香蔥火腿稞麥包 Spring Onion & Ham Rye Bread

        上次煲木耳姬松茸海參螺頭湯時，因為海參要用薑蔥水汆水，所以專登走去買半斤菜，等阿姐搭條蔥，估唔到阿姐好重手，一次過俾咗幾棵我，用咗兩棵嚟汆水之後，前日又用咗棵嚟整香蔥甜椒英式烤餅，都仲係有剩，今日就用埋剩低果兩棵嚟整麵包，費事再擺咁耐喇！

        Motonako.A 睇到我個香蔥甜椒 scone，即刻口水係咁流，佢仲話會加埋少少火腿落去整，無獨有偶，我都一早買定火腿整包包，一於再次引死佢至得！

材料：
高筋麵粉      175 克
稞麥粉          75 克
鹽                  5 克
蜜糖              5 克
即用酵母      6 克
水                  約 157 克
火腿              1 塊
蔥                  2 棵

以上材料份量可做 5 吋長小型麵包 2 個。

今次參考咗王宏《歐陸健康麵包》個黑稞麥麵糰嘅材料比例及做法，然後自己再加入火腿同蔥。

- 蔥洗乾淨，切成蔥花；火腿放入焗爐內，用 180 °C 烤焗 ( grill ) 至稍為乾身、有
  香味及表面金黃。

烘香過嘅火腿，質感同味道跟煎香煙肉分別唔大，但就健康好多。

- 除火腿同蔥花外，將所有材料混合好，搓成光滑麵糰。

- 將麵糰壓扁，放上火腿同蔥花，搓揉至材料完全混合，冚上保鮮紙發酵 20 分
  鐘。

- 將麵糰四邊向內翻摺，再次冚上保鮮紙發酵多 15 分鐘。

- 麵糰分割成兩份，排氣後用手搥打麵糰，盡量將麵糰空氣排出。

- 之後將麵糰做形，放上已墊入爐紙嘅烤盤上發酵到約 2 倍大。

- 發酵完成後，預熱焗爐至 220 °C，喺麵糰表面噴水。

- 將麵糰放入爐內，噴蒸氣，先焗 15 - 20 分鐘至表面轉色。

- 將爐溫降至 200 °C，再噴多次蒸氣，焗多 15 - 20 分鐘即可。

啲蔥焗完之後顏色深咗好多，唔靚仔！

 

焗緊嘅時候已經香氣滿屋，我喺房打緊呢篇 blog 時都聞到香味。

包肉果然扎實，好 "襟" 飽！

Notes：
- 記得水唔好一次過落哂，因為稞麥麵糰係會比較濕，要慢慢加水控制濕度。

- 根據食譜，用手搥打麵糰，盡量將麵糰空氣排出，可以令麵包質地更加扎實。

- 如果焗爐無蒸氣功能的話，可打開爐門直接噴水入內製造蒸氣。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！