TVB 搵 Miss Cheng 做節目頭炮嘉賓

        前幾日喺 Facebook 度見到 Miss Cheng upload 咗段片，原來 TVB 高清台個新節目《創業打天下》搵咗佢打頭陣，做第一集嘉賓，節目係介紹一啲事業成功嘅女性。真係估都估唔到，一個財經台嘅節目，居然第一集就同大家講藝術，妙！

        啱啱睇完段片，好有感覺，有好多 idea 都真係無諗過，從中都得到一啲啟發。片段中仲錄影到 Miss Cheng 返中大教學嘅片段，當然更加有感覺啦，因為自己都係中大音樂系畢業 o架嘛，所以對拍攝到周圍嘅環境，以及音樂系嘅教學地方，都感覺到好親切。但最意想不到嘅係，竟然仲去埋 Miss 屋企錄影 o添，連 Aaron 兩兄弟都有上鏡講幾句嘢呢！

        一直以嚟，我都唔係一個 "好運" 人，"衰嘢" 就實有我份！！但係喺我學習音樂嘅過程中，往往都會遇到個好老師，所以媽咪以前都講過，話我喺學音樂呢條路上面都算係好好彩，個個老師都不但有經驗、有一定資歷，而且仲好好人，對我好好。所以其實我一直都好想學番聲樂同鋼琴，不過，呢樣 "玩意" 都真係幾講求時間同金錢囉！暫時嚟講，呢一刻我兩方面都負擔唔起，希望遲啲可以 "還心願" 啦！