蔥油餅

        唔知點解，一向都鍾情於北方食品，饅頭、餃子、麵條……，尤其係蔥油餅，連 Winnie都知道我呢個 "辟好"。其實正確嚟講應該係鍾意食用麵粉整嘅嘢食，西方嘅麵包、蛋糕、pasta我都好鍾意 o架！

        今日Louisa唔得閒上堂，咁我得閒喺屋企就試吓整蔥油餅喇。

        我就係跟住呢本《麵麵俱到》學整蔥油餅 o架喇！

 

麵糰材料：
中筋麵粉      800克
鹽                  8克
滾水              400毫升
凍水              240毫升
乾麵粉          適量

蔥油餡材料：
食油              半碗
麻油              1湯匙
鹽                  適量
蔥花              適量
胡椒粉          適量

        先將鹽同麵粉混合好，之後沖入滾水，用筷子迅速攪拌成鬆散粉粒，跟住就加入凍水搓成麵糰，冚上保鮮紙靜止 20分鐘後，再搓成光滑嘅麵糰，然後放入雪櫃雪凍 6個鐘頭或以上；另外燒熱油同麻油，加入其餘蔥花餡材料拌勻備用。

        將雪過嘅麵糰分割成每個重100克嘅小麵糰，然後用已撲上乾粉擀麵棍擀成薄圓餅皮。

        之後喺上面搽上蔥花餡、撒上乾麵粉。

 

        將餅皮捲成長條狀，然後再捲成螺旋狀，靜止 20分鐘。

        然後用擀麵棍擀成直徑約15厘米嘅麵餅，放落已燒熱油嘅平底鑊度煎至兩面微黃色，加入1湯匙水，冚上鑊蓋，煎到水乾後再加入半湯匙油，繼續煎到兩面金黃色，趁熱拍鬆就攪掂。

        唔知點解，我唔可以好似本書幅圖咁拍鬆塊蔥油餅呢？有無高人可以指點迷津呀？

 

        加埋碗鹹豆漿就成為咗一份豐富而味美嘅北方晚膳喇！

 

Note:

1. 食譜上寫住最好前一晚整好麵糰，然後放入雪櫃雪過夜，可以令到麵糰嘅延展性更加好。我自己就朝早搓好麵糰，放入雪櫃雪到挨晚攞番出嚟分割。

    不過今日可能因為天氣熱，所以個麵糰喺雪櫃拎出 o黎之後，表面好多濕氣，攪到舊麵糰好腍好濕，要不停咁撒粉喺枱面、擀麵棍上同個麵糰本身。下次試吓唔雪，睇吓會唔會好啲！

2. 加水一齊煎可以做到外脆內軟。