蔥花大鍋餅

        因為知道噚晚做完《七月大荳芽》之後，一定會好夜先返到屋企，所以一早已經將今日嘅學生調咗堂，咁就唔駛早起身出門教琴啦！所以今日就變咗 dayoff，比較得閒，咁所以今晚我就整咗個蔥花大鍋餅做晚餐。

        做呢個大鍋餅好特別，係我從來都無諗過可以咁樣去做包餅，你哋陣間睇完個食譜之後，你哋都會有同感。呢個大鍋餅認真健康，搓麵糰時已經無落油搓，到烘餅時係用乾烙方式去烘，隻鑊同樣一滴油都唔落，對於我嚟講，真係正到痺！！不但食落口唔會覺得油膩，連洗鍋都慳功夫好多，正！

材料：
麵粉          250 克
酵母          3 克
泡打粉      3 克
梳打粉      2 克
糖              30 克
鹽              5 克
蔥花          10 - 20 克
水              90 - 100 毫升

 

- 將 200 克麵粉及其餘所有材料拌勻，之後將水逐少倒入，邊倒邊用筷子拌勻成
  雪花狀。

- 之後用手搓成光滑麵糰，包好保鮮紙，發酵 1 個鐘以上，麵糰會發大約兩倍。

- 麵糰攤平，喺剩低果 50 克乾粉度，攞少少灑上麵糰，之後搓勻。

- 不斷重覆以上步驟，每次逐少加入乾粉，直至搓成較乾身、硬淨嘅麵糰。

- 將麵糰滾圓，稍為扭緊收口，之後將佢輕輕按入麵糰內。

 

 

- 擀麵棍及枱上灑上乾粉，放上麵糰，壓扁後將麵糰擀平至直徑約 25 厘米。

 

- 燒熱平底鑊，放入麵糰，用竹簽喺麵糰上刺孔，之後冚上鑊蓋，用最慢火烘烙。

- 5 分鐘後，將麵糰旋轉 180 °，繼續烘多 5 分鐘。

 

 

- 將麵糰翻轉，之後冚上鑊蓋，繼續慢火烘烙。

- 同樣 5 分鐘後就將麵糰轉 180 °，重複同樣步驟直至個餅烘熟，並且表面金黃。

- 將大鍋餅盛起，略為攤凍後就可以切件上碟。

食譜係嚟自《餅 II》。 

 

可能因為麵糰擀得過扁，所以有部份比較乾硬。

 

Notes：

- 整中點時所用嘅麵粉係中筋麵粉，若果無的話，可用 1：1 嘅低筋麵粉同高筋麵
  粉代替。

- 初時麵糰係會比較濕潤，有少少黏手，到發酵完成後逐少加入乾粉去搓，情況就
  會改善。

- 烘烙時將麵糰旋轉 180 °，可以令麵糰受熱更均勻。

- 用手將麵糰翻轉時，小心燙傷手，因麵糰係會好熱。

- 底面兩面每邊各烘烙 3 次，麵糰大致已經烘熟。