冬瓜甜粥

        星期一用咗半個 "大冬瓜" 嚟煲四色冬瓜湯，今晚就用埋剩低果一半煲粥。

        後日係大暑，好多人都會買包袪濕料嚟煲冬瓜水消暑，但係唔知點解，我由細到大都唔係咁鍾意飲，即使落咗鹽都覺得好寡，飲完之後總係覺得口淡淡咁。但係好彩，以前媽咪有時都會用同樣嘅料嚟煲甜粥，咁就梗係好好多啦，我即刻食多幾碗㖭呀！！

        嚟緊兩日由朝到晚都要出去教學生，唔得閒煲冬瓜水，今晚就提早 "應節"，煲番媽咪煲過嘅冬瓜粥做晚餐。

材料：
冬瓜
米
袪濕料一包
片糖

- 冬瓜洗淨外皮，連皮切細件；米洗乾淨備用。

- 袪濕料略沖洗，放入煲湯袋內，放滾水內煲至出味，之後將袪濕料整袋拎出。

- 將米同冬瓜一齊放入煲成粥。

- 另煲滾水，放入片糖煲成糖水，之後倒入粥內拌勻，再次煲番滾即成。

一邊消暑，一邊重溫兒時味道。

Notes：
- 如果鍾意的話，可將袪濕料內嘅薏米、扁豆同赤小豆留煲內一齊煲粥。

- 米一定要等水滾時先落煲，咁就容易煲爛至開花狀。

- 片糖可用糖冬瓜代替。