蔥油餅 & 菠菜雞丁薄餅

        今晚無煮飯，煲咗金銀蛋鹹瘦肉粥，我哋屋企慣咗會再炒啲粉麵，或者買啲包點 / 糕點返嚟食，所以我之前就喺吉之島超市買咗塊蔥油餅，再喺商場間惠康裡面嘅東京麵包買咗盒菠菜雞丁薄餅。

        呢兩樣嘢我都好鍾意食，逢星期五喺樂富搭 shuttle bus 上廣播道之前，我都會喺樂富中心間吉之島超市行吓，好多時都會買呢度嘅蔥油餅，因為我真係好鍾意食，連 Winnie 都知道。塊蔥油餅整得好香口，但又唔會太過乾硬，仲好軟熟，恰到好處，而且仲平過屯門間吉之島超市 o添 (樂富賣 $5.5，屯門就要 $6)！不過遲啲再無呢支歌仔唱 lu，因為樂富間 JUSCO 要摺埋，讓位俾 APITA UNY 呀！

        至於菠菜雞丁薄餅就更加係 fans 啦，一來好食，裡面好足料，除咗有菠菜同雞肉，仲有磨菇 o添！二來 "襟" 飽，又唔貴，四件都係 $12 啫，每次最多只係食兩件已經夠哂飽，之前介紹過 Li Kien 食，佢都話好食。遲啲試吓自己整，應該係用類似 pancake / hotcake 嘅麵糊做。

        記得第一次食呢個薄餅，當然又係媽咪買番嚟試食啦，食過番尋味，之後都間唔中買嚟食。因為我同媽咪都唔慣晏晝果餐煮飯食，好多時都係煮粉麵食，有時都會整吓意粉、煮吓通粉咁，間中又會轉吓口味，去惠康買啲壽司、整吓日式冷麵，或者買司華力腸加呢個薄餅就做 lunch 啦，雖然好簡單、好求其，但係最重要嘅係大家都好 enjoy 同對方一齊食嘢、講三講四，無所不談，食乜都變得好開心、好好味，真係好掛住媽咪，好懷念同媽咪一齊吃喝玩樂嘅日子啊！