四色冬瓜湯

        上個禮拜老豆又捧咗個大冬瓜返嚟，當然，比起街市賣果啲冬瓜，仲差好遠啦，起碼我老豆能夠喺農場捧到返屋企！

        個瓜大到根本一次食唔哂，所以今日先用一半嚟煲湯，加埋另外三種顏色嘅菜蔬，包括粟米、紅蘿蔔同馬蹄，樣樣都係甜嘅材料，所以即使係齋湯都好清甜，唔會清淡無味。

材料：
冬瓜
紅蘿蔔
粟米
馬蹄
薏米
陳皮

- 冬瓜洗乾淨外皮，切開後去瓤，連皮切件；紅蘿蔔刨皮後用滾刀切件。

- 粟米去衣、去鬚，略沖洗後切件；馬蹄先沖走表面啲泥，之後去皮，備用。

- 薏米用水浸至發大，沖洗乾淨；陳皮用熱水浸軟，之後刮瓤，洗淨備用。

- 所有材料凍水落煲，煲好後落鹽調味即可享用。

呢個湯清甜、清熱又消暑。

你哋睇，個冬瓜真係唔細 o架！

Notes：
- 若果唔嫌麻煩的話，可以將粟米衣同粟米鬚洗淨一齊煲，因為喺中醫角度，兩種
  材料同樣都有食療功效。

- 馬蹄去皮後可先浸水，以防止變色。

- 唔習慣飲齋湯嘅朋友可加瘦肉或豬腱煲湯。