2010年7月18日星期日

香蔥甜椒英式烤餅 Spring Onion & Capsicum Scone

        每次整嚫 scone 會用果醬伴食,所以每次都係甜味scone,但今日就參考一個食譜,整咗個色彩繽紛鹹味 scone,非常好食!

        其實我呢個食譜已經手好耐,不過因為三色椒用量比較少,所以一直等到有機會用到三色椒煮餸時,先至留起少部份用嚟整呢個 scone。



材料:
低筋麵粉     
400 克
泡打粉          5 克
糖霜              50 克
鹽                  少許
固體菜油      110 克
蛋液              1 隻份量
無糖豆漿      約 100 毫升
蔥                  1 棵
三色椒          30 克


- 蔥洗淨後切成蔥花;三色椒洗乾淨,去蒂去籽後,切成幼粒,備用。

- 粉類、糖霜及鹽混合好,過篩 3 次,之後加入固體菜油,用手指捽成麵包糠狀。

- 加入蛋液均勻混合,再倒入豆漿,輕手搓成麵糰。

- 加入蔥花同彩椒粒,均勻混合於麵糰內,之後略滾圓。

- 將麵糰放入已撲粉嘅不銹鋼兜內,冚上保鮮紙,放入雪櫃,鬆弛 20 分鐘。

- 入爐紙上撒上乾粉,放上麵糰,再撒上少少乾粉,用另一邊入爐紙覆蓋麵糰,之
   後
擀麵棍將麵糰擀至約 2 厘米厚。

- 將麵糰切件,分散排開喺入爐紙上,之後連整張入爐紙一齊移到烤盤上。

- 麵糰表面掃上蛋液,之後放入已預熱至 200 °C 嘅焗爐內焗 20 - 25 分鐘。

- 出爐後將烤餅放上架上攤凍,即可享用。

食譜參考自張朝順嘅《新手不敗烘焙》。




入爐焗咗一陣間已經聞到好香蔥味,等到我好心急呀!
點知出爐後又見到焗到咁金黃,口水即刻係咁流喇!

 




今次呢個鹹味 scone 用三文魚醬伴食,好味到呢 ………
呢個
scone 肯定 encore、encore、再 encore!!
真係又香又好食!!!




 



Notes:
- 原食譜材料係用牛油、牛奶及100 克糖粉 ,無落到鹽。


- 記得落蛋液搓麵糰之前要留起適量蛋液作掃面用,否則又要用多隻蛋。


- 豆漿千祈唔好一次過落哂,因為水份過多就無法做出鬆化嘅烤餅,而且仲要留意
  甜椒係會有少量水份滲出,所以寧願到最後真係唔夠水份先至加。

- 盡可能避免將麵糰搓得過度,一但成糰就要停手,否則成品會實而唔鬆。

 

6 則留言:

  1. 吞拿鱼都ok呱
    [版主回覆07/18/2010 22:14:00]        妳意思係加入吞拿魚一切整,定係用吞拿魚做抹醬伴食呢?

    回覆刪除
  2. 好似好好味咁喎 !
    [版主回覆07/19/2010 16:13:00]        唔係好似,係直情好好味,加埋妳俾我個樽三文魚醬仲正!         原本我想拎件過 嚟俾妳試 o架,點知大少姐又話唔上堂,我依家已經放 咗上冰格喇, 妳唔介意的話,我可以下次帶埋過 嚟 o架!真係好好食!

    回覆刪除
  3. 好似好好食  顏色好靚
    應該好香  我幾時有機會食啊
     
    [版主回覆07/20/2010 01:33:00]        香到痺呀!!         下次妳過 嚟睇考試歌時整俾妳食啦!

    回覆刪除
  4. 呢隻三文魚醬好好味架?  下次買嚟試吓先
    加無糖豆漿又幾特別喎, 等齊材料又試吓先
    [版主回覆07/20/2010 01:37:00]        其實味道同食三文魚一樣,不過我自己稍嫌鹹 咗 啲。         因為我唔飲奶 o架嘛,所以咪用豆漿代替囉。查實好多時整 嘢 我就咁落水就算。

    回覆刪除
  5. 嘩.........正成咁........引到我呢! 一定...一定...一定...一定...一定...一定...一定...一定...一定...要試呀!不過我會加少少火腿囉......仲正呀!
    [版主回覆07/20/2010 02:17:00]        咁快 啲整啦,真係好食到震呀!肯定好食過汽水 scone 呀!!我都知妳會有興趣整呢個 o架喇,之前都見妳話鍾意食 scone,所以咪專登 post 上 嚟引 吓妳囉!         我今日準備整香蔥火腿包喎,到時再引多妳一次先!

    回覆刪除
  6. 鹹既好過甜既多多聲啦....又豐富多料...當正餐食都得...
    [版主回覆07/24/2010 16:33:00]         係呀,我依家放 咗 喺冰箱,隨時解凍 嚟 做早餐。

    回覆刪除