涼瓜兩食

        每年一踏入夏天，有幾種瓜我都必定會食，包括青瓜、老黃瓜、苦瓜同絲瓜，而當中嘅苦瓜，我由細個已經開始鍾意食，係咪好少見呢？

  

       記得好耐以前媽咪同老竇返鄉下時，姨媽一家同佢哋去酒樓食飯，媽咪話食過一道菜叫炒涼瓜皮，非常好食，好爽口，因為只係將苦瓜最外層凹凸表面切落嚟快炒，所以特別爽脆。呢件事我記到今時今日，之前其實都好想煮，但係諗吓都要買好幾個苦瓜先可以湊夠一碟餸，都幾煩，所以一直都無煮。 

 

 

近排喺街市度見到呢隻苦瓜 (可能係之前無留意到)，同以往

見慣見熟嘅長形苦瓜及雷公鑿唔同，呢款比較似台灣

白苦瓜，問菜檔阿姐有咩特別，佢話呢隻苦瓜

比起雷公鑿爽好多，要嚟炒比較爽口好食。

呢度兩大隻苦瓜盛惠 $10 。

  

兩隻苦瓜皮切埋都只係得嗰一碟仔，夠鬼食咩！

所以噚日我就用咗嚟炒蛋，入口真係好爽脆。

 

 

 

 

 

淨落嚟嘅苦瓜肉，今晚就用嚟整豉椒涼瓜燜雞翼。