提子英式鬆餅 English Muffin with Raisin

        今日晏晝整咗 English muffin，自家製作，當然比「麥記」嘅好食啦，鬆軟好多呀，而且我仲加咗提子乾落去㖭！傳統嘅做法會將佢放喺平底鑊度烘熟，所以無焗爐都一樣可以做到。

 

        食之前，一般都會用隻叉將個鬆餅叉開兩邊，唔係用刀切開，我當然都跟傳統咁玩吓啦！沖一杯 Earl Grey，配埋自家製紅茶橙皮醬，咁就可以扮吓英國紳士，享受一個英式 afternoon tea。

        無錯，我係飲紅茶、食英式鬆餅，唔係飲咖啡、睇法國電影，所以我唔係中產！！

 

 

材料：
高筋麵粉      250 克
即用酵母      5 克
糖                10 克
鹽                  5 克
水                約 180 毫升
提子乾        適量
玉米粉        適量

- 除提子乾外，將所有材料放入食處理器內混合，逐少加水搓成麵糰。

 

- 將麵糰拎出，放上已灑粉嘅枱面，繼續搓揉及摔打成光滑麵糰，然後包入提子乾。

 

- 將麵糰滾圓，放入已灑粉嘅兜內，用保鮮紙封好，發酵 45 分鐘。

 

- 麵糰排氣後平均分割成 4 份，分別滾圓，靜置鬆弛 10 分鐘。

 

- 鋪好入爐防黏蓆於烤盤上，灑上玉米粉，放上圓模，再用牛油紙圍住模內邊。

 

- 麵糰壓平排氣，用手略為拉開成圓模大小，將麵糰放入模內。

 

- 麵糰表面再灑上玉米粉，發酵約 60 分鐘至模八成高度。

 

- 用另一張入爐防黏蓆覆蓋圓模，上面再放上一個烤盤，以避免麵糰膨脹成球形。

 

- 放入已預熱至 200 ℃ 嘅焗爐內，焗約 18 – 20 分鐘即成。

 

- 出爐後立即移至架上攤凍。

 

以上材料份量可做直徑 4 吋鬆餅 4 個。

 

 

 

我就地取材，用咗兩個甩底模嚟整，所以唔使用入爐防黏
蓆覆蓋兼加烤盤壓頂咁麻煩。因為只得兩個模，
所以另外兩個麵糰就唯有就咁焗就算。

好明顯，無用模焗嗰兩個好上色，同埋因為用好高火焗嘅關係，
攪到個皮比較硬；而另外兩個因為有模，所以焗完之後
都仲係好鬆軟，下次再整時，無模嗰兩個
要試吓放平底鑊烘熟至得喇！