香蔥甜椒英式烤餅 Spring Onion & Capsicum Scone

        每次整嚫 scone 都會用果醬伴食，所以每次都係甜味嘅 scone，但今日就參考咗一個食譜，整咗個色彩繽紛嘅鹹味 scone，非常好食！

        其實我呢個食譜已經喺手好耐，不過因為三色椒用量比較少，所以一直等到有機會用到三色椒煮餸時，先至留起少部份用嚟整呢個 scone。

材料：
低筋麵粉      400 克
泡打粉          5 克
糖霜              50 克
鹽                  少許
固體菜油      110 克
蛋液              1 隻份量
無糖豆漿      約 100 毫升
蔥                  1 棵
三色椒          30 克

- 蔥洗淨後切成蔥花；三色椒洗乾淨，去蒂去籽後，切成幼粒，備用。

- 粉類、糖霜及鹽混合好，過篩 3 次，之後加入固體菜油，用手指捽成麵包糠狀。

- 加入蛋液均勻混合，再倒入豆漿，輕手搓成麵糰。

- 加入蔥花同彩椒粒，均勻混合於麵糰內，之後略滾圓。

- 將麵糰放入已撲粉嘅不銹鋼兜內，冚上保鮮紙，放入雪櫃，鬆弛 20 分鐘。

- 入爐紙上撒上乾粉，放上麵糰，再撒上少少乾粉，用另一邊入爐紙覆蓋麵糰，之
   後用擀麵棍將麵糰擀至約 2 厘米厚。

- 將麵糰切件，分散排開喺入爐紙上，之後連整張入爐紙一齊移到烤盤上。

- 麵糰表面掃上蛋液，之後放入已預熱至 200 °C 嘅焗爐內焗 20 - 25 分鐘。

- 出爐後將烤餅放上架上攤凍，即可享用。

食譜參考自張朝順嘅《新手不敗烘焙》。

入爐焗咗一陣間已經聞到好香蔥味，等到我好心急呀！
點知出爐後又見到焗到咁金黃，口水即刻係咁流喇！

 

今次呢個鹹味 scone 用三文魚醬伴食，好味到呢 ……… ！
呢個 scone 肯定 encore、encore、再 encore！！
真係又香又好食！！！



 

Notes：
- 原食譜材料係用牛油、牛奶及100 克糖粉 ，無落到鹽。

- 記得落蛋液搓麵糰之前要留起適量蛋液作掃面用，否則又要用多隻蛋。

- 豆漿千祈唔好一次過落哂，因為水份過多就無法做出鬆化嘅烤餅，而且仲要留意
  甜椒係會有少量水份滲出，所以寧願到最後真係唔夠水份先至加。

- 盡可能避免將麵糰搓得過度，一但成糰就要停手，否則成品會實而唔鬆。