2010年2月14日星期日

大年初一必煮:南乳齋


首先喺度同各位 blog 友拜年,祝  萬事如意,身體健康,恭喜發財!!


        以往每年大年初一,媽咪都一定會煮碟南乳齋,其實我諗好多人都會有大年初一食齋呢個習慣。


        雖然媽咪依家唔喺度,但我亦秉承傳統,今朝校定鬧鐘一早起身,準備好所有材料煮齋。咁誇張,要校定鬧鐘一早起身!?係呀,因為我煮好碟南乳齋之後,唔係淨係為咗餐晏咁簡單,最主要係要嚟供佛,我同媽咪都一樣跟足師傅習慣,要趕11:00am 前上供,因為出家人係 "過午不食" o架,而搭正 11:00am 已經係午時喇!所以我一定要好早起身預備一切,可能我做嘢手腳慢啦! 其實我都已經趁噚日無乜嘢做,預早處理好啲金針同雲耳喇,如果唔係,留番今朝先嚟慢慢洗,肯定趕唔切呀!



材料:
津菜
冬菇
金針
雲耳
豆卜
鮮腐皮
紅蘿蔔
粉絲
薑片


調味料:
南乳


- 津菜洗乾淨,切細件;紅蘿蔔刨皮後切薄片;冬菇處理好,備用。


- 金針同雲耳先用水浸發、洗淨,雲耳剪去底部木頭部份,之後放入加有白醋滾水
  內汆水,瀝乾待用。


- 豆卜沖洗乾淨後切開兩邊;粉絲用清水浸軟;鮮腐皮略沖洗,撕成小塊。


- 燒熱油,爆香薑片,之後加埋南乳一齊爆香。


- 落津菜炒至軟身,加入冬菇同紅蘿蔔煮一陣間。


- 之後加埋金針、雲耳同豆卜落鑊,加糖,兜勻後轉中細火炆至入味。


- 間中搵開鑊蓋,兜炒一下,見冬菇炆腍後,就加埋粉絲同腐皮落鑊一齊煮。


- 煮至乾水就可以熄火上碟。



南乳味香濃,厚肉冬菇夠爽口,津菜又夠甜,好食呀!



Notes:
- 煮呢個齋菜,其實可以自行選擇材料,不過津菜、冬菇就一定唔少得。


- 買唔到津菜,可用普通紹菜 / 黃芽白或娃娃菜代替;而鮮腐皮亦可用枝竹代替。


- 落糖前,最好先試味,因為南乳係非常濃味而且鹹。


- 即使煮到所有材料都差唔多時,仍然會一大鑊水,因為津菜 / 紹菜係會不停出水。
  但唔緊要,媽咪教落,呢個時候就一定要落粉絲,只要粉絲一落,就能夠吸乾所有
  水份,一滴都無,仲快過打芡,所以落咗粉絲之後就要小心黐底。


- 鮮腐皮同粉絲唔可以太早落鑊,否則會煮到爛哂。


5 則留言:

  1. 新年快樂呀!祝你龍馬精神,搵多D學生賺多D
    過年剩係整左一碟咋?邊夠食架?
    [版主回覆02/15/2010 13:40:00]        新年快樂!承你貴言!         夠 o架喇,兩個人一碟齋加兩碗飯,好夠喇!不過正確 啲 嚟 講係煮 咗一大鑊齋,依家仲剩 咗兩大碟呀!每樣少少,加埋原來一大鑊!

    回覆刪除
  2. 祝你虎年身體健康, 心想事成. 
    [版主回覆02/15/2010 13:44:00]         新年快樂,大家咁話!

    回覆刪除
  3. 嘩, 呢個係最傳統的新年第一齋, 你都識, 真係幼承庭訓, 我細個在大澳過年, 年初一午飯第一啖都係要吃這個, 但隨住長輩年紀老邁, 都在外面吃齋算了.........冇得吃這味
     
    仲有蒸臘味拼盆, 芹菜荷豆炒臘肉........好懷念呀, 我將來都會煮的.
     
     
    [版主回覆02/15/2010 13:48:00]        原來你都有呢個習俗呀!你自己或者太太都識煮啦,咁簡單!         我初四先蒸蘿蔔糕呀!

    回覆刪除









  4. [版主回覆02/15/2010 13:53:00]        多謝妳呀! 啲字妳寫 o架?          我早兩個禮拜寄 咗賀年卡俾表姨媽,唔知佢收到未,因為睇新聞講大風雪關係,郵遞要延誤呀!

    回覆刪除
  5. 唔係我寫架....copy 架咋! 記住...你表姨媽住西岸~~三藩市係長年都冇雪落架!放心, 一定收到嘅!
    [版主回覆02/15/2010 23:16:00]        哦,原來係咁 o架!我到依家都一直攪唔清邊度係東岸,邊度係西岸,"讀萬卷書不如行萬里路" 真係無錯!可能都係要到一次先會攪得清!         真係多謝哂妳呀 Motonako.A!

    回覆刪除