菠菜莎樂美鹹蛋糕 Spinach & Salami Cake

        原來圖書館都有唔少鹹蛋糕食譜，今次又借咗本返嚟參詳參詳，呢本食譜比起之前我整過嘅鹹蛋糕食譜更加好，唔使用淡忌廉，更加健康之餘又可以用少樣材料。 
 
 

材料：
菠菜             適量
莎樂美腸      適量
低筋麵粉      100 克
高筋麵粉      50 克
泡打粉         2 茶匙
雞蛋             3 隻
橄欖油         4 湯匙
水                2 湯匙
鹽                2 小撮
黑椒            少許

- 菠菜洗淨後只摘取菜葉，並將之略切細，之後放油鑊內炒至軟身，盛起攤凍待用。

- 莎樂美腸切細塊；粉類混合好，過篩 3 次，然後留起 1 湯匙加入菜葉及腸內拌勻。

- 雞蛋拂打成蛋液後加入油，略為拌勻，之後加入水、鹽及黑椒混合。

- 篩入粉類，用膠刮以切拌方式攪拌成麵糊，再將菜葉及腸拌入。

- 將麵糊倒入已牛油紙嘅蛋糕模內，喺枱面輕敲兩次，釋出大氣泡及令麵糊均勻分佈。

- 放入已預熱至 180 ℃ 嘅焗爐內，先焗約 10 – 15 分鐘至麵糊表面凝固半硬。

- 用刀沾點水，喺麵糊表面中央處割一直紋。

- 放番入爐，用 170 ℃ 焗約 30 分鐘至蛋糕全熟。

以上材料份量可做 9 厘米 X 18 厘米 X 6 厘米蛋糕 1 條。

 
食譜參考自三宅郁美嘅《法式鹹蛋糕 & 磅蛋糕》。
 

手頭上有咩料就用咩料整，前兩日炒菠菜時，

特登留起小量菜葉，再喺冷宮度搵番

莎樂美腸出嚟就可以開工。

 

 

 

 

 

 

 

反正都係開爐，唔好浪費能源，順手

焗多條合桃香蕉全麥蛋糕先！

 


 
 

Notes：
- 原食譜係用牛奶同菜油，我用水及橄欖油代替。

- 將麵粉加入菜葉及腸內拌勻，可以更容易與麵糊拌勻，防止沉底。

 

- 割紋除咗可以令蛋糕爆得更加靚之外，亦可讓麵糊有足夠空間膨脹。