木耳姬松茸海參煲螺頭湯

        記得媽咪知道自己就快要離開我時，有一日佢趁自己精神比較好，就發定哂所有海參。當然，當時嘅佢已經再無氣力去做呢個繁複工序啦，所以佢就親自 "督師"，由我去落手落腳整，因為佢知道我根本唔識做呢樣嘢，而佢又知道喺嚟緊嘅日子再唔可以好似以往咁照顧我，所以就一次過將屋企所有海參發好哂，之後放上冰格，等我以後可以隨時拎番出嚟解凍食用。

        因為一次過發哂所有海參，所以真係有好多好多條，之前都已經俾咗幾條伯伯同伯娘，就係因為咁，伯娘都知道我冰格有好多海參放喺度，所以佢成日都叫我快啲整咗佢嚟食，唔好擺太耐，而且佢話海參好有益，叫我等閒就用嚟煲湯飲，對身體好好。

        今日係我首次用海參嚟煲湯呀！

材料：
海參
螺頭
瘦肉
木耳
淮山
茨實
靈芝片
姬松茸
陳皮
蜜棗

- 淮山、茨實及靈芝片用熱水浸 1 個鐘，之後洗淨，備用。

- 姬松茸、陳皮用水浸軟後洗淨，陳皮刮瓤；蜜棗沖洗乾淨。

- 瘦肉洗乾淨後汆水，之後用凍水沖洗多餘血水。

- 螺頭解凍後，喺中間切開清除內臟，之後洗乾淨。

- 木耳先用水浸發、洗乾淨，剪去硬底部份；海參發好後，清除內膜。

- 煲滾水，放入薑蔥煲一陣，之後將木耳、海參、螺頭逐一汆水，然後過冷河。

- 所有材料預備好，全部凍水落煲，煲好後加鹽調味，即可享用。

清甜中帶點姬松茸嘅香氣。

 

要 "撈" 嚿海參上嚟影相都唔易，因為大部份都已經煲溶哂，
所以湯水已經充滿咗海參同木耳嘅膠質。

Notes：
- 若螺頭表面有黑色物質，可用牙刷洗刷乾淨。

- 所有藥材最好用熱水浸 1 個鐘後先清洗，有助將製藥時所用嘅化學物質溶於水
  中。

- 浸姬松茸嘅水可以一併加入煲湯，因為有濃郁香味。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！