恐龍蛋

        之前喺有線新知台嘅《60分鐘真人蘇》其中一集睇到阿蘇介紹北角同銅鑼灣嘅生果店賣恐龍蛋同綠寶石，阿蘇一味贊不絕口咁話好好食 ( 有時都懷疑佢係咪做媒！) 不過賣好貴一個 (exactly 幾錢就真係唔記得喇 ，好似話係幾十蚊一個啩 )，所以心諗都係得個睇字，一來我實唔捨得買嚟試，二來要長途跋涉咁過到去港島果邊先有得賣，唉，慳啲啦！

       點知最近周街都有得賣，連蝴蝶村街市都有，而且又唔貴，$11有 5 個，不過我諗未必係美國原裝入口，係內地貨色先至可以賣咁平。

        張 lable 上面英文啲 gramma 好似有錯，應該係 "Product of USA" 而唔係 "Produce of USA"，所以我懷疑係大陸貨，佢哋想整張 lable 扮美國入口，但又串錯字，唔通啲美國佬都串錯？或者係我英文水平差啦，真係有呢種寫法都唔定呀！

        唔緊要啦，就買嚟試吓有幾好食。初初仲以為係一啲新品種嘅水果，原來都係布冧 / 李之類嘅物體，不過就完全唔同食法，好清甜，好爽脆，唔似布冧咁酸酸哋、腍腍哋，好食好多，我諗我以後都唔會再買布冧 食，改食恐龍蛋喇！