翠玉瓜豆渣咖喱

        每次整完豆漿之後都必定會為豆渣尋找 "出路"，一來唔好浪費，二來豆渣其實營養好高 、蛋白質好豐富 o架！今次我就試吓攞嚟煮咖喱，睇吓好唔好食先！

材料：
黃豆渣
翠玉瓜
洋蔥
榨菜

調味料：
日式咖喱磚
糖
鹽
紹酒

        今日買返嚟嘅翠玉瓜好新鮮、好靚。

 

        翠玉瓜洗淨後切薄件；洋蔥及榨菜切粒。

        燒熱油，先爆香洋蔥，灒酒，炒到少少軟身後就加入翠玉瓜一齊炒，盛起備用。再加少少油燒熱，跟住放豆渣落鑊炒，炒到比較乾身之後，就將之前嘅翠玉瓜同洋蔥回鑊一齊炒，加入鹽同糖，兜勻後就可以放埋咖喱磚落鑊，加入大量清水，因為加咗咖喱磚後，好易會黐底，所以要加入大量水不停攪勻，直至所有咖喱完全煮溶哂為止。最後校大火略為收乾水份就可以上碟。

        味道都唔錯，咖喱同洋蔥絕對係絕配。食落口質感好幼滑，好似食緊芋蓉咁樣，而榨菜同翠玉瓜則俾到另一種爽口嘅感覺。平時有整開豆漿嘅網友不妨一試，幾好味 o架！又唔駛浪費咗啲豆渣。

 

P.S.  尋日整完豆漿之後，跟手就炒熟埋啲豆渣方便儲存，不過炒嘅時候有少少黐咗底：

        我將黐底嘅豆皮慢慢搣起，試吓咩味道，完來都幾好食喎，好清甜，仲有少少脆 o添！所以記得煮豆渣菜式時要不斷兜炒，否則會全部黐哂底。