羅漢果南北杏煲金銀菜

        星期一先至食完金銀蛋鹹瘦肉粥，今晚又飲金銀菜湯，攪到我哋好似好有錢咁噃，成日用 "金" 同 " 銀 " 入饌，哈哈！

材料：
白菜
菜乾
紅蘿蔔
羅漢果
南北杏
蜜棗
鹽

        白菜、菜乾洗淨備用；紅蘿蔔刨皮，用滾刀切件；羅漢果洗淨後切開幾份；南北杏同蜜棗略沖水，備用。水滾後，將所有材料放落煲度，大滾後轉中慢火繼續煲，之後就無嘢做，等飲湯啦！記得飲之前落鹽調味。

        今日偷懶，唔想攪咁多嘢，所以無落到肉，但又怕唔夠甜，於是就加咗個羅漢果，老豆前幾晚 o訓咗落床之後猛咁咳，飲完呢個湯應該有啲幫助啩！我都幾鍾意羅漢果果種甘甜味，擺咗入真空煲裡面都仲聞到果種甜味，好香呀！