瑤柱蘿蔔糕

        我相信都無乜人會唔鍾意食蘿蔔糕，除非佢真係勁唔鍾意食蘿蔔或煮糕點啦！媽咪每逢過年都必定會整，不過佢會刻意整得 "削" 啲，因為我哋都鍾意食蒸嘅蘿蔔糕呀！

        不過，呢幾年當然再無得食啦！前一年 Winnie 特登叫佢媽咪整多一底俾我，咁我都可以 "止吓咳"！上一年，我就 "老奉" 咁等佢底糕啦，點知佢媽咪無整到喎，咁我就不但無得止咳，仲 "咳到甩肺" 㖭呀！！哈哈，講笑啫，我份人無咁賤。都係個句，想食咩？咪自己整囉，所以今年我就買定哂啲蘿蔔喺屋企，等今日得閒就開工整，順便幫我部 food processor 剪采！

 

材料：
白蘿蔔      約三斤 (1800 克)
粘米粉      十二兩 (450 克)
粟粉          四兩 (150 克)
臘腸          約三兩 (113 克 )
蝦米          約一兩 (37.5 克)
冬菇          半兩 (19 克)
瑤柱          3 粒
乾蔥頭      2 粒
蔥花          少許
白芝麻      少許

調味料：
水              1 杯至杯半 (250 - 375 毫升)
生抽          1 湯匙
鹽              1/2 茶匙
糖              1 茶匙
雞粉          1 湯匙

胡椒粉       適量
紹酒

- 臘腸同瑤柱略沖洗，瑤柱放碗內、加水，連同臘腸一齊蒸至軟身；蝦米略沖洗，
  用暖水浸軟；之後將臘腸同蝦米切粒，瑤柱撕碎。

- 冬菇處理好之後切粒；乾蔥頭去衣、切碎；蘿蔔去皮後刨粗絲。

- 粘米粉同粟粉混合好；白芝麻洗乾淨，用白鑊炒香，攤凍備用。

- 燒熱油，先爆香一半乾蔥茸，將臘腸、蝦米、冬菇同瑤柱落鑊一齊爆香，灒酒，
  炒多幾吓，盛起備用。

- 爆香埋剩低嘅乾蔥茸，加入蘿蔔絲兜炒，之後落調味料 (紹酒除外) 及已爆香嘅
  臘腸、蝦米、冬菇、瑤柱同蔥花，然後將水份略為煮乾。

- 將火校至最細，篩入粉類，與所有材料拌勻，用慢火邊煮邊攪拌，將材料煮至八
  成熟。

- 將蘿蔔粉漿倒入已搽油嘅蒸盤內，用中大火蒸約 30 分鐘至熟。

- 趁熱灑上預先留起少量嘅臘腸、蝦米、冬菇、瑤柱同蔥花，再灑上芝麻即成。
 
以上材料份量可做 8 吋蘿蔔糕 2 底。
      

早前屋企裝修執屋時，我搵到媽咪之前 keep 起咗幾本
《方太與你》雙周刊，其中兩本係新年特刊，
專教整賀年應節食品，咁見到裡面有教
整蘿蔔糕喎，咁咪試吓跟佢整囉！

真係唔好講笑，搵到果幾本《方太與你》真係古董
嚟㗎，簡直可以送去博物館珍藏，你哋睇
吓方太個樣咁後生就知啦！我仲
搵到本創刊號㖭呀，犀利！

 

 

 

 

 

 

睇個樣都似模似樣㗎，不過內裡質感同味道，就要等到初七

"人日" 果日先知喇，到時再同大家分享成果啦！

Notes：
- 浸蝦米水、蒸瑤柱水及蘿蔔水可留用，代替調味料內的水份使用，會令蘿蔔糕更
  加好味。

- 將蘿蔔刨成粗絲，成品會更有蘿蔔味及𡁻頭。

- 炒蘿蔔絲時可用番之前爆香臘腸、蝦米料剩低嘅油份。

- 煮蘿蔔粉漿時，若水份唔夠的話，可額外加入適量清水。

- 蒸糕時需留意水量，若水份蒸乾的話，要酌量加入熱水。

- 蒸好嘅蘿蔔糕要放入雪櫃雪一日至硬身，之後先可以切件煎香。