黑椒西芹炒粒粒

        好耐都無整過炒粒粒喇，今晚就用咗西芹做主角，再配上黑椒醬，相當惹味。

        其實整炒粒粒一啲都唔難，不過就好鬼煩，淨係將材料洗淨、切粒都已經嘥好多時間，所以整嚫炒粒粒都要預好多時間至得！

材料：
西芹
急凍粟米粒
菜甫
雞蛋
蒜蓉

調味料：
鹽
糖
黑椒醬
紹酒
麻油

- 粟米粒解凍後略略沖洗，之後汆水備用。

- 西芹洗乾淨後切粒；菜甫先浸水，沖洗一下，然後同樣切粒。

- 雞蛋拂打成蛋液。

- 燒熱油，先將蛋液落鑊煎成蛋皮，然後切碎成細塊。

- 蒜蓉起鑊，爆香菜甫，落西芹粒兜炒一陣，灒酒。

- 加小量水，冚上鑊蓋，焗一陣間，將西芹煮到有小小軟身。

- 加入調味料，兜炒一陣，最後倒埋蛋皮落鑊，兜勻所有材料後，立即熄火，並灑
  上幾少少麻油，上碟！

Notes：
- 如果想方便的話，可用罐頭粟米粒代替。

- 想西芹比較腍身，可以喺炒之前先汆一汆水。