好鬆脆 o添，從來都未試過食到蛋糕或者麵包裡面嘅合桃係脆嘅，果然物有所值，唔怪之得蘇施黃喺度買咗差唔多成廿個法包仔返屋企 BBQ 啦，喺電視節目度佢都話呢度啲麵包好好食。啲法包仔係全店最平嘅包，但都要 $6個，咁阿蘇咪即係淨買包都差唔多買咗成 $120！！ 唔怪之得佢燒一次嘢食要洗成三千幾蚊囉！

P.S.  因為無帶相機出街，所以影唔到個合桃包嘅真身俾大家睇。