2009年4月30日星期四

好豐富的一餐晚飯!

        噚日Louisa 屋企食果餐晚飯真係好豐富,佢仲自已落手落腳煮 o添!整咗大蝦天婦羅,紹酒煮青口,漢堡雞扒,但最精彩都非稻庭風手打烏冬莫屬喇。


        呢隻烏冬真係勁好食,滑得嚟又帶點煙韌,正!咁當然唔及得上喺日本即整即食 o既烏冬啦!但係都唔差得太遠。記得之前同媽咪去日本玩時,食過當地 shabu shabu 烏冬,真係念念不忘,又滑、又爽,剩係食佢都已經好滿足,都唔駛食其他火鍋料。


        飯後仲有甜品心太軟 o添!本來我同 Louisa 都諗住自己試吓整嚟食,點知俾佢發現到專賣 puff Bread Papa 有得賣,仲唔係好貴 o添,$15 一個,好過自己整啦,而且味道都唔差,都OK o架!一切開個蛋糕,裡面啲朱古力漿就即刻湧出嚟,好興奮呀!


        噚日食完呢個心太軟之後,第一次 feel 到人哋成日講話食完 dessert 果種好開心、好滿足嘅感覺。


2009年4月29日星期三

蒜茸蒸鮮魷


材料:
魷魚
粉絲
蔥花


醃料:
蝦醬
麻油
油爆辣椒
蒜茸


        魷魚內外去衣,撕去軟骨及內臟,洗淨、瀝乾水份後剪成細塊,加入醃料、撈勻;粉絲用水浸軟後洗乾淨備用。


        將粉絲先鋪好喺碟上,然後將醃好嘅魷魚平均鋪喺粉絲上面,隔水蒸約 8-10分鐘至熟,最後灑上蔥花即可。


Note
醃魷魚時可以落多些少糖,因為蝦醬比較鹹味。


2009年4月28日星期二

南瓜提子麵包

        哈哈,有 coupon 唔好嘥,繼續試吓美心其他款式嘅裝包先!今次就揀咗呢隻南瓜提子麵包,皆因我真係勁鍾意食南瓜 o架。




        嘩,啲顏色好靚,好金黃呀,不過佢係有落到色素 o架!深橙色粒粒就係南瓜粒嚟 o架!


        個包用咗好多提子乾同鮮南瓜粒,第一啖咬落去已經 feel 到南瓜淡淡嘅清甜,咪以為 "淡淡" 即係代表唔夠濃味呀,其實代表個味已經好出 o架喇,我都試過幾次用南瓜嚟整蛋糕,但係無論落幾多,即使顏色已經好金黃 ( 當然自家出品就無用到色素啦 ),都食唔到南瓜味 o架,所以 "淡淡" 都已經係好有味道喇!睇番個成份,南瓜係排第三位 o架,只係僅次於水同麵粉,即代表成份當中南瓜所用嘅份量都幾多,因為所有食品成份表裡嘅材料都係根據用量多寡嚟排次序,份量越高者就排喺最開頭,所以點解南瓜味都幾出呢。


金銀蛋上湯浸紫莧菜

        今日整呢個餸其實真係無心插柳。


        話說噚日放工返到嚟街市買餸,可能因為係禮拜日嘅關係,加上又好晏啦,已經成 5 點幾 6 點,大部份菜檔都已經收哂,即使仲有菜賣嘅檔口都所剩無幾,係無得好揀之下,就買咗幾條矮瓜煮叉燒、買咗鹹蛋同皮蛋嚟蒸水蛋、仲買定斤莧菜留番今日滾湯,加埋啲隔夜餸,咁今日就唔駛專登落多次街買餸喇。


        噚晚當我喺廚房洗洗切切時,望住啲鹹蛋同皮蛋,吓,突然又諗起放喺雪櫃嘅莧菜,吓,好似可以用嚟整金銀蛋莧菜噃,就係咁,我呢個 "哎月老" 就撮合鹹蛋、皮蛋同莧菜呢頭婚事喇,雞蛋就唯有改投蝦子嘅懷抱,改為蝦子蒸水蛋喇。



        平時多數會用綠莧菜整呢個餸,不過街市都無哂綠莧菜,咁就唯有用紫莧菜囉!不過煮出啲顏色又幾靚喎!


 


材料:
莧菜
鹹蛋
皮蛋
蒜茸
薑茸


上湯料:
日式木魚湯包
薑片


調味料:


紹酒



        呢包就係日式木魚湯包喇,好方便 o架,一大包裡頭有 20 包好似茶包湯包。根據 "看圖估字 " 嘅方法去理解包裝袋背面嘅日文使用說明600 ml 嘅水就用一個湯包滾  3 - 5分鐘。


 


        先將莧菜洗乾淨、瀝乾水備用;鹹蛋打開之後,將蛋白同蛋黃分開,蛋黃就同皮蛋一齊切粒,蛋白留用。


        燒熱油,爆香薑茸同蒜茸,灒酒,立即將莧菜落鑊以吸收酒香,跟住就炒幾炒,加入調味料同小小水,兜勻後就冚上鑊蓋,將莧菜煮腍。喺等緊莧菜煮腍嘅同時,就準備上湯。煲滾水,放薑片同湯包一齊滾 5 - 8分鐘至湯包完全出味,夾起湯包後,就加入皮蛋同鹹蛋黃滾幾滾,再跟住倒埋啲鹹蛋白落湯煮成蛋白花,煮好後就可以將湯同蛋舀上已煮熟莧菜度,咁呢 3 位新人嘅婚禮就此禮成!


2009年4月22日星期三

好抵呀,$13 排 Lindt Intense Orange Dark Chocolate 咋!

        係呀,真係 $13 排 Lindt Intense Orange Dark Chocolate 呀!

        逢星期五都要入元朗老人中心教合唱團,如果時間尚早的話,我一定會去新元朗中心商場果間百佳行吓,因為果間百佳買嘢其實係好似 Taste 咁,比較多款式,而且有時有更加係連 Taste 都無得賣而佢有得賣!相信佢係全港唯一一間 Park 'N Mega Store (係 Mega Store 而唔係 Super Store 呀),起碼到目前為止我都淨係見過呢間 Mega Store。

        喺 Mega Store 裡面,有一個貨架係專擺一啲就快到期嘅產品,通常都會以低過半價嘅價錢售賣,以我又細到大都唔怕食過期嘅 "本領" ,呢度啲貨品真係合哂我嘅合尺,可以超低價試到一啲平時較為價嘅高檔貨,好似上次盒 Davidoff Cafe Rich Aroma 就係喺呢個貨架度搵到。



Rustico Sunflower Bread

        上星期五朝早因為教完元朗老人中心嘅合唱團之後,要即刻飛去馬鞍山教 Louisa,教完佢同 Arthur 之後又要即刻趕去將軍澳同學生補課,中間係完全無時間食 lunch,所以一早就預咗買包包上 Louisa 屋企一邊教、一邊食。去得到 Louisa 屋企果頭,就梗係去幫襯 La Rose Noire 啦!我都好耐無去幫襯喇。一去到,就即刻鎖定咗要買 Rustico Sunflower Bread,點解?因為真係好好食囉,而且唔係間間 "黑玫瑰" 都有得買,就算馬鞍山呢間都唔係成日有得賣。



        淨係睇個樣都勁歐陸 feel 啦,一睇就知好食,之前我俾過 Lily 食,佢都話呢個包好得。我知道 Louisa 都係嗜歐陸麵包嘅,所以我就專登買分一半俾佢食。


        我果然無估錯,Louisa 真係勁鍾意呢隻包,鍾意到咩程度呢?原本我話俾佢聽我買咗麵包俾佢食,佢本來話唔食得住,因為啱跳完舞唔可以即刻食澱粉質嘅食物,如果唔係就好易吸收、好易肥,點知我叫佢攞個膠袋出嚟先裝起一半時,佢一見到就話好正,原本裝好咗袋包都受唔住誘惑,要即刻攞塊嚟食,食第一啖已經話好好食,之後一路食都一路讚 o添!真係美食當前,無法抵擋誘惑,連變肥都唔驚!


 



        睇見個包嘅粗纖維 texture,就知道一定會似 Pumpernickel 個招牌黑麥包咁墜手,而且佢仲落咗好多葵花籽仁,所以特別甘香。不過對我嚟講就稍嫌鹹,如果淡番啲就 perfect 喇。咁 heavy texture,食一兩塊已經好夠,加上極高纖維,完全適合果啲減肥 keep fit 嘅人仕。


        咪睇佢細細塊呀,一包 8塊賣 $16,即係成 $2 一塊 o架! 


朱古力雪山包 & 煙肉香草包

        最近行入美心西餅兜個圈,發現有新產品麵包上市,見到都幾吸收,咪買嚟試吓囉!


        呢個係雪山包嘅新成員,朱古力雪山包。


        今日可能因為早落街買,所以去到美心時,隻朱古力雪山包多都任揀唔嬲,比起上次個芋頭雪山包,個外表簡直係 Beauty & the Beast!今次呢個靚仔幾多,個脆皮完整無缺,真係好吸引。相信鍾意食苦甜朱古力嘅朋友都會覺得呢個包好食,點解?睇吓下面張相 ……



        嘩,咬開裡面,完全充滿哂朱古力漿,留意吓個包底右面,啲朱古力漿仲多到滲哂出嚟!而且啲朱古力漿又唔會太甜,輕輕帶少少苦味,正!如果無記錯的話,我睇過報紙廣告佢個全名應該係比利時朱古力雪山包,所以可能係因為用咗比利時朱古力做。加上每次買返屋企食嘅包我都會放入焗爐度焗番熱先食,所以個脆皮特別脆,加埋香濃嘅朱古力餡,真係食完一個都仲未夠喉!我老豆食完都話好食,又唔會太甜咁話。


       


        另一個就係煙肉香草包,我見到梗會買嚟試啦,事關我勁鍾意香草 o架嘛!




        未打開個袋已經聞到好香嘅香草味,連 Louisa 都話聞到好香,打開個袋之後,就梗係唔駛講 …… 勁香囉!佢係用咗百里香 (Thyme) 同奧勒崗 (Oregano) 兩種香草。


 



        裡面都有唔少香草同煙肉,咬落都好鬆軟,不過到第二日再食已經乾咗同咗好多!       


        其實之前我係剪起coupon,買個裝包減 $1;買袋裝包減 $2,所以呢兩樣包加埋總共減$4,都 OK 抵食喎!


嘩,乜咁多嘢食嘅?


        真係勁多嘢食喎,又有得食、又有得飲,其實全部都係 Lily 去完旅行買俾我嘅手信,有海南島咖啡啦、青島嘅啤酒豆、台灣薄紙燒牛肉乾,仲有樽 "冒牌曼秀雷敦" o添!佢話擔心我食完自己買果樽之後會無得食,所以買定多樽俾我喎!哈哈,真係細心喇。


        至於隻 Maxwell 咖啡,就係佢個 "咖啡老嚮" friend 飲過話好得,但喺香港已經再搵唔到有得賣,今次佢喺大陸見到有得賣,就當然立即入貨啦,所以 Lily 就俾咗兩包我試飲,遲啲沖嚟飲睇吓係咪好正先!


        Lily, thank you very much!!


2009年4月21日星期二

伯爵紅茶蛋糕 Earl Grey Sponge Cake


        每年天后誕,Winnie 屋企都會分到好多雞蛋,今年都唔例外,據聞有成六七十隻,所以早前佢就打電話俾我,話會俾大約二三十隻我整蛋糕。佢咁有心,我當然要整番個蛋糕回禮啦,而且仲可以快啲清埋屋企啲舊雞蛋,真係一舉兩得


        咁啱我又喺圖書館借咗本《西點蛋糕大百科》:


        於是就試吓跟住本書學整個海綿蛋糕送俾 Winnie 同佢媽咪食,但無理由咁齋,清蛋糕一舊 o架!所以就試吓加入伯爵紅茶葉 (It's my favourite tea)。之前亦請教過明仔好多次關於整呢款蛋糕,所以今次個蛋糕係集大成嘅實驗品,而 Winnie 就做咗我隻白老鼠喇!

   


        呢幅就係 Winnie 喺佢屋企影嘅。有冇留意到個蛋糕面濕濕哋呢? Winnie 都有問過我呢個問題,我諗應該係因為表面糖份高,呢輪天氣又好潮濕所引致。不過就唔知點解個面會裂開咗呢?


        由於海綿蛋糕主要係靠將空氣打入蛋黃同蛋白而膨脹,唔需要用泡打粉幫助膨脹,所以一焗完出爐就要即刻倒扣擺喺放涼架上面攤凍,如果唔係個表面就會因溫度驟降,熱脹冷縮嘅關係而塌下。亦就係因為咁,個蛋糕面被壓到一條條放涼架嘅印,好樣衰!



        喺蛋糕裡面同表面都睇到有一點點黑色物體,就係伯爵紅茶茶葉啦!


        由於 "糕餅專家" 明仔話俾我聽用分蛋法嚟整海綿蛋糕會比較容易同成功率高,所以今次我就用分蛋法整。


材料:
低筋麵粉              80克
蛋黃                      3個
蛋白                      3個
糖                          80克
牛油                      10克
豆漿                      20毫升
伯爵紅茶茶包      2個


        將茶包放入煲滾嘅豆漿裡面,跟住即刻熄火、冚蓋,等啲茶味焗出嚟;用170℃預熱焗爐,我自己就喺預熱焗爐嘅同時放入牛油,順便將佢熱用,當然,要小心留意住,一見到差唔多溶哂就即刻拎番出嚟。麵粉要先過篩 3 次。


        先將蛋黃打散,加入1/3 份量嘅糖後繼續打至變白,當用打蛋器舀起蛋糊時,流番落嚟時會殘留痕跡,即代表已經打到適當稠度;之後到打蛋白,當打至起泡時,就可以將剩低嘅糖分 3次加入,直至蛋白打起到乾性打發為至 ( 即將蛋白倒轉都唔會跌落嚟囉 );跟住就將溶牛油同 "伯爵豆漿" ( 連小部份茶葉 ) 一齊加入蛋白度,盡量輕手咁將所有材料拌勻,然後舀起小部份打發蛋白落去蛋糊度拌勻,完全混合後就倒番落去啲蛋白度,並分次加入麵粉,用切拌法 ( folding ) 將麵粉拌勻,記得要盡量輕手,唔好將裡面嘅空氣攪番哂出嚟,咁個蛋糕先至會鬆軟。跟住就可以倒入模度,然後放入焗爐用170℃ 焗 25-30分鐘,當插入牙簽再拎番出嚟時無任何麵糊黐喺上面就表示已經全熟喇!記得拎咗個蛋糕出嚟之後要即刻倒轉放上放涼架度,咁個表面就唔會因熱脹冷縮嘅關係而塌下。


        之於味道如何,就等 Winnie 俾 comment 喇,因為材料份量只夠做一條蛋糕,所以我同我老豆就無份食喇。做白老鼠呢個重任都係交俾 Winnie 佢哋啦!


Note:由於我係唔飲奶嘅關係,所以我先至改用豆漿。


2009年4月16日星期四

翠玉瓜豆渣咖喱

        每次整完豆漿之後都必定會為豆渣尋找 "出路",一來唔好浪費,二來豆渣其實營養好高 、蛋白質好豐富 o架!今次我就試嚟煮咖喱,睇吓好唔好食先!



材料:
黃豆渣
翠玉瓜
洋蔥
榨菜


調味料:
日式咖喱磚


紹酒



        今日買返嘅翠玉瓜好新鮮、好靚。


 


        翠玉瓜洗淨後切薄件;洋蔥及榨菜切粒。


        燒熱油,先爆香洋蔥,灒酒,炒到少少軟身後就加入翠玉瓜一齊炒,盛起備用。再加少少油燒熱,跟住放豆渣落鑊炒,炒到比較乾身之後,就將之前嘅翠玉瓜同洋蔥回鑊一齊炒,加入鹽同糖,兜勻後就可以放埋咖喱磚落鑊,加入大量清水,因為加咗咖喱磚後,好易會黐底,所以要加入大量水不停攪勻,直至所有咖喱完全煮溶哂為止。最後校大火略為收乾水份就可以上碟。


        味道都唔錯,咖喱同洋蔥絕對係絕配。食落口質感好幼滑,好似食緊芋蓉咁樣,而榨菜同翠玉瓜則俾到另一種爽口嘅感覺。平時有整開豆漿嘅網友不妨一試,幾好味 o架!又唔駛浪費啲豆渣。


 


P.S.  尋日整完豆漿之後,跟手就炒熟埋啲豆渣方便儲存,不過炒嘅時候有少少黐底:



        我將黐底嘅豆皮慢慢搣起,試吓咩味道,完來都幾好食喎,好清甜,仲有少少脆 o添!所以記得煮豆渣菜式時要不斷兜炒,否則會全部黐哂底。


菠蘿醬燒豬頸肉


材料:
豬頸肉
新鮮菠蘿


醃料:
蒜茸

魚露
柱侯醬
玫瑰露
粟粉
麻油



        老豆早前返咗大陸玩幾日,買4個神州菠蘿返落,非常之香甜,連中間條芯都食得。你睇,批咗皮之後嘅菠蘿顏色幾靚!


 


        豬頸肉切粗條 ( 可請肉枱職員代勞 ),洗乾淨、瀝乾水後,用醃料先醃半個鐘,然後再加入粟粉及麻油繼續醃;菠蘿切件備用。


        先將豬頸肉排好喺烤盤上,放入已預熱 160℃嘅焗爐度焗約7熟,其間需翻一翻,之後用另一隻碟以梅花間竹方式排好豬頸肉同菠蘿件,如果有肉汁或之前醃料剩低的話,就可以呢個時候加埋落去,淋喺豬頸肉同菠蘿上面,再放入焗爐,用薄烤功能烤多 4分鐘度至表面金黃色即可。



        味道真係無得彈,唔會太濃,又唔會唔夠入味,仲帶有玫瑰露同蒜香味,加埋新鮮菠蘿嘅香甜,真係配搭得宜。


2009年4月15日星期三

嘩,真係好準,仲準過天文台呀!

        哋通常會喺咩人口中聽到呢句說話呢?相信都好少會喺一個三十零歲嘅人口中聽到吧!


        今朝一早起身已經覺得條頸好唔舒服,扭又扭唔鬆,好辛苦,全日都有種作頭痛 feel,心諗:呢一兩日一定落雨喇。


        啱正話喺廚房做嘢,準備今晚餐飯時,望出街外,果然真係落緊雨,幾 "靈" 呢!所以果啲有風濕人可以好準確咁話俾你聽幾時會落雨。


       


吉之島會員購物日

        星期日喺將軍澳教完琴之後,去地鐵站搭車時見時間仲有早,就去咗附近間吉之島10元廣場度兜個圈,行行吓,有個 sales lady 行埋嚟叫我申請 Jusco 信用卡,話即刻可以依家享有會員九折購物優惠。


我話:「吓,依家?咁張卡未批核 o架噃!」


sales:「係呀,我哋依家會俾張臨時信用卡你,由今日起計,你可以1個月內用嚟買嘢,到一個月後,就要等公司批咗張卡先可以正式有得用。依家我哋做緊promotion,申請呢張銀聯信用卡可以括免一年年費,其他 VISA 或者 Master卡就要俾年費 o架!」


        因為我本身都有好多嘢想買,見咁荀,於是就填表申請。個 sales問我攞張身份証去影印,咁我就問:「咁我點俾啲收入證明你哋呢?」


sales:「你遲啲一個星期內後補番就得 o架喇!」


        係等緊另一位職員核對資料時,我多口問佢一句:「咁過咗呢一年之後要收幾錢年費呀?」


sales:「$20。」


我:「$20?乜呢張唔係 credit card 嘅咩?」


sales:「係呀,呢張係credit card 嚟 o架,年費係 $20。」


我:「吓,咁咪仲抵過申請 J卡!張 J卡仲要俾 $50 年費。」


sales:「係呀,所以依家啲人多數都申請信用卡而唔申請 J卡喇!」


我:「哦!」



        就係咁,呢幾日我就攞住呢張臨時卡,好似佢哋賣廣告句 slogan咁,「瘋狂購物」喇。


 



        依家申請就送一個環保袋,都幾 cute 喎!


 



        仲俾我揭中埋 $5現金券o添!梗係即刻買嘢用埋佢啦!


 



        呢啲主要係烘焙用具同日用品。


 



        呢啲就全部都係食o既。


        沙律醬減到好平,九折後賣 $12.5;支紫蘇無油沙律汁仲抵,賣 $5支咋,折實 $4.5,當然梗係就快到期先賣咁平啦,原本賣十幾蚊支 o架!不過唔駛怕,細支裝好快用完。樽麻油真係勁抵呀,咁大支都係賣 $49.9九折後仲減多 $5 o添!平時用開果隻日本麻油都已經由廿零蚊支加到依家成 $48 支,但只係得呢支 Topvalu 嘅一半容量,咁你話支 Topvalu 係咪好抵喇!所以我覺得吉之島呢隻自家品牌 Topvalu 都幾抵用,質素唔差,價錢又唔貴,你睇,味噌、麻醬、沙律汁、麻油同冷麵汁都係呢隻牌子呀!


        唔好以為我好鍾意咖喱,一次過入咁多貨,其實有兩盒係 Winnie o架!平時佢唔多煮嘢食,但係煮日式咖喱佢就最拿手喇。


 


        埋單計數,$400有找,除九折外,連埋J卡會員價及$5折扣,總共慳咗差唔多四五十蚊,都夠我食三四餐晏囉!