用液體油脂代替固體油脂整糕餅

        一直以來都對啲 food substitution 嘅網頁好有興趣，因為有好多食材喺香港唔係咁容易買到，即使俾你買到，但可能其實都只係用好少份量，真係唔想為咗用少少又走去買，呢個時候用代替品就最好，試過食譜之後覺得好先再買都未遲，但更重要嘅係，希望學識用唔同嘅食材去代替雞蛋同奶類製品，不但只係因為我唔鍾意奶類製品嘅臊味，食齋日我係連蛋都唔會食㗎！就算唔好話係因為個人問題，用其他天然食材去代替奶類製品某程度上都係有利健康，大家都值得參考一下。

        最近就睇咗唔少關於烘焙包餅時用液體油脂代替固體油脂嘅資料，例如用菜油代替牛油。雖然有好多網頁都有唔同嘅見解，但綜合咗各方面資料，有幾點係比較重要，想同大家分享一下。

1. 由於液體油脂比起固體油脂更能將麵粉粒子完全包住，從而阻礙麵粉嘅吸水能力，因

     此成品質地會比較濕，所以如果用菜油去代替牛油的話，菜油用量只可以係牛油用

     量嘅 3/4，留有少量無被油脂完全包住嘅麵粉粒子可以幫助吸水，對成品質地影響唔

     會咁大。

2. 製作磅蛋糕時，牛油與糖會先混合再打發至發白，做成牛油霜，藉此將大量空氣保留

    喺麵糊內，到入爐烘焗時，麵糊內嘅空氣就會遇熱膨脹，將組織撐大，達到鬆軟效果

    。但液體油脂就無呢種保留空氣嘅能力，所以需要用到分蛋方法，利用蛋白霜去代替

    牛油霜將大量空氣留住。

3. 之前喺《原味鬆餅食譜》中提過，混合材料時必須將濕材料一次過倒入乾材料內快手

    拌勻，做到質地粗疏鬆散嘅效果，但如果係整磅蛋糕的話，質地就要求比較綿密細緻

    ，所以將材料混合時，應該將乾材料分數次拌入濕材料內，做好麵糊之後再拌入蛋白

    霜。

        希望以上資料可以幫到對奶類蛋白過敏嘅朋友、素食者或有需要嘅朋友啦！