大年初一必煮：南乳齋

首先喺度同各位 blog 友拜年，祝  萬事如意，身體健康，恭喜發財！！

        以往每年大年初一，媽咪都一定會煮碟南乳齋，其實我諗好多人都會有大年初一食齋呢個習慣。

        雖然媽咪依家唔喺度，但我亦秉承傳統，今朝校定鬧鐘一早起身，準備好所有材料煮齋。咁誇張，要校定鬧鐘一早起身！？係呀，因為我煮好碟南乳齋之後，唔係淨係為咗餐晏咁簡單，最主要係要嚟供佛，我同媽咪都一樣跟足師傅嘅習慣，要趕喺 11:00am 前上供，因為出家人係 "過午不食" o架，而搭正 11:00am 已經係午時喇！所以我一定要好早起身預備一切，可能我做嘢手腳慢啦！ 其實我都已經趁噚日無乜嘢做，預早處理好啲金針同雲耳喇，如果唔係，留番今朝先嚟慢慢洗，肯定趕唔切呀！

材料：
津菜
冬菇
金針
雲耳
豆卜
鮮腐皮
紅蘿蔔
粉絲
薑片

調味料：
南乳
糖

- 津菜洗乾淨，切細件；紅蘿蔔刨皮後切薄片；冬菇處理好，備用。

- 金針同雲耳先用水浸發、洗淨，雲耳剪去底部木頭部份，之後放入加有白醋嘅滾水
  內汆水，瀝乾待用。

- 豆卜沖洗乾淨後切開兩邊；粉絲用清水浸軟；鮮腐皮略沖洗，撕成小塊。

- 燒熱油，爆香薑片，之後加埋南乳一齊爆香。

- 落津菜炒至軟身，加入冬菇同紅蘿蔔煮一陣間。

- 之後加埋金針、雲耳同豆卜落鑊，加糖，兜勻後轉中細火炆至入味。

- 間中搵開鑊蓋，兜炒一下，見冬菇炆腍後，就加埋粉絲同腐皮落鑊一齊煮。

- 煮至乾水就可以熄火上碟。

南乳味香濃，厚肉冬菇夠爽口，津菜又夠甜，好食呀！

Notes：
- 煮呢個齋菜，其實可以自行選擇材料，不過津菜、冬菇就一定唔少得。

- 買唔到津菜，可用普通紹菜 / 黃芽白或娃娃菜代替；而鮮腐皮亦可用枝竹代替。

- 落糖前，最好先試味，因為南乳係非常濃味而且鹹。

- 即使煮到所有材料都差唔多時，仍然會一大鑊水，因為津菜 / 紹菜係會不停出水。
  但唔緊要，媽咪教落，呢個時候就一定要落粉絲，只要粉絲一落，就能夠吸乾所有
  水份，一滴都無，仲快過打芡，所以落咗粉絲之後就要小心黐底。

- 鮮腐皮同粉絲唔可以太早落鑊，否則會煮到爛哂。