薯仔包

        呢個薯仔包同樣係「黑麥」嘅出品，當然，我能夠食到 「Pumpernickel 」啲咁正嘅麵包，梗係要多謝表妹 Lily，唯有佢買俾我食我先至有機會食到佢地嘅出品，皆因無論係金鐘抑或係天后舖，都好唔就腳，所以我較難有機會親自去買嚟食，除咗上次約咗 Winnie 聽 concert 前無聊周街逛先至特登走去搵呢間舖。

        我習慣咗將啲麵包焗番熱嚟食，呢次都唔例外，不過今次我又學到嘢啦，就係先喺麵包上面灑少少水，然後用錫紙包住嚟焗，果然無之前咁乾身，甚至焗到脆口，仍然保持鬆軟，好食好多，所以即使係雪咗喺冰箱嘅麵包，焗熱之後同剛出爐嘅麵包都乜分別，一樣熱辣辣，好吸引，呢個方法係喺學生屋企睇到本教整麵包嘅書度學番嚟嘅。

       講番個包，因為落咗香草，焗緊果陣都已經聞到好香，到食果陣就更加唔駛講啦，簡直係香到飛起，加上面頭嘅洋蔥，就香上加香，而且個包嘅 texture 係我鍾意食嘅硬包 (三哥仔將之形容為 "石頭" )，所以直情係我嘅 favourite 啦！不過唔知點解，我食極都食唔到有薯仔，但係我記得上次 Lily 俾過少少我試過，係好明顯有薯絲喺入面，但今次就無，唔知係 Lily 今次講錯咗個名俾我聽呀、店員俾錯咗包佢呀、定抑或個師傅唔記得落薯仔呢？不過無所謂啦，反正個包都一樣咁好食，如果媽咪喺度就好啦，我哋兩個可以一齊食，個包肯定仲好食呀！