逢星期五都要入元朗老人中心教合唱團，如果時間尚早的話，我一定會去新元朗中心商場果間百佳行吓，因為果間百佳買嘅嘢其實係好似 Taste 咁，比較多款式，而且有時有啲嘢更加係連 Taste 都無得賣而佢有得賣㖭！相信佢係全港唯一一間 Park 'N Mega Store (係 Mega Store 而唔係 Super Store 呀)，起碼到目前為止我都淨係見過呢間 Mega Store。
喺 Mega Store 裡面，有一個貨架係專擺一啲就快到期嘅產品，通常都會以低過半價嘅價錢售賣，以我又細到大都唔怕食過期嘢嘅 "本領" ，呢度啲貨品真係合哂我嘅合尺，可以超低價試到一啲平時較為價嘅高檔貨，好似上次盒 Davidoff Cafe Rich Aroma 就係喺呢個貨架度搵到。
上次食過隻 Lindt Intense Orange Dark Chocolate，真係一試難忘，成日都吼住超市減價就再入貨。本來前一日喺 Market Place by Jason 度見到佢減到 $20.9 一包已經叫做好抵，所以即時買咗兩排，點知第二日喺呢間百佳見到仲荀，只賣 $13，咁荀，咁就當然要大舉掃貨啦，唔買都對唔住自己啦！一買就買咗 4排，實行嚟一招平均成本法，夾埋之前喺 Market Place by Jason 買果兩排，前後總共買咗 6 排。咪以為我咁貪小便宜咁掃貨呀，其實係買嚟還人情債嘅，一排買俾 Louisa，一排買俾 Winnie，一排俾我老豆，咁自己就得番 3 排咋！
沒有留言:
發佈留言