2013年3月5日星期二

超級勁感動的和菓子

早前Facebook 度見到一位前學生 post 咗一啲去北海道睇雪祭嘅相片,我好奇咁問吓佢係咪去日本玩,點知佢嘅回覆除咗係 "係呀" 之外,仲加多句 "我買咗份手信俾你",當時都無乜特別感覺,以為佢係隨口講句,唔係真,因為佢其實係九年前已經考完八級,之後因為讀大學時功課忙、又要住宿舍,無時間練琴,所以已經停學,而且喺呢段期間,我哋根本完全無聯絡,即使Facebook 度都無任何文字來往,只係間中 "like" 吓對方,所以絕對估唔到,九年後嘅今日,佢真係帶埋份手信嚟我屋企拜年,真係超開心呀,而且嗰種開心係非筆墨所能形容,完全係盡在不言中




Ryan 帶來的和菓子,雖然實質重量非常之輕,但對我嚟講,
份心意真係重到我無法拎起呀!!








其實 Ryan 一向都係比較沉默寡言,就算同我識咗咁耐,由中一開始跟我學琴,學到佢自己都已經讀緊大學,佢每次同我傾偈時都總會帶點靦腆,所以我真係點都估唔到佢去旅行都會記得買份手信俾我!講真,佢對我呢份尊敬、尊重,絕對比起佢彈琴彈得好來得更加開心、更加感動!

 Ryan 依家都已經三字出頭,出嚟做嘢都已經有六、七年時間,做老師嘅我,雖然只係大佢幾年,都真係唔認老都唔得喇!!所以佢嚟拜年當日,我倆個不其然講番好多 "往事",我仲講笑咁講,做乜我倆個四字頭都未有就猛喺度 "講舊事" 呀,!!

始終都係嗰句,越 "大年紀" 嘅學生,越係懂得尊師重道,我同 Miss Cheng 嘅關係跟我同 Ryan 一樣,年紀同樣都只係差少少,但我一直都係當佢係我老師、前輩咁尊敬,彼此亦師亦友,相信呢份尊重,我都幾難可以喺依家十零廿歲嘅學生身上搵得到,佢駁少我兩句嘴、頂少我幾句我都已經阿彌陀彿囉!!


8 則留言:

  1. 對我嚟講, 份心意多於份禮物
    [版主回覆03/06/2013 17:21:34]無錯,班太妳講得啱,依家啲細路完全唔識尊重同珍惜!

    回覆刪除
  2. 大哥你廾歲就教琴喇..利害呀!
    [版主回覆03/06/2013 17:20:30]應該係再早啲,中七畢業就教琴喇!
    我點厲害呀,如果我厲害就唔使成日擔心收入跌啦!

    回覆刪除
  3. 緊張大師-小女人2013年3月6日 下午6:50

    還記得老師的學生其實唔多,但一定會有,好似我咪一個好念舊情既學生架.你講現在的後生呀我馬立無言........................!
    [版主回覆03/11/2013 13:24:57]
    [緊張大師-小女人回覆03/11/2013 08:47:01]我讚同
    [版主回覆03/06/2013 21:45:38]我都無哂言,只用行動表示:

    回覆刪除
  4. 呢個學生真係窩心,可能你教得好,我仔仔都16歲先開始學琴,估唔到佢又幾有興趣噃
    [版主回覆03/11/2013 13:18:18]係呀,彈慣電子琴真係唔多適應鋼琴 touching,如果要彈三角琴就更加用唔到力。
    妳搵朋友介紹相熟公司咪安心囉,仲可以親自上去揀琴,希望妳可以搵到部好琴啦!
    [MOONmoon 如月回覆03/11/2013 06:07:55]我明白,不過未搵到合適的二手琴,我覺得佢手勢會學壞,因為家中的係電子琴,希望盡快買到個琴俾佢
    [版主回覆03/10/2013 23:34:49]到咗 6 級打後,最好都係屋企有部鋼琴呀,不但可以就到自己時間隨時隨地練琴,而且因為樂曲篇幅開始越來越長,需要更多時間練習,雖然我都有學生係屋企無琴,但進度明顯比有琴的學生慢好多,變相浪費時間同學費囉!妳知啦,查實喺香港學琴,學費都唔平㗎嘛!
    [MOONmoon 如月回覆03/08/2013 06:17:50]佢而家5級,不過家中未有一個合適的琴
    [版主回覆03/08/2013 02:10:08]咁我都認為好多時都係雙方嘅!
    你囝囝咁大先學琴,應該已經好清楚知道自己真係有興趣先會學,絕對唔係玩玩吓。佢依家學到幾級呀?叫佢加油呀!!

    回覆刪除
  5. 盡在不言中⋯物輕情義重!份心意最重要!!
    [版主回覆03/10/2013 01:45:11]絕對認同!

    回覆刪除
  6. 老師無論係點, 都值得被尊重...
    [版主回覆03/10/2013 01:46:05]但係依家呢一代真係唔多識呢樣嘢囉!

    回覆刪除
  7. 如果係我, 簡直感動到
    [版主回覆03/10/2013 01:46:48]我都係啦,真係完全無諗過呀!

    回覆刪除
  8. 真係感動。做老師呢份工其中一樣既優點,就係比人感受多一份人情味。
    [版主回覆03/11/2013 13:27:23]絕對讚同!不過唔係個個都做到囉!

    回覆刪除