杏仁蛋糕 Almond Cake

                買咗啲嘢收得好得滯，收埋收埋成日都唔記得咗，到發現時都已經過期甚至變壞，做成浪費！前排打開個櫃搵嘢時先同包 marzipan "重逢"，真係完全無咗件事呢！！的起心肝，就試吓用佢嚟整蛋糕。

                 唔知大家有無睇鄭裕玲個節目，有集佢哋入咗間法國有名嘅糖果店買嘢，當中介紹咗一款糖果就係用 marzipan 整成，賣相非常之靚，色彩豐富，但我估食落口就肯定甜到漏！！

材料：

低筋麵粉            100 克
泡打粉                5 克
雞蛋                    2 隻
杏仁膏                30 克
牛油                     100 克
杏仁片                適量
糖                        60 克
鹽                        少許
雲呢嗱濃縮液      少許
豆漿                    20 毫升

- 粉類過篩兩次；雞蛋拂打成蛋液；杏仁膏用膠刮壓爛；牛油置室溫放至軟身。

- 杏仁片放入已預熱至 140 ℃ 嘅焗爐內焗約 15 分鐘至香味出。

- 將牛油、糖同杏仁膏打發至發白，成為牛油霜，之後加入鹽同雲呢嗱濃縮液拌勻。

- 蛋液分多次逐少加入牛油霜內攪拌混合，再倒入豆漿拌勻。

- 一次過加入粉類，用膠刮以切拌方式拌勻成麵糊後再加入杏仁片，拌勻。

- 將麵糊倒入已墊牛油紙嘅蛋糕模內，並用膠刮掃平麵糊表面。


- 放入已預熱至 180 ℃ 嘅焗爐內，焗約 45 分鐘至麵糊熟透即可。

呢本係我最鍾意嘅藍帶糕點食譜，我當係一本工具書咁用，因為裡面

包含咗各式各樣烘焙西點嘅最基本原來食譜，正如個書名一樣，

基本中的最基本，呢個杏仁蛋糕就係  base on 裡面個

膨脹麵糊 (Pâte Battue-poussée) 變化而成。

蛋糕出爐喇！

可能係件 marzipan 唔係高檔貨，杏仁味真係唔多覺，就連老表都

話完全食唔到杏仁味！用呢類形麵糊製成嘅蛋糕，即磅蛋糕

一類，真係唔適合當日即食，質地比較乾身，過幾日

等佢回油後再食，口感真係唔同，油潤好多。

Notes：
- 蛋液必須逐少分多次拌入牛油霜內，否則容易做成油水分離情況出現。

- 當麵糊表面焗至乾身 (約 15 分鐘) 後，可以先拎出，用刀喺表面垂直割開，之後繼續
   入爐焗，就可以焗出靚靚裂紋。