合桃鬆餅 Walnut Muffin

        喺焗緊 biscotti 嘅時候，跟住就開始整超鬆軟嘅合桃 muffin。

芝麻腰果意式脆烤餅 Sesame & Cashew Biscotti

噚日一早教完琴就返屋企開爐整嘢，快手快腳就整好咗兩樣嘢，由事前洗嘢到準備功夫，磅材料，開始整到入爐焗，之後又再清洗用具，夾埋都只係用咗兩個半鐘，果然係功多藝熟、訓練有數。

 

首先出場嘅係芝麻腰果 biscotti。

材料：
腰果 50 克
黑芝麻 15 克
低筋麵粉 250 克
泡打粉 2.5 克
雞蛋 2隻
糖 100 克
鹽 2.5 克
黑芝麻粉 30 克

 

- 腰果同芝麻洗乾淨，索乾水份，放入焗爐，用 140 ℃ 焗約 15 分鐘至乾身及香味出。

- 麵粉及泡打粉混合過篩 3 次；雞蛋拂打成蛋液，備用。

- 將粉類、芝麻、腰果、糖及鹽混合好，之後加入蛋液，用膠刮拌勻成濕粉糰。

- 將粉糰放上已灑粉嘅枱面上，然後再灑適量粉於粉糰表面，輕手堆成唔黏手嘅粉糰。

- 粉糰平均分成兩份放上已鋪入爐防黏蓆嘅烤盤上，輕輕將粉糰壓扁成橢圓形。

- 放入已預熱至 180 ℃ 嘅焗爐內，焗約 20 分鐘至粉糰表面完全乾身。

- 將粉糰拎出，稍為攤凍後就用刀切件，然後將切面向上排放於烤盤上，焗 10 分鐘。

- 將烤餅翻轉，另一切面向上，再入爐焗約 8 – 10 分鐘至完全乾身即成。

- 出爐後放架上攤凍。

 

以上材料份量可做烤餅約 30 塊。

由於加咗黑芝麻粉做粉糰，所以成嚿粉糰都灰灰黑黑，賣相唔多討好！

好彩切件焗好後顏色變得金黃，當堂吸引好多！

Notes：
- 由於雞蛋大細不同會直接影響粉糰濕度，若材料混合時稍為乾身而難以拌勻成糰的話，可酌量
   額外加入蛋液或水；若粉糰較濕的話，需加入適量手粉，方便堆成糰。

- 濕粉糰係輕手堆成乾粉糰而唔係搓成糰，否則的話會令粉糰起筋，做唔到硬脆效果。

- 第一次出爐後，最好趁粉糰仲係微熱嘅時候就切件，因為完全攤凍會變得較硬，比較難切開。

請教各路做包高手

替老友請教各位做包高手，請問呢兩包「星野」酵母有咩分別？用法有唔同嗎？

 

感激萬分，謝謝！！

怪獸 Oregano

講開噚晚整茄醬雜豆肉丸時落牛至，我真係要同大家分享一下我屋企嗰兩盆 oregano，真係快高長大到得人驚，簡直就係一隻怪物！！！

其實最初時只係 Louisa 修剪佢盆 oregano，我將佢剪落嚟嘅一小棵拎返屋企用水養，當養到大量根生出時就叫老竇改用泥種，就係咁樣開始啫嘛。我其實已經試過種好多種唔同嘅香草，但鋪鋪都種到死，唯獨係盆 oregano 就超強橫，不斷係咁細胞分裂，係咁生、係咁高！！

 你哋睇，當初的一小棵香草，曾經大到要分枝，分成兩盆嚟種。

前面嗰盆生吓生吓又再分成兩個橫枝，一枝生得
比較矮 ( 相片左下角 )，而另一枝就已經
生到半個窗咁高 ( 相片正中央 )。

後面嗰盆就仲癡線，已經生到繞過前面嗰盆一圈，然後再兜番轉頭
繼續向上生，都不特止，近排仲沿住露台條去水渠一直係咁
向上生，高到差唔多到屋頂喇，你話係咪好似隻異形
咁狂細胞分裂呀！！不過呢枝分枝已經
送咗去碟茄醬肉丸度 lu！

茄醬雜豆肉丸

早前整 pizza 時煮咗啲番茄醬，用剩之後就放上冰格保存，但係唔想擺太耐霸住冰格啲位，所以又再整茄醬肉丸。

除咗肉丸之外，今次仲加埋三角豆同紅腰豆一齊煮。

有真空煲真係好方便，用慢火煲  20 分鐘，啲豆就已經
完全腍哂，慳唔少柴火哦！

煎好肉丸之後，先爆香洋蔥同西芹，跟住加茄醬同肉丸，
煮到肉丸八成熟之後就加埋雜豆一齊煮至全熟，
最後灑上新鮮牛至兜均就攪掂喇！

烚啲扁意粉，加埋入茄醬內一齊拌勻，就成為咗
豐富健康又好味嘅晚餐喇！

番茄醬做法，請參閱《莎樂美鮮白菌薄餅》；而茄醬肉丸食譜就請參考《番茄醬肉丸伴香辣薯角》。

豆腐紅豆抹茶雪芳 Tofu & Azuki Maccha Chiffon Cake

        正常情況之下，見到個名，都應該會認為個蛋糕裡面有齊抹茶粉、紅豆同豆腐三樣材料，但實情係三種材料可以話係各有各分開，並非完全撈埋一齊囉！

        首先，蛋糕本身就加入抹茶粉去整，之後就用咗噚日整嘅豆腐打發忌廉溝紅豆餡做成蛋糕內餡，再抹上豆腐打發忌廉就完成喇！

豆腐打發忌廉 (硬性打發) Tofu Whipped Cream (Stiff Peak)

        記得之前我曾經跟《不使用砂糖的自然派 sweet 甜點》整過豆腐打發忌廉嗎？當時係用嚟代替 cream cheese 放上甘筍蛋糕上面，但係上次嘅做法只可以當成配料或伴食之用，texture 相對較軟身，如果要用作裝飾、抹 cream 或唧花的話，要做得比較挺身至得，否則會變得瀉身。

       要做到有九成打發的硬度時，材料用量就要略作調整了。

提子英式鬆餅 English Muffin with Raisin

        今日晏晝整咗 English muffin，自家製作，當然比「麥記」嘅好食啦，鬆軟好多呀，而且我仲加咗提子乾落去㖭！傳統嘅做法會將佢放喺平底鑊度烘熟，所以無焗爐都一樣可以做到。

 

        食之前，一般都會用隻叉將個鬆餅叉開兩邊，唔係用刀切開，我當然都跟傳統咁玩吓啦！沖一杯 Earl Grey，配埋自家製紅茶橙皮醬，咁就可以扮吓英國紳士，享受一個英式 afternoon tea。

        無錯，我係飲紅茶、食英式鬆餅，唔係飲咖啡、睇法國電影，所以我唔係中產！！

 

 

超級勁感動的和菓子

早前喺 Facebook 度見到一位前學生 post 咗一啲去北海道睇雪祭嘅相片，我好奇咁問吓佢係咪去日本玩，點知佢嘅回覆除咗係 "係呀" 之外，仲加多句 "我買咗份手信俾你"，當時都無乜特別感覺，以為佢係隨口講句，唔係真，因為佢其實係九年前已經考完八級，之後因為讀大學時功課忙、又要住宿舍，無時間練琴，所以已經停學，而且喺呢段期間，我哋根本完全無聯絡，即使喺 Facebook 度都無任何文字來往，只係間中 "like" 吓對方，所以絕對估唔到，九年後嘅今日，佢真係帶埋份手信嚟我屋企拜年，真係超開心呀，而且嗰種開心係非筆墨所能形容，完全係盡在不言中！

Ryan 帶來的和菓子，雖然實質重量非常之輕，但對我嚟講，
份心意真係重到我無法拎起呀！！

其實 Ryan 一向都係比較沉默寡言，就算同我識咗咁耐，由中一開始跟我學琴，學到佢自己都已經讀緊大學，佢每次同我傾偈時都總會帶點靦腆，所以我真係點都估唔到佢去旅行都會記得買份手信俾我！講真，佢對我呢份尊敬、尊重，絕對比起佢彈琴彈得好來得更加開心、更加感動！

 Ryan 依家都已經三字出頭，出嚟做嘢都已經有六、七年時間，做老師嘅我，雖然只係大佢幾年，都真係唔認老都唔得喇！！所以佢嚟拜年當日，我哋倆個不其然講番好多 "往事"，我仲講笑咁講，做乜我哋倆個四字頭都未有就猛喺度 "講舊事" 呀，！！

始終都係嗰句，越 "大年紀" 嘅學生，越係懂得尊師重道，我同 Miss Cheng 嘅關係跟我同 Ryan 一樣，年紀同樣都只係差少少，但我一直都係當佢係我老師、前輩咁尊敬，彼此亦師亦友，相信呢份尊重，我都幾難可以喺依家十零廿歲嘅學生身上搵得到，佢駁少我兩句嘴、頂少我幾句我都已經阿彌陀彿囉！！