香草蘋果炆肉排

        如果無記錯的話，香草蘋果炆肉排應該係我入廚史上第一個煮嘅餸，但係已經唔係好記得點解當時我會煮呢個餸呢！照計當時我仲係 "做仔" 嘅時候 ( 依家唔係 "做仔" 啦，係做咗一家之 "煮" 呀！)，有媽咪照顧三餐，無理由會入廚煮飯 o架！可能因為當時我八八卦卦咁入廚房問媽咪有冇嘢要幫手，咁媽咪就順勢叫我幫手煮呢個餸啩。當然，梗係媽咪要從旁指指點點啦，因為當時嘅我，入廚經驗絕對係 "零"！查實當時我只不過係一部 "人肉遙控煮餸機"，等媽咪可以一邊 "煮" 呢個餸，另一邊就準備其他食材。 

        自此之後，唔知點解，每次煮嚫呢味餸，媽咪都會將個 "重任" 放手交俾我去煮，可能我煮得好食啩，呵呵！  都隔咗好耐無煮呢味餸喇，既然又有幾個供完佛嘅蘋果，今晚就煮啦！

材料：
腩排
蘋果
蒜茸
乾蔥頭
百里香 ( Thyme )
羅勒 ( Basil )

醃料：
鹽
糖
生抽
老抽
紹酒
粟粉
油

調味料：
糖
OK醬
喼汁
鮮醬油
黑椒粉
肉桂粉

- 腩排洗乾淨，用醃料醃好；蘋果批皮、去芯，切件備用。

- 乾蔥頭去衣，切細成乾蔥茸。

- 燒熱油，爆香蒜茸及乾蔥茸，放腩排落鑊煎香，灒酒，兜勻。

- 加入蘋果炒幾下，之後加水，冚鑊蓋略煮。

- 加調味料及香草，兜勻後用慢火繼續炆。

- 當腩排熟透、蘋果炆至軟身入味，就可以熄火，上碟。

Notes：
- 蘋果煮熟程度可依個人喜好而調節，蘋果煮得越腍就越入味。

- OK 醬味道較酸，最好試完味之後先落糖。

- 肉桂可提升蘋果香甜味，係做蘋果菜式嘅最佳配搭。