2010年7月28日星期三

盤景沙灘

        早前 "盤景貓" 事件攪到好似好大鑊咁,初時我睇見都以為係真貓,覺得好恐怖、好噁心!!好彩原來係假嘅,咁都無咁驚。


        今晚喺廚房鋅盆洗緊嘢時,忽然抬頭一望,嚇見原來自己屋企個杯櫃內都放咗個 "盤景沙灘" 喺度:







        盤景貓係假嘅,但我呢個盤景沙灘裡面啲生物係真 o架,喺度 "沙灘漫步"
o添,好恐怖呀!!即刻掉都掉唔切呀!!!!


        呢樽其實係薑粉嚟 o架,都唔知點解,無啦啦都會 "偶" 到咁多蟲!我成日都喺度諗,點解啲食物可以自動 "偶" 蟲嘅呢?啲蟲究竟點樣生出嘅呢?唔通係無性繁殖!?


花旗參蘋果瘦肉湯

        我好鍾意飲呢個花旗參蘋果瘦肉湯 o架,媽咪第一次煲時我已經即刻愛上咗佢喇!


         原來蘋果同花旗參個味道係非常之夾,花旗參嘅甘,正好平衡番蘋果煲過之後所產生酸味,加上蜜棗同蘋果本身嘅甜味,係真正甘甜。花旗參有清熱作用,啱哂我依家飲喇,因為面上粒粒成日都唔退,本來早前敷咗個有消炎mask 之後,情況已有少少好轉,但係因為已經用到最後一塊,又無時間去買,加上早一個禮拜又熱到痴哂線,啲粒粒即刻 "標" 番哂出嚟,真係激死人!! 希望飲完呢個湯之後有改善啦,如果唔係,我諗要出動龜苓膏喇!!



材料:
瘦肉
蘋果
蜜棗
花旗參


- 瘦肉洗乾淨、汆水,之後沖水洗去多餘血水。


- 蘋果去皮、去芯後切件;蜜棗洗乾淨備用。


- 除花旗參外,所有材料凍水落煲。


- 煲好之後,飲之前,落埋花旗參煲多 5 分鐘,之後落鹽調味即成。



Notes:
- 花旗參要後下係因為若果煲得太耐的話,花旗參大部份嘅香味同甘味就會消失。


- 瘦肉可用豬腱代替。


- 鍾意的話,可加雪耳一齊煲。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年7月27日星期二

芒果黑糯米

        好耐無整芒果黑糯米喇,睇番篇舊 blog,對上一次整原來已經係一年前嘅事,真係足足一年,係上年嘅 7月。
 
        其實好多人都會當芒果黑糯米做飯後甜品嚟食,但講真,食飽哂之後,基本上都無可能食得落呢個咁飽肚嘅糯米飯,除非只係食一啖咁大把啦!今晚,我就索性當佢係正餐,反正今日係十五,唔食肉。
 
        呢個芒果黑糯米一啲都唔難整,可以話係零失敗!
 
 

2010年7月26日星期一

鬼馬酸薑皮蛋炒肉粒

        鬼馬!?究竟有幾鬼馬?食材都可以鬼馬?


        細個時聽到有餸菜個名叫 "鬼馬",覺得好得意,好好奇,好想知道點 "鬼馬" 法!點知媽咪話俾我聽,原來係用咗 "油炸鬼" 同馬蹄嚟住,因而得名。


        煮呢個餸一啲都唔難,只係處理材料時比較花時間,因為除咗豬肉外,其餘所有食材都係可以即食,真係落鑊係咁依炒幾吓就已經食得,反而炒得耐仲令碟餸失色 o添!



材料:
脢頭瘦肉
皮蛋
炸麵 ( 油條 )
酸子薑
馬蹄
鮮百合


醃料:


蠔油
粟粉


調味料:


雞粉
紹酒
麻油


- 豬肉洗乾淨,切粒,用醃料醃好;馬蹄去皮後洗乾淨,切粒備用。


- 鮮百合切去啡色部份,之後拆開洗乾淨;炸麵放入白鑊內烘脆,之後切片;


- 皮蛋清除表面醃料,剝殼後切粒;子薑切粒備用。


- 燒熱油,先將豬肉落鑊兜炒,灒酒後盛起。


- 子薑、馬蹄、皮蛋落鑊炒幾吓,之後加埋百合,豬肉回鑊,加入調味料兜勻。


- 灑上麻油,兜炒幾吓後熄火,放入炸麵,拌勻後即可上碟。



Notes
- 炸麵亦可放入焗爐內烘乾、烘脆。


- 為保持炸麵脆身,一定要最後落鑊,並且不可炒太耐,兜幾吓就要即刻盛起。


- 鮮百合同樣唔好炒太耐,否則失口爽脆口感。


- 豬肉第一次落鑊時毋需炒至全熟,因為之後會回鑊再炒。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年7月21日星期三

冬瓜甜粥

        星期一用咗半個 "大冬瓜" 嚟煲四色冬瓜湯,今晚就用埋剩低果一半煲粥。

        後日係大暑,好多人都會買包袪濕料嚟煲冬瓜水消暑,但係唔知點解,我由細到大都唔係咁鍾意飲,即使落咗鹽都覺得好寡,飲完之後總係覺得口淡淡咁。但係好彩,以前媽咪有時都會用同樣嚟煲甜粥,咁就梗係好好多啦,我即刻食多幾碗呀!!

        嚟緊兩日由朝到晚都要出去教學生,唔得閒煲冬瓜水,今晚就提早 "應節",煲番媽咪煲過嘅冬瓜粥做晚餐。



2010年7月20日星期二

香蔥火腿稞麥包 Spring Onion & Ham Rye Bread

        上次煲木耳姬松茸海參螺頭湯時,因為海參要用薑蔥水汆水,所以專登走去買半斤菜,等阿姐搭條蔥,估唔到阿姐好重手,一次過俾咗幾棵我,用咗兩棵嚟汆水之後,前日又用咗棵嚟整香蔥甜椒英式烤餅,都仲係有剩,今日就用埋剩低果兩棵嚟整麵包,費事再擺咁耐喇!


        Motonako.A 睇到我個香蔥甜椒 scone,即刻口水係咁流,佢仲話會加埋少少火腿落去整,無獨有偶,我都一早買定火腿整包包,一於再次引死佢至得!



材料:
高筋麵粉      175 克
稞麥粉          75 克
鹽                  5 克
蜜糖              5 克
即用酵母      6 克
水                  約 157 克
火腿              1 塊
蔥                  2 棵


以上材料份量可做 5 吋長小型麵包 2 個。


今次參考咗王宏《歐陸健康麵包》個黑稞麥麵糰嘅材料比例及做法,然後自己再加入火腿同蔥。






- 蔥洗乾淨,切成蔥花;火腿放入焗爐內,用 180 °C 烤焗 ( grill ) 至稍為乾身、有
  香味及表面金黃。



烘香過嘅火腿,質感同味道跟煎香煙肉分別唔大,但就健康好多。



- 除火腿同蔥花外,將所有材料混合好,搓成光滑麵糰。


- 將麵糰壓扁,放上火腿同蔥花,搓揉至材料完全混合,上保鮮紙發酵 20 分
  鐘。


- 將麵糰四邊向內翻摺,再次冚上保鮮紙發酵多 15 分鐘。


- 麵糰分割成兩份,排氣後用手搥打麵糰,盡量將麵糰空氣排出。


- 之後將麵糰做形,放上已墊入爐紙烤盤上發酵到約 2 倍大。


- 發酵完成後,預熱焗爐至 220 °C,喺麵糰表面噴水。


- 將麵糰放入爐內,噴蒸氣,先焗 15 - 20 分鐘至表面轉色。


- 將爐溫降至 200 °C,再噴多次蒸氣,焗多 15 - 20 分鐘即可。



啲蔥焗完之後顏色深咗好多,唔靚仔!


 



焗緊嘅時候已經香氣滿屋,我喺房打緊呢篇 blog 時都聞到香味。



包肉果然扎實,好 "襟" 飽!



Notes:
- 記得水唔好一次過落哂,因為稞麥麵糰係會比較濕,要慢慢加水控制濕度。


- 根據食譜,用手搥打麵糰,盡量將麵糰空氣排出,可以令麵包質地更加扎實。


- 如果焗爐無蒸氣功能的話,可打開爐門直接噴水入內製造蒸氣。


        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


四色冬瓜湯

        上個禮拜老豆又捧咗個大冬瓜返嚟,當然,比起街市賣果啲冬瓜,仲差好遠啦,起碼我老豆能夠喺農場捧到返屋企!

        個瓜大到根本一次食唔哂,所以今日先用一半嚟煲湯,加埋另外三種顏色嘅菜蔬,包括粟米、紅蘿蔔同馬蹄,樣樣都係甜嘅材料,所以即使係齋湯都好清甜,唔會清淡無味。



2010年7月18日星期日

香蔥甜椒英式烤餅 Spring Onion & Capsicum Scone

        每次整嚫 scone 會用果醬伴食,所以每次都係甜味scone,但今日就參考一個食譜,整咗個色彩繽紛鹹味 scone,非常好食!

        其實我呢個食譜已經手好耐,不過因為三色椒用量比較少,所以一直等到有機會用到三色椒煮餸時,先至留起少部份用嚟整呢個 scone。


2010年7月13日星期二

木耳姬松茸海參煲螺頭湯

        記得媽咪知道自己就快要離開我時,有一日佢趁自己精神比較好,就發定哂所有海參。當然,當時佢已經再無氣力去做呢個繁複工序啦,所以佢就親自 "督師",由我去落手落腳整,因為佢知道我根本唔識做呢樣嘢,而佢又知道嚟緊嘅日子再唔可以好似以往咁照顧我,所以就一次過將屋企所有海參發好哂,之後放上冰格,等我以後可以隨時拎番出嚟解凍食用。


        因為一次過發哂所有海參,所以真係有好多好多條,之前都已經俾咗幾條伯伯同伯娘,就係因為咁,伯娘都知道我冰格有好多海參放喺度,所以佢成日都叫我快啲整咗佢嚟食,唔好擺太耐,而且佢話海參好有益,叫我等閒就用嚟煲湯飲,對身體好好。


        今日係我首次用海參煲湯呀!



材料:
海參
螺頭
瘦肉
木耳
淮山
茨實
靈芝片
姬松茸
陳皮
蜜棗


- 淮山、茨實及靈芝片用熱水浸 1 個鐘,之後洗淨,備用。


- 姬松茸、陳皮用水浸軟後洗淨,陳皮刮瓤;蜜棗沖洗乾淨。


- 瘦肉洗乾淨後汆水,之後用凍水沖洗多餘血水。


- 螺頭解凍後,喺中間切開清除內臟,之後洗乾淨。


- 木耳先用水浸發、洗乾淨,剪去硬底部份;海參發好後,清除內膜。


- 煲滾水,放入薑蔥煲一陣,之後將木耳、海參、螺頭逐一汆水,然後過冷河。


- 所有材料預備好,全部凍水落煲,煲好後加鹽調味,即可享用。



清甜中帶點姬松茸嘅香氣。


 



要 "撈" 海參上嚟影相都唔易,因為大部份都已經煲溶哂,
所以湯水已經充滿咗海參同木耳嘅膠質。



Notes:
- 若螺頭表面有
黑色物質,可用牙刷洗刷乾淨。


- 所有藥材最好用熱水浸 1 個鐘後先清洗,有助將製藥時所用嘅化學物質溶於水
  中。


- 浸姬松茸嘅水可以一併加入煲湯,因為有濃郁香味。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


墨西哥薄餅配牛油果雜菜 Mexican Roll Wrappings with Avocado & Vegetables

        上次整烤南瓜柚子排骨時,搵到另一個「Amway」食譜,係教整墨西哥薄餅,見到都得意,而且又唔難整,於是晚就整咗兩件做晚餐,但個餡料就無跟到佢,自製牛油果雜菜餡,非常好食,口味清新。



墨西哥薄餅


材料:
中筋麵粉      100 克
燕麥              25 克
橄欖油          15 克
鹽                  1/2 茶匙
水                  約 80 毫升
泡打粉          1/2
茶匙


以上材料份量可做薄餅兩塊。


- 將麵粉、燕麥、水、油同泡打粉倒入攪拌兜內,搓成麵糰雛形。


- 枱面灑上乾粉,放上麵糰,加入鹽,繼續搓揉成光滑富彈性麵糰。


- 將麵糰滾圓,放入已灑乾粉攪拌兜內,包好保鮮紙,靜置 30 分鐘。


- 拎出麵糰,分割成兩等份,略滾圓後用擀麵棍擀成薄餅皮。


- 燒熱平底鑊,毋須加油,放餅皮落鑊,用最慢火將餅皮烘熟即成。



牛油果雜菜餡


材料:
牛油果          1 個
番茄              1 個
青瓜              1/2條
罐頭粟米      1 罐


調味料:
糖                   2 茶匙
柚子醋           1 茶匙
青檸汁           1 個份量
黑椒粉           少許
辣椒汁           少許
鹽                   少許


- 牛油果對半切開、去核,用匙羹將果肉舀出切粒;粟米粒瀝乾水份備用。


- 番茄洗乾淨,去蒂去瓤後,連同已洗淨及去瓤青瓜一齊切粒。


- 將調味料混合好後,加入牛油哥雜菜粒拌勻即成。



組合


- 將餡料放上薄餅中央,捲起後即可享用。



是日初一健康素菜晚餐:墨西哥薄餅 & 鮮百合南瓜露




Notes:
- 燕麥係用即食燕麥 ( instant oatmeal)


- 水份最好逐少加入,唔好一次過加落麵粉度,需視麵糰濕度而適量增減。


- 無柚子醋的話,可用 1/2 茶匙白醋代替。


- 唔好辣的話,可以唔落黑椒粉及辣椒汁。


- 薄餅餡料可依個人口味轉換。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


鮮百合南瓜露

        老豆早前拎咗幾個南瓜返嚟,有大有細,而最大果個就已經開始爛,唔食唔得喇!咁大個南瓜要一次過食哂,都有少少難度,突然間俾我諗到整南瓜露,咁就多多都銷得到啦!所以噚晚就整咗呢個南瓜露喇!




材料:
南瓜
鮮百合
椰醬
冰糖


- 百合先切去啡色部份,之後拆開洗乾淨,備用。


- 南瓜去皮、去瓤,切細件後放入煲內,加小量水煲滾。


- 當大部份南瓜都煲腍後,就加入冰糖,之後熄火,將南瓜全部焗腍。


- 南瓜肉連水放入攪拌機內,加入鮮百合一齊攪成南瓜蓉。


- 將南瓜蓉倒入煲內,加入椰醬拌勻,再次煲番滾即可熄火。



又香、又甜、又滑嘅南瓜露,真係魅力沒法擋,
食完一碗又一碗,停唔到口呢!



        呢個南瓜露係媽咪教我整嘅,食過一次之後就即刻對佢著迷,因為真係好好食,又香、又濃、又滑,加上我係一個南瓜精,咁就自然對佢 "不能自拔" 啦!記得當年新屋入伙時,叫班 friend 一齊上嚟玩,媽咪都叫我整呢個南瓜露招呼佢哋,佢哋食過之後都讚好食,連 Winnie 都問我點整,佢話都想試吓整俾屋企人食,但唔知佢最後有冇整呢?


        媽咪話俾我聽,整呢個南瓜露最重要反而係鮮百合,因為加鮮百合可以令到個南瓜露既清新又清甜,冰糖都可以落少



Notes
- 煲南瓜時,盡量用少量水去煲,因為南瓜煲熟之後就會出水,即使煲完之後可能
  會好稠身,到時可以酌量加水或椰醬煮開至適合濃度。


- 煲南瓜嘅水量毋須冚過南瓜面,因為南瓜係非常易煲腍,即使無水浸到嘅南瓜都
  可以俾水蒸氣蒸熟至腍,又或者可以喺煲嘅中途用匙羹將南瓜肉翻一翻。


- 若果真係煮得太稀的話,可以用馬蹄粉埋芡,甚至用粟粉都可以。


- 可預留少少鮮百合到最後煲滾時先落,咁就可以食到鮮百合嘅爽甜,多一種口感
  層次。


- 加入椰醬後記得唔好煲太耐,因為煲得太耐的話,椰醬會煲出油。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


油浸半乾番茄麵包

        Rachel's Kitchen 開放日見到有仙姐17 小時包包賣,Louisa 都知我一定會捧場,所以即刻同我講:「喂,有麵包呀,啱哂你呀!」哈哈,真係知我者莫若 Sa


        當日有幾種麵包可以揀,有油浸半乾番茄麵包、菠菜煙肉包等,其實真係想每隻都買嚟試,因為好難得可以試到仙姐親手做嘅麵包,但係因為星期一係初一,所以我就只好揀油浸半乾番茄麵包。



呢個番茄麵包淨係睇個樣都已經夠哂吸引。


 



返到屋企,打開個袋,嘩,果 "朕" 香味濃到呢 ……
真係口水直流呀!


 



17 小時麵包果然名不虛傳,真係非常軟熟,好有彈性,加埋
油浸番茄乾嘅獨有味道,真係又靚、又香、又好食!



        有幸試到仙姐handmade 麵包,真係要多謝 Louisa,因為到最後佢都唔收我錢,真係要再次同妳講聲 merci!!


Rachel's Kitchan Open Day

        星期日約Louisa 一齊去 Rachel's Kitchen 個開放日,好彩有佢帶路咋,如果唔係,我諗我實搵唔到呀!




大門口個 logo


 



入口玄關位一角。


 



陳列架上放有各式各樣物件,有廚具、裝飾品及食譜。


 



茶具及茶葉。


 



呢個唔知係咪用嚟磨咖啡豆嘅呢!?


 



布藝用品。


 



一入玄關位已經好有 "Rachel feel" 。


 



呢個係酒架櫃。


 



姨甥女帶嘅留聲機,仲播到碟 o架!


 



牆上掛咗各款好靚嘅相架。


 






上面果幾張相內的物件全部都係賣嘅,Louisa 都入咗好多貨,
準備用嚟佈置新屋。


 



廚房前的一個杯櫃,所有杯都好精緻呢。


 



杯櫃後嘅雜物架,放咗各款茶葉及飲料。


 



廚房內的一個吊架。


 



參觀咗咁耐,趁 Rachel 得閒,Louisa 就即刻搵佢影相。


 



我當然都要同主人家影張相留念啦!


 



枱上已經放咗部份已經準備好嘅茶點。


 



呢幾隻茶杯非常之靚,如果 blog 友 Keith 見到肯定愛不惜手。


 



雀籠內放咗玫瑰及洋燭。


 



好靚、好精緻嘅糖皮蛋糕,肯定花咗唔少時間同心機


 



Rachel 嘅家人喺廚房幫手預備茶點。


 



Tea time 時間,仙姐都幫手招呼來賓。


 



最頂層Earl Grey macaron 好好味呀!曲奇都好鬆化。


 



呢個朱古力 cup cake 非常好味,我同 Louisa 都好欣賞。仙姐話,
呢兩日 open day,得我一個一食就食得出個
butter cream 係黑加崙子味。


 



Louisa 話呢個應該係 Parma Ham 配芝士。


 



認得出呢度啲麵包嗎?無錯,係仙姐嘅自家出品 17 小時包包呀
我同 Louisa 當然捧場買嚟試試啦,自己整唔到呀!


 



臨走前,趁仙姐得閒,同佢影番張相先!
最衰諗唔起帶埋佢本書嚟俾佢簽名啦!