2009年12月5日星期六

糖醋排骨菜飯

        之前整過一次上海排骨菜飯,今次就整番個糖醋排骨菜飯先!
 
        平時食糖醋排骨,多數都會用腩排整,但我今次就揀咗用一字排,一來貪佢賣相靚啲,二來因為逢星期六教完琴都懶得落街買餸,所以就預早幾日前買定啲急凍金沙骨,咁就可以行少轉!況且個糖醋汁咁濃,就算用新鮮肉整都食唔出個鮮味啦,因為實俾個汁冚過哂啲鮮味

        正宗嘅糖醋排骨做法應該係先炸後炆,但我就慳功夫,唔將排骨炸過就直接放入糖醋汁料內煮。我自己好滿意個糖醋汁,味道調得啱好,唔會太酸,又唔會過甜。菜飯味道亦啱夠味,而且飯粒清爽又唔會太濕,不過菜就略為腍身,下次可以再遲啲先放落飯煲度煮。


糖醋排骨
 
材料:
急凍一字排 ( 金沙骨)

醃料:

紹酒

汁料:
鎮江醋
生抽
老抽
冰糖
紹酒

- 排骨解凍洗乾淨,瀝乾水份,用醃料醃好,備用。

- 將汁料全部倒入煲內煮滾,之後放入排骨,用慢火將排骨炆腍及將汁收乾就攪
  掂。



菜飯

 
材料:
小棠菜
珍珠米
清雞湯
薑茸

調味料:


紹酒
麻油

- 菜洗乾淨,瀝乾水兼略榨乾水份,之後切碎。

- 燒熱油鑊,爆香薑茸,將菜略炒、灒酒,加鹽、糖調味,灑上麻油後熄火兜勻,
  盛起備用。

- 米洗乾淨後加入清雞湯同煮,煮好後加入已炒熟
嘅菜粒,拌勻即成。
 




咗咁耐,卒之可以開飯喇!

 

       

Notes
- 用冰糖煮糖醋汁,顏色會比較 "ling3" 身有光澤。

- 若排骨已煮好但有好多汁料剩時,可先將排骨盛起,將汁料繼續煮至濃稠,之後
  再將排骨放番入汁料內煮至收汁即可。

- 如果唔想菜飯太濃味,可改以一半清雞湯加一半清水煮飯,或依個人口味調節。


 

3 則留言:

  1. 好黑....好深色....好想食....哈哈哈!
    [版主回覆12/07/2009 14:04:00]        夠深色、夠 "令" 身先至靚仔嘛!妳都整俾妳個大少爺、大小姐同少爺仔食啦!

    回覆刪除
  2. 係幾令喎,一定好好味架啦!
    [版主回覆12/07/2009 23:32:00]        味道幾好,不過俾妳同 Frankie 食可能會覺得唔係好夠味。其實都煮得過火喇,因為要等收汁,所以肉有少少韌。         用冰糖整出 嚟色澤真係靚好多!

    回覆刪除
  3. 我識煮了, 味道是可以的, 但肉身不夠滑, 是否應該要落"生粉"?
    [版主回覆10/02/2012 02:28:12]唔使㗎,呢款肉應該係食落軟腍,妳覺得唔夠滑,應該係豬肉本身比較瘦,下次妳買可以試試揀一些比較脂肪多的。

    回覆刪除