豆腐紅豆抹茶雪芳 Tofu & Azuki Maccha Chiffon Cake

        正常情況之下，見到個名，都應該會認為個蛋糕裡面有齊抹茶粉、紅豆同豆腐三樣材料，但實情係三種材料可以話係各有各分開，並非完全撈埋一齊囉！

        首先，蛋糕本身就加入抹茶粉去整，之後就用咗噚日整嘅豆腐打發忌廉溝紅豆餡做成蛋糕內餡，再抹上豆腐打發忌廉就完成喇！

材料：
低筋麵粉            80 克
抹茶粉                10 克
蛋黃                   3 個
糖                       60 克
橄欖油                35 毫升
水                       60 毫升

蛋白                    4 個
紅豆餡                 適量
豆腐打發忌廉      適量 

- 麵粉與抹茶粉混合好，過篩 3 次。

- 用膠刮將蛋黃打散，加入 20 克糖拌勻，之後依序拌入橄欖油及水。

- 篩入粉類，均勻攪拌成麵糊。

- 蛋白用電動打蛋器打至起泡，之後將剩餘嘅糖分 3 次加入，打成八成企身嘅蛋白霜。

- 先將 1/3 份蛋白霜加入麵糊內，用膠刮徹底拌勻，然後將剩低嘅蛋白霜分次輕手拌入。

- 將麵糊倒入模內，然後喺枱面輕敲數下，釋出較大氣泡。

- 放入已預熱至 180 °C 嘅焗爐內焗約 30 分鐘，出爐後立即倒扣攤凍。

 

- 將少量豆腐打發忌廉與紅豆餡混合成蛋糕內餡。

- 蛋糕脫模後水平切開分成兩份，中間抹入內餡。

- 最後用豆腐打發忌廉均勻抹上蛋糕上即成。

以上材料份量可做直徑 17 厘米蛋糕 1 個。

淨係睇到個顏色都已經好吸引，仲聞到淡淡嘅抹茶清香味。

豆腐打發忌廉好成功咁抹上蛋糕度，我自己就覺得佢比起淡忌廉
仲易啲抹上，你睇呢次抹得靚過之前多多聲就知啦！

見到中間層豆腐紅豆餡嗎？佢簡直係為呢個蛋糕起到畫龍點晴

嘅作用，一食到內餡時：「噢，太好味喇！！」

Notes：
- 打發蛋白霜時可加入少許他他粉以提高穩定性，無咁易消泡，亦可以數滴檸檬汁或白醋代
  替。

- 紅豆餡製作方法，請參閱《日式紅豆餡》。

- 豆腐打發忌廉製作方法，請參閱《豆腐打發忌廉 (硬性打發)》。