早前喺 Facebook 度見到一位前學生 post 咗一啲去北海道睇雪祭嘅相片，我好奇咁問吓佢係咪去日本玩，點知佢嘅回覆除咗係 "係呀" 之外，仲加多句 "我買咗份手信俾你"，當時都無乜特別感覺，以為佢係隨口講句，唔係真，因為佢其實係九年前已經考完八級，之後因為讀大學時功課忙、又要住宿舍，無時間練琴，所以已經停學，而且喺呢段期間，我哋根本完全無聯絡，即使喺 Facebook 度都無任何文字來往，只係間中 "like" 吓對方，所以絕對估唔到，九年後嘅今日，佢真係帶埋份手信嚟我屋企拜年，真係超開心呀，而且嗰種開心係非筆墨所能形容，完全係盡在不言中！
Ryan 帶來的和菓子，雖然實質重量非常之輕，但對我嚟講，
份心意真係重到我無法拎起呀！！
其實 Ryan 一向都係比較沉默寡言，就算同我識咗咁耐，由中一開始跟我學琴，學到佢自己都已經讀緊大學，佢每次同我傾偈時都總會帶點靦腆，所以我真係點都估唔到佢去旅行都會記得買份手信俾我！講真，佢對我呢份尊敬、尊重，絕對比起佢彈琴彈得好來得更加開心、更加感動！
Ryan 依家都已經三字出頭，出嚟做嘢都已經有六、七年時間，做老師嘅我，雖然只係大佢幾年，都真係唔認老都唔得喇！！所以佢嚟拜年當日，我哋倆個不其然講番好多 "往事"，我仲講笑咁講，做乜我哋倆個四字頭都未有就猛喺度 "講舊事" 呀，！！
始終都係嗰句，越 "大年紀" 嘅學生，越係懂得尊師重道，我同 Miss Cheng 嘅關係跟我同 Ryan 一樣，年紀同樣都只係差少少，但我一直都係當佢係我老師、前輩咁尊敬，彼此亦師亦友，相信呢份尊重，我都幾難可以喺依家十零廿歲嘅學生身上搵得到，佢駁少我兩句嘴、頂少我幾句我都已經阿彌陀彿囉！！
對我嚟講, 份心意多於份禮物
回覆刪除[版主回覆03/06/2013 17:21:34]無錯，班太妳講得啱，依家啲細路完全唔識尊重同珍惜！
大哥你廾歲就教琴喇..利害呀!
回覆刪除[版主回覆03/06/2013 17:20:30]應該係再早啲，中七畢業就教琴喇！
我點厲害呀，如果我厲害就唔使成日擔心收入跌啦！
還記得老師的學生其實唔多,但一定會有,好似我咪一個好念舊情既學生架.你講現在的後生呀我馬立無言........................!
回覆刪除[版主回覆03/11/2013 13:24:57]
[緊張大師-小女人回覆03/11/2013 08:47:01]我讚同
[版主回覆03/06/2013 21:45:38]我都無哂言，只用行動表示：
呢個學生真係窩心，可能你教得好，我仔仔都16歲先開始學琴，估唔到佢又幾有興趣噃
回覆刪除[版主回覆03/11/2013 13:18:18]係呀，彈慣電子琴真係唔多適應鋼琴 touching，如果要彈三角琴就更加用唔到力。
妳搵朋友介紹相熟公司咪安心囉，仲可以親自上去揀琴，希望妳可以搵到部好琴啦！
[MOONmoon 如月回覆03/11/2013 06:07:55]我明白，不過未搵到合適的二手琴，我覺得佢手勢會學壞，因為家中的係電子琴，希望盡快買到個琴俾佢
[版主回覆03/10/2013 23:34:49]到咗 6 級打後，最好都係屋企有部鋼琴呀，不但可以就到自己時間隨時隨地練琴，而且因為樂曲篇幅開始越來越長，需要更多時間練習，雖然我都有學生係屋企無琴，但進度明顯比有琴的學生慢好多，變相浪費時間同學費囉！妳知啦，查實喺香港學琴，學費都唔平㗎嘛！
[MOONmoon 如月回覆03/08/2013 06:17:50]佢而家5級，不過家中未有一個合適的琴
[版主回覆03/08/2013 02:10:08]咁我都認為好多時都係雙方嘅！
你囝囝咁大先學琴，應該已經好清楚知道自己真係有興趣先會學，絕對唔係玩玩吓。佢依家學到幾級呀？叫佢加油呀！！
盡在不言中⋯物輕情義重!份心意最重要!!
回覆刪除[版主回覆03/10/2013 01:45:11]絕對認同！
老師無論係點, 都值得被尊重...
回覆刪除[版主回覆03/10/2013 01:46:05]但係依家呢一代真係唔多識呢樣嘢囉！
如果係我, 簡直感動到
回覆刪除[版主回覆03/10/2013 01:46:48]我都係啦，真係完全無諗過呀！
真係感動。做老師呢份工其中一樣既優點，就係比人感受多一份人情味。
回覆刪除[版主回覆03/11/2013 13:27:23]絕對讚同！不過唔係個個都做到囉！