菠蘿醬燒豬頸肉

材料：
豬頸肉
新鮮菠蘿

醃料：
蒜茸
糖
魚露
柱侯醬
玫瑰露
粟粉
麻油

        老豆早前返咗大陸玩幾日，買咗 4個神州菠蘿返落嚟，非常之香甜，連中間條芯都食得。你睇，批咗皮之後嘅菠蘿顏色幾靚！

 

        豬頸肉切粗條 ( 可請肉枱職員代勞 )，洗乾淨、瀝乾水後，用醃料先醃半個鐘，然後再加入粟粉及麻油繼續醃；菠蘿切件備用。

        先將豬頸肉排好喺烤盤上，放入已預熱 160℃嘅焗爐度焗約7分鐘至啱啱熟，其間需翻一翻，之後用另一隻碟以梅花間竹方式排好豬頸肉同菠蘿件，如果有肉汁或之前嘅醃料剩低的話，就可以喺呢個時候加埋落去，淋喺豬頸肉同菠蘿上面，再放入焗爐，用薄烤功能烤多 4分鐘度至表面金黃色即可。

        味道真係無得彈，唔會太濃，又唔會唔夠入味，仲帶有玫瑰露同蒜香味，加埋新鮮菠蘿嘅香甜，真係配搭得宜。