抹茶紅豆糯米糍

        糯米糍都唔係第一次整喇，不過之前嘅做法係好似整湯丸咁，包好哂餡先放滾水內煮熟。今次呢個就試吓先將粉漿蒸熟之後再包餡，以前成日都形住熟粉糰會好黏手，做起上嚟會好呢 hea，但原來都唔係想像中咁差哦！

 

 

材料：
紅豆餡      適量
糯米粉      115 克
粘米粉      20 克
抹茶粉      1 茶匙
糖             40 克
水             240 毫升
椰絲          適量

 

- 將紅豆餡分成數份，放入冰格雪硬。

- 所有粉類與糖拌勻，加入水後攪勻成粉漿。

- 長盤上舖上牛油紙，然後將粉漿倒入。

- 隔水蒸約 20 分鐘至全熟。

- 熟粉糰表面立即灑上薄薄一層椰絲。

- 攤凍後用刀平均分割成 16 份。

- 將雪硬紅豆餡放上粉糰上，包起粉糰後捏緊收口，輕輕搓圓成糯米糍。

 

- 糯米糍表面滾上適量椰絲即成。

 

 

以前有買現成湯丸時特登留起咗個膠兜，估唔到依家

就有用喇！放入冰格時就唔怕會黐埋哂一堆。

第一次咁樣整法，因擔心整起上嚟會好呢 hea，

所以紅豆餡份量寧願少啲，但包好

後就發覺皮多餡少呢！

呢個食譜有樣特別好，就係即使將糯米糍放

入雪櫃雪凍都唔會變到好乾好硬。

 

 

 

 

 

Notes：
- 蒸熟粉糰後表面灑上少量椰絲，可減低將粉糰拎出時互相黏連。

 

- 最好用膠刀切割粉糰，因為唔會黐刀。

- 包餡時記得先戴上膠手套以防黏手。