法式小餐包 French Minute Bun

       今日淨係朝早教一個學生，夜晚老豆又唔喺屋企食，唔駛煮飯，見咁得閒，就諗住 "郁手" 焗蛋糕，但係諗起今日係十五，要食齋噃，所以整唔到蛋糕，因為我想食得清啲，連蛋都唔食，反正一個月都係兩次度啫，所以就諗起整麵包喇，因為唔駛落蛋嘛！都好，反正成日都得個 "諗" 字，遲遲都未郁手試做，今日難得夾啱哂時間，就 "的" 起心肝，"迫" 自己行出第一步！(因為我成日都覺得整麵包比整蛋糕困難同辛苦，又怕整唔成，浪費材料 )

        咁驚失敗，咁就當然要揀隻用料最少、又容易做嘅麵包嚟試做啦，我噚晚睇咗好幾本書，卒之揀咗雪媽媽教嘅法式小餐包。

        細細個嘅法包仔，好 cute好得意呀！

 

        呢本雪媽媽嘅《自家製麵包》係上年書展時 Winnie 幫我買，因為果陣時已經 plan 定會買依家個微波爐，所以本書要等到依家有焗爐先之有用。

材料：
高筋麵粉                              130克
低筋麵粉                              50克
乾酵母 (Instant Yeast)         2.5克
鹽                                          2克
溫水                                      100克       

        先將酵母溶於溫水 (約 32-38 ℃)內，拌勻、靜止10分鐘；將所有材料倒入不銹鋼盤內，加入酵母水，用手搓成粉糰，之後取出放上枱面，繼續搓至麵糰光滑，拉開麵糰時出現薄膜為至，然後就可以將麵糰滾圓並黏緊收口。

        將滾圓咗嘅麵糰放喺搽咗油嘅不銹鋼盤內，然後用保鮮紙冚住發酵，大約 45 分鐘度。

        第一次發酵完成，個麵糰發大咗差唔多兩倍，原本只係得我個拳頭咁大咋，依家就成個西瓜仔咁大。

 

        手指沾上高筋麵粉，插入麵糰後如果個窿無即時收縮，就代表第一次發酵完成喇。之後就用拳頭打扁個麵糰，將裡面嘅空氣排出，然後將麵糰拎到枱面上分割成六小份，再次滾圓並冚上保鮮紙鬆弛 10分鐘。

        之後將麵糰仔用手掌壓平、壓薄，然後捲起成欖核狀，放喺已經舖上牛油紙嘅焗盤上，用保鮮紙冚住作最後發酵。發酵到大約兩倍大時，就用刀輕輕喺麵糰表面割一刀。

        你睇，左下角個麵糰仔幾肥幾樣衰！所以焗完之後唔俾佢影大合照。

        用噴水壺將麵糰表面噴濕，然後就可以放入預熱咗 200 ℃嘅焗爐內焗 15 - 20分鐘，最緊要記住，當開始焗至 7分鐘後，就要再噴多一次水，咁先至可以做到法包脆硬嘅表面。我個焗爐因為有蒸氣功能，所以唔駛打開爐門噴水，一按制就攪掂，好方便呀！呢個亦係我之所以會捨得買嘅其中一個原因。

        焗緊嘅時候已經不斷聞到麵包香，到熱辣辣出爐時又點忍得住口呢，梗係即時拎個嚟食啦！一拎上手時都幾驚呀，因為真係好硬，好驚成舊麵包都 "硬掘掘" 食唔到，好彩只係表面硬，咬落去就好軟熟，同街賣嘅差唔多，只係比較 "寡" 咗啲，可能落唔鹽啦！

        卒之成功喇！好開心呀！  試過今次得咗就唔會再驚喇，下次再挑戰第二款包囉！

        不過整麵包真係幾辛苦，搓到好鬼死攰 o架，好彩搓緊嘅時候已經不斷聞到發酵緊嘅香氣，好似葡萄酒咁味 o架，就係聞到呢隻香味先至支持到我有心機、有動力繼續搓落去，因為以我依家風都吹得起嘅身形，真係幾吃力 o架！但當麵包出爐時就覺得幾辛苦都值得嘅，不過我諗我好少會整麵包俾人食囉，整得咁辛苦梗係留番俾自己歎啦！