上海婆婆 @ 屯門市廣場

        今日同 Lily 上完堂之後，就同佢一齊出去市廣場間上海婆婆度食 lunch，當然唔少得我老豆個份啦！

        好鍾意佢哋掛喺牆上面果啲畫，啲BB好得意，個個都肥嘟嘟，好 cute 呀！

 

        呢碟就係 Lily 點嘅前菜小食 — 涼拌雞絲粉皮，本來個味都幾好，不過啲花生醬就好濃、好 "杰"，攪到好膠口，唔夠清爽，連食慣濃味嘅老豆都話太過濃啦。

 

        呢個就係我嘅必然之選 — 松子仁雞肉叉子燒餅喇。記得細個果陣，每次去到啲京滬菜食肆，如果有呢個燒餅的話，媽咪就一定會叫俾我同阿馳食 o架啦，因為可以自己放啲餡落個燒餅裡面，又好食、又得意、又好玩嗎，所以上次同 Winnie、Li Kien 嚟食果陣，我一見到就即刻話要，對佢有種情意結！就算媽咪依家唔喺我身邊，我都覺得佢每次都陪緊我一齊食 o架！

        講番個燒餅先，燒餅本身好酥鬆，而且送到埋嚟都仲係熱辣辣，加咗餸入去都唔會整腍個餅。我覺得都好抵食，因為每次我哋將啲餸放入去時都係裝到滿瀉咁滯，但係裝滿哂 4件燒餅後，依然剩番好多餸喺度，每次都係空口食埋佢，所以以 $2X ( 唔記得 exactly 幾錢 ) 嚟計，抵食過佢果啲 "好大隻碗 " 嘅湯麵啦！

 

        呢碟係泡椒黃鱔片，因為第一次同 Winnie 嚟呢度食果陣，我哋叫咗個泡椒雞柳客飯，我覺得好正，於是今次就推介俾我老豆同 Lily試吓呢度嘅泡椒菜式。

        食之前我已經同佢哋講，啲泡椒就唔係好辣，只係好鹹、好酸，反而啲指天椒就好勁，叫佢哋自己小心啲，點知始終都係 "出事 "，Lily 食到面都紅哂，成面標哂汗，急忙搵茶 " 救火！" 於是我就叫佢快啲食番啲菜中和吓啦，佢話嚇到佢唔敢再掂呢碟餸。

 

        用嚟 "救火" 嘅腿茸奶油津白出場啦！！啲菜夠腍，索咗啲汁後仍然好清淡，唔會太濃，又唔會太淡，恰到好處，所以佢哋都話夾埋果碟泡椒鱔片一齊食就啱啱好。

 

        差唔多食到尾聲，見碟泡椒仲有好多汁剩咗喺度，Lily 就話不如叫碗白飯撈埋啲汁，唔好嘥咗佢，於是我就提議叫碗鹹肉菜飯，有特色啲嗎。個飯好香，又唔會太鹹、太油，幾好食啊。

 

        要 round up 呢餐，就梗係唔少得甜品啦！呢個高力香蕉豆沙亦係我嘅必食之選，因為呢樣嘢我係一定唔會整，只會出街食。點解？因為我好怕炸嘢囉，唔知點樣先可以做到外面色澤啱啱好，裡面又唔會未熟，而且炸完嘢後果鑊油都唔知點處置好，唔通倒咗佢咩！所以都係留番出街先食炸物吧。

        其實上次都有食到呢個高力豆沙，不過就麻麻哋，啲蛋白有啲油膩，好 " 漏 "，但係呢次就唔同，好食好多，一啲都唔覺油膩，蛋白柔軟富彈性，Lily 同老豆都贊不絕口呀！唯獨是 Lily 覺得應該用香蕉茸而唔應該整片香蕉放入佢，失色咗少少。

        Lily 雖然話咗今餐佢請，但係埋單時就差唔多 $300，我見咁重皮，於是就叫佢除番 3 份數啦，但係佢話無所謂啦，就當係佢請我哋食聖誕餐喎，好啦，咁多謝哂妳喇 Lily！