2010年2月26日星期五

歐洲羅賓

        睇到個標題,你哋唔好以為我呢篇 blog 係講一個歐洲佬呀!其實 「羅賓」係百合花嘅,係老豆早前喺農場拎返嚟做年花 o架。



百合花開得又大又靚,差唔多有我個頭咁大呀!


 



所以要用個座地花樽先可以承托得起成扎花。


        老豆話,唔係好記得「羅賓」係捷克定比利時嘅,不過,一句講哂,一定係貴價花囉!


2010年2月23日星期二

送禮 XO 醬

         眨吓眼,葉太返嚟香港都差唔多兩個月喇,星期四就會飛返加拿大,所以今日專登約佢出嚟飲下午茶,同佢拜年之餘,順便同佢餞行,當然會帶埋伴手禮啦,就係之前同 Louisa 及 Winnie 一齊整XO




個樽本身都好精緻、好靚,加上一條絲帶,綁個蝴蝶結已經好大體。

   
        

講起上嚟,我都要喺度再次多謝老友 Louisa,因為原本諗住反正大家都有興趣整 XO 醬,咁就初三果日一齊整啦,點知佢又唔駛我出料,又唔肯收番我錢,知道我要嚟送禮,仲割愛俾個咁靚嘅玻璃樽我 o添,真係幾百個唔好意思呀! 好啦,等閒要整番多嘢食俾佢先得喇!今日就請佢食新鮮即製蜜糖豆渣曲奇先啦!

蜜糖豆渣曲奇 Honey Soybean Fiber Cookie

        初九果日因為要整 crème brûlée,所以要預早整定好豆漿代替牛奶嚟用,整完豆漿就當然會有豆渣啦,咁又係時候要幫佢哋搵出路喇,今次就揀咗個和子食譜,無論係材料定做法到非常簡單,有留起豆渣嘅朋友,啲跟住整啦,好好食 o架!



材料:
豆渣      100 克
蜜糖      40 克


以上材料份量可做曲奇 8 塊。


食譜係嚟自櫻井景子嘅《和菓子‧和甘味 — 秋冬篇》。



 



- 將豆渣同蜜糖拌勻。


- 舀起 1 湯匙蜜糖豆渣,用手捏成小餅糰。


 



- 將餅糰逐一放上已墊防黏焗爐紙嘅烤盤上。


- 放入已預熱至 180 °C 嘅焗爐焗約 25 - 30 分鐘就攪掂。


 




前後加埋 45 分鐘都唔駛就有得食,係咪真係簡單易做呢!而且
又無落任何油脂,加上黃豆含豐富營養,係一個既健康又
好食嘅曲奇呀!



Notes:
- 整完豆漿之後嘅豆渣,要煮熟處理過先用得,請 click "豆渣處理及保存方法" 睇吓點
  樣處理啦!


- 曲奇焗好之後,留喺烤盤上攤凍一陣先至移到放涼架上,因為啱焗好嘅曲奇比較
  軟身。


 


P.S.  除咗呢個曲奇,我都整咗好幾樣用豆渣做食材嘅食品,你都可以參考,咁啲豆渣就唔駛浪費啦:


黑豆燕麥方塊    杏仁乾果燕麥方塊    煎豆渣薯餅


雪菜豆渣炒肉鬆      翠玉瓜豆渣咖喱      素雜菜湯


遲來的開年飯

        今日雖然已經係年初九,但係我今晚先食開年飯呀!咩話,初九先食開年飯?係呀,你無聽錯,因為阿馳今年初二攞唔到假,依然要返工,所以餐開年飯咪延遲到依家囉!


        今晚嘅開年飯比較簡單,快手快腳就攪掂哂,無法啦,因為阿馳食完飯又要趕返工嘛,不過我都有整埋飯後甜品 o架!



整番次西檸煎軟雞俾阿馳同阿瑩試吓先。


 



呢碟係照燒汁帆立貝


 



仲有 "摘年" 南乳齋


 



又係稻庭風手打烏冬呀,今次整咗洋蔥番茄豬骨湯底,好味!


 



飯後甜品就係法式焦糖燉蛋 ( Crème brûlée )。今次專登問 Louisa
咗支火槍返嚟燒焦糖,所以呢次做到脆焦糖面啦!


2010年2月20日星期六

祝各位生日快樂!

        今日係年初七人日,即係個個今日都生日呀!所以我喺度祝大家生日快樂!!


        以前每逢人日,屋企都有個習慣,會煲粥食 o架,唔知你哋興唔興呢?所以我今晚都煲咗麥米紅豆粥做晚餐,另外再加埋前幾日整好瑤柱蘿蔔糕椰香黃金糕,簡簡單單就攪掂咗夜晚果餐啦!



 



蘿蔔糕稍為實啲,下次煮粉漿時可以再稀少少。味道幾好,加埋
自家製 XO 醬,好味呀!


 



至於個椰香黃金糕,就唔係好得啦,始終做唔到好密蜂巢狀!不過
味道都 OK 喎,好香濃椰汁味,煎過後外面香口,裡面軟熟。
好彩減咗糖咋,依家甜度啱好


2010年2月19日星期五

大製作 — 實習篇 II

         年初三果日,我約埋 Winnie 一齊去 Louisa 屋企拜年,咁當然梗係順便整埋嘢食啦!



你睇,今次真係色彩繽紛呀!


        今次其實主要都係再次實習整 macaron,不過因為我要係廚房度埋頭苦幹咁做 "眼毛長" 嘢,所以macaron 都係主力由 Louisa 同 Winnie 兩個人整。



今次整咗兩隻好唔同嘅顏色,呢隻係 cherry red,真實睇好靚 o架!



 



之後 Winnie 就話要整佢favourite colour,即刻藍色,呢隻係 sky blue。



 



呢個就係 Louisa 大玩 crossover 之作!


 


        之後我就夾手夾腳整咗個雪芳蛋糕,呢次係我 order 要整嘅,因為我好想見識一下 Louisa 個雪芳 "彈" 糕模!佢用果個模整過幾次,個蛋糕都好有彈力 o架!



睇見呢個班蘭雪芳蛋糕都知道好實淨啦!


 



連裡面個 texture 都係咁正,食落口真係好有彈性呀


 



嗱!就係呢個雪芳 "彈" 糕模啦!


 


        Louisa 買呢個模果陣時,個店員話俾佢聽出呢個模果間公司係專門生產專業烘焙用具,所以呢個模真係好掂,連 Louisa 整果陣時突然間發瘟,做錯哂 step,將啲麵粉同糖一早溝埋一切,之後先加蛋黃打發,咁都整到個咁正嘅"彈" 糕,掂呀!你哋有冇留意到,個模邊有三支嘢 "棟" 起呢?其實係方便出爐倒扣時可以好穩陣咁放喺度,咁就唔怕會跌啦!真係三百零蚊個都物有所值!


        之前咪話我要匿係廚房度埋頭苦幹咁做 "眼毛長" ,咪就係要撕瑤柱絲囉,總共撕咗半斤呀,撕完之後我啲眼眉毛長咗成吋呀 做乜要撕咁多瑤柱絲?咪就係因為 ………



……… 要XO 醬囉!



        有興趣睇番上次大製作實習嗎?


椰香黃金糕 Kue Ambon

        呢個黃金糕已經 "寄存" 喺我個 To Do List 入面好耐喇,因為需要發酵好長時間,所以一定要等到好得閒果日先可以整。咁啱今日老人中心放假,唔駛上堂,夜晚又唔駛教 Ryan 同煮飯,咁咪 "的" 起心肝郁手整囉!


        因為每年年初一果日都會喺伯伯屋企大團拜,知道會見到 Lily,所以一早就搭佢幫我買定班蘭葉喇。嘩,原來九龍城間「同心」嘢真係好平,同「營多東南亞超市」比,真係抵到爛呀!啲班蘭葉兩間都係賣 $5,「同心」就有一大包 12 塊,但「營多」就得果 4 塊咋,而且「同心」都係最近先加價賣 $5,之前買開都係 $3.5 o添咋! 所以遲再買班蘭葉時,我就會俾兩塊我老豆,等佢拎返去農場度俾佢果 friend 睇吓有冇可能種到,如果掂的話,咁就……… 呵呵呵呵!!


        喺網上見到好多朋友都係跟同一個食譜去整,既然大部份都唔係好得,所以我都無興趣跟果個譜做。今次我呢個黃金糕係跟一個娘惹師傅個食譜嚟整,雖然唔係正宗印尼人,但都係東南亞出品,感覺好似可靠啲,而且食譜幅相係非常之 "蜂巢"  o架,所以咪專登喺圖書館度借本食譜返嚟跟住做囉!



哋話似唔似嚿牛油蛋糕呀!



材料:
即用酵母      15 克
暖水              110 毫升
麵粉              80 克
班蘭葉          4 塊
椰漿              350 毫升
牛油              30 克
糖                  220 克
木薯粉          120 克
雞蛋              6 隻
鹽                  少許


以上材料份量可做 8 吋圓形黃金糕一個。


食譜係參照 Patricia Lee 嘅《娘惹風味糕點》。




- 酵母、暖水、麵粉及 1 茶匙(份量以外) 放入碗內,拌勻成幼滑麵糊。


- 將麵糊蓋好之後,放溫暖地方發酵 50 分鐘。


- 班蘭葉,椰漿同鹽放煲內用慢火煮熱,當見到有微煙時,就加入牛油,等牛油完全
  溶化拌勻後就可以熄火,冚蓋將班蘭味焗出,之後攤凍備用。


- 雞蛋輕輕拂打幾;糕盤鋪上牛油紙。


- 將麵糊同糖倒入攪拌兜內,拂打均勻,跟住將木薯粉同雞蛋一齊加入,再拂打均
  勻


- 最後拌入椰漿混合物,之後倒入糕盤內,發酵 2 個半鐘。


- 發酵好之後,將糕盤放入已預熱至 170 °C 嘅焗爐內,先焗 15 分鐘,跟住調低火力
  至 150 °C,繼續焗多 30 - 40 分鐘至糕熟透即成。



粉漿發酵前後嘅分別。


        其實今日都係抱住做實驗心態去整咋,預咗 "衰硬" o架喇,因為見個個 blog 友都好難整得到蜂巢狀,所以都打定輸數,玩玩吓 o架咋!不過如果有機會再整的話,就要控製一下個爐火,因為我屋企個焗爐火力真係比較猛,攪到個糕面好深色。至於成功與否,聽日再話俾大家知啦!




Notes:
- 原食譜係用濃椰漿,但無買到,就咁用普通椰漿代替。

- 原本糖嘅份量係 260 克,但係 Gordon 話俾我聽,佢親戚 ( 印尼華僑 ) 習慣整開果
  啲都好甜,所以我就自行將糖減少 60 克。


- 原食譜內有用到雲呢拿香油 1/2 茶匙,係加埋入椰漿內一齊煮熱。


- 有網友話,如果天氣好似今日咁凍,可以將麵糊倒入電飯煲內,用保溫功能幫助發
  酵,因為電飯煲保溫溫度係約 40 °C,適合發酵;而我個微波焗爐就有個發酵功
  能,正正就係預設40 °C,所以好方便。




- Kue Ambon 係印尼文,直譯為 Golden Cake,即黃金糕,在此要多謝 Gordon 媽咪
  幫手翻譯。


2010年2月18日星期四

瑤柱蘿蔔糕

        我相信都無乜人會唔鍾意食蘿蔔糕,除非佢真係勁唔鍾意食蘿蔔或煮糕點啦!媽咪每逢過年都必定會整,不過佢會刻意整得 "削" 啲,因為我哋都鍾意食蒸蘿蔔糕呀!

        不過,呢幾年當然再無得食啦!前一年
Winnie 特登叫佢媽咪整多一底俾我,咁我都可以 "止吓咳"!上一年,我就 "老奉" 咁等佢底糕啦,點知佢媽咪無整到喎,咁我就不但無得止咳,仲 "咳到甩肺" 呀!!哈哈,講笑啫,我份人無咁賤。都係個句,想食咩?咪自己整囉,所以今年我就買定哂啲蘿蔔喺屋企,等今日得閒就開工整,順便幫我部 food processor 剪采!



2010年2月14日星期日

大年初一必煮:南乳齋


首先喺度同各位 blog 友拜年,祝  萬事如意,身體健康,恭喜發財!!


        以往每年大年初一,媽咪都一定會煮碟南乳齋,其實我諗好多人都會有大年初一食齋呢個習慣。


        雖然媽咪依家唔喺度,但我亦秉承傳統,今朝校定鬧鐘一早起身,準備好所有材料煮齋。咁誇張,要校定鬧鐘一早起身!?係呀,因為我煮好碟南乳齋之後,唔係淨係為咗餐晏咁簡單,最主要係要嚟供佛,我同媽咪都一樣跟足師傅習慣,要趕11:00am 前上供,因為出家人係 "過午不食" o架,而搭正 11:00am 已經係午時喇!所以我一定要好早起身預備一切,可能我做嘢手腳慢啦! 其實我都已經趁噚日無乜嘢做,預早處理好啲金針同雲耳喇,如果唔係,留番今朝先嚟慢慢洗,肯定趕唔切呀!



材料:
津菜
冬菇
金針
雲耳
豆卜
鮮腐皮
紅蘿蔔
粉絲
薑片


調味料:
南乳


- 津菜洗乾淨,切細件;紅蘿蔔刨皮後切薄片;冬菇處理好,備用。


- 金針同雲耳先用水浸發、洗淨,雲耳剪去底部木頭部份,之後放入加有白醋滾水
  內汆水,瀝乾待用。


- 豆卜沖洗乾淨後切開兩邊;粉絲用清水浸軟;鮮腐皮略沖洗,撕成小塊。


- 燒熱油,爆香薑片,之後加埋南乳一齊爆香。


- 落津菜炒至軟身,加入冬菇同紅蘿蔔煮一陣間。


- 之後加埋金針、雲耳同豆卜落鑊,加糖,兜勻後轉中細火炆至入味。


- 間中搵開鑊蓋,兜炒一下,見冬菇炆腍後,就加埋粉絲同腐皮落鑊一齊煮。


- 煮至乾水就可以熄火上碟。



南乳味香濃,厚肉冬菇夠爽口,津菜又夠甜,好食呀!



Notes:
- 煮呢個齋菜,其實可以自行選擇材料,不過津菜、冬菇就一定唔少得。


- 買唔到津菜,可用普通紹菜 / 黃芽白或娃娃菜代替;而鮮腐皮亦可用枝竹代替。


- 落糖前,最好先試味,因為南乳係非常濃味而且鹹。


- 即使煮到所有材料都差唔多時,仍然會一大鑊水,因為津菜 / 紹菜係會不停出水。
  但唔緊要,媽咪教落,呢個時候就一定要落粉絲,只要粉絲一落,就能夠吸乾所有
  水份,一滴都無,仲快過打芡,所以落咗粉絲之後就要小心黐底。


- 鮮腐皮同粉絲唔可以太早落鑊,否則會煮到爛哂。


大年初一,恭喜發財!

        今日係新正頭大年初一,首先喺度同大家拜年:



        一向過時過節都唔會太有氣氛,都係平平淡淡渡過,因為親戚甚少,來來去去都係得果兩三家,而且隨住自己年齡嘅增長,身邊親友更逐個離開,可以話係買少見少,呢兩年連媽咪都陪唔到我哋一齊過年,氣氛更遜往年。


        好在近排老豆去咗佢個 friend 個農場度幫手,所以今年啲年花同年桔返嚟,咁都叫做有番少少過年氣氛。



呢盆蝴蝶蘭 (希望我無錯個名啦!) 真係好靚,顏色配搭靚之餘,仲
開得好燦爛,朵朵都有番咁上下大 o架!之前 Winnie 過嚟拎個
蘭蛋糕
時,佢見到都讚好靚呀!本來都諗住叫老豆拎盆返
送俾佢
嘅,但原來係咁貴,所以都唔敢開口 lu!!
 


 



前幾日老豆話俾我聽,喺農場度啲蘭花出貨價係 $150 一枝,咁依
家呢盆有 3 枝,所以都已經值 $450 o架喇!去到花店,人哋打
開門做生意,當然要賺錢啦,咁就會賣更加貴喇,不過老
豆話依然好多人幫佢哋農場訂貨呀!


 



既然啲花咁靚,咁就俾closeup 照大家睇吓,同大家一齊分享啦!




咗蘭花,老豆仲拎咗盆龍膽桔返嚟。呢盆四季桔好茂密,啲桔仲好
大粒 o添唔!老豆專登叫個 friend 留番盆最細嘅俾佢,呢個 size
唔大唔細,擺喺屋企啱好,過完年仲可以浸鹹柑桔 o添!


        祝各位 blog 友有個開心愉快嘅農曆新年,恭喜,恭喜!!