St. Dalfour 無糖果醬

        St. Dalfour 無糖果醬係幾好食，幾乎全部都係果肉，因為無額外加糖，所以唔會太甜。不過，有利就必有弊，因為佢果肉含量相當之高，唔係太有黏性，所以比較難搽落麵包或餅乾度。

        早前係百佳度見到呢隻果醬減價，不過就淨係得呢隻雜莓果醬有得減，唔緊要啦，反正我都未試過呢隻味道。之前曾經有段時間斷咗貨，未斷貨之前賣約 $21至 $22，有番貨之後就賣 $24至 $26，呢次減價就買 $18.9，仲平過斷貨之前，咁就梗會買嚟試吓啦，係咪！