送俾 Winnie 嘅回禮：草莓果醬 & 草莓果醬曲奇

        之前 Winnie 送咗個銀包俾我，所以我一直都諗緊買番啲乜送俾佢，唔通又係 Hello Kitty 咩！咁攪法，佢就嚟成屋都係 Hello Kitty，連廁紙都係喇！！

        諗咗好耐，最終決定送自家製嘅果醬同曲奇俾佢，雖然唔係啲咩值錢嘢，但係就誠意搭夠，反正上次同佢提過話想整果醬曲奇，見佢都幾有興趣，希望佢鍾意啦！

將草莓果醬同草莓果醬曲奇包裝一下，就成為咗送俾 Winnie 嘅回禮喇！

 

上次去「無印良品」買煎 pan 送俾 Louisa 時，順便買埋呢兩包
糖俾 Winnie。

        其實每次閒逛「無印良品」時，我都必定會幫佢買呢隻柚子金橘糖，因為呢隻 "酸精" 好鍾意食呢隻糖 o架！今次見到有檸檬蘆薈糖，應該都係酸 o架啦，所以都買埋俾佢啦！