扁豆赤小豆西施骨煲老黃瓜

        今日又係用扁豆赤小豆煲湯，繼續去濕呀！不過今次就用嚟煲豬骨同老黃瓜。

        老黃瓜又係我嘅至愛之一，好鍾意佢果種好清新嘅感覺，同青瓜感覺一樣。由細到大，我都總係覺得老黃瓜其實係老咗嘅青瓜，不單只味道相似，就連切開裡面啲瓤都一模一樣咁滯。另外，我諗大家都應該知道國語人都係叫青瓜做黃瓜嘅，所以好有理由相信兩者其實係同一樣嘢。

        噉鍾意食青瓜嘅我，自然都好鍾意飲老黃瓜煲嘅湯啦！直覺上覺得用老黃瓜煲湯可以清熱，所以今日煲呢個湯真係去濕又清熱 o架！

材料：
老黃瓜
西施骨
豬橫脷
炒扁豆
赤小豆
陳皮

- 扁豆同赤小豆洗乾淨，用水浸過夜；陳皮用熱水浸軟，刮瓤、洗淨備用。

- 西施骨洗乾淨後汆水，之後用水沖洗乾淨多餘油脂及血水。

- 老黃瓜用牙刷洗刷乾淨外皮，之後開邊、去瓤，切件備用。

- 除豬橫脷之外，其餘材料全部凍水落煲，之後照一般煲湯方法煲好。

- 豬橫脷切去底部中央白色物質，洗淨切件。

- 將湯煲番滾，之後落埋豬橫脷，煲多 10 - 15 分鐘就攪掂。

- 飲用前落鹽調味。

好清甜呀！

Notes：
- 揀老黃瓜時，最好揀啲瓜皮比較多紋嘅，代表瓜夠老身；另外重身嘅瓜代表水份
  充足。

- 西施骨可用其他豬骨代替，甚至用豬腱或瘦肉煲都可以。

- 因為豬橫脷比較易熟，所以只需煲短時間，情況同豬膶差唔多。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！